Read Jarai Yôb 6 Bible Online

Yôb 6 - Jarai bible

Yôb 6

¹Giŏng anŭn, Yôb laĭ glaĭ tui anai:

²“Kơnơ̆ng tơdah arăng dưi pơkơtraŏ tơlơi ruă tơnap kâo laih anŭn pioh abih bang tơlơi truh sat truh kơ kâo ƀơi gai pơkơtraŏ, jing hiam yơh!

³Tơlơi anŭn či jing hĭ kơtraŏ hloh kơ čuah ia rơsĭ, yuakơ anŭn yơh kâo pơhiăp jơlŭt jơlăt.

⁴Anŭn jing hrup hăng Pô Dưi Kơtang hơmâo pơnăh hĭ laih kâo hăng khul ƀrŏm hraŏ Ñu, laih anŭn jrao djai mơ̆ng ƀrŏm anŭn pơlar djŏp amăng drơi jan kâo; Ơi Adai hơmâo prap pre lui laih kiăng kơ pơhuĭ hĭ kâo.

⁵Aseh glai ƀu ur ôh tơdang ñu hơmâo rơ̆k, laih anŭn rơmô kŏn bo ur lơi tơdang ñu hơmâo adrăng.

⁶Mơnuih ƀu ƀơ̆ng ôh gơnam ƀơ̆ng tơba ƀlă, jing gơnam ƀu buh mŭt hra ôh. Ƀu hơmâo mơnâo ƀâo hơget ôh amăng sơ̆l kô̱̆ boh mơnŭ.

⁷Kâo hơngah ƀu kiăng tĕk djơ̆ gơnam ƀơ̆ng anŭn ôh; yuakơ gơnam ƀơ̆ng hrup hăng anŭn ngă kơ kâo ruă yơh.

⁸“Kâo ƀu thâo hluh ôh yua hơget Ơi Adai ƀu či laĭ glaĭ kơ tơlơi kâo rơkâo, laih anŭn yua hơget Ñu ƀu či laĭ glaĭ kơ tơlơi kâo iâu laĭ ôh.

⁹Kâo kwưh kiăng Ñu či pơphač hĭ kâo, laih anŭn pơhluai hĭ tơngan Ñu ƀơi kâo kiăng kơ pơrai hĭ kâo.

¹⁰Giŏng anŭn, Ñu či pơjuh pơalum kâo, jing tơlơi mơak kâo hơmâo amăng tơlơi ruă nuă ƀu thâo abih, anŭn jing tơlơi kâo ƀu hơmâo hơngah hĭ ôh khul boh hiăp Pô Rơgoh Hiam.

¹¹“Kâo ƀu hơmâo tơlơi kơtang dơ̆ng tah kiăng kơ kâo ăt čang rơmang kiăng kơ hơdip. Kâo ƀu hơmâo tơhơnal tơlơi kiăng kơ ư̆ añ ôh.

¹²Kâo ƀu hơmâo ôh tơlơi kơtang kar hăng boh pơtâo. Drơi jan kâo ƀu djơ̆ arăng pơjing hăng ko̱ng ôh.

¹³Kâo ƀu hơmâo tơlơi kơtang ôh kiăng pơklaih hĭ kâo pô; ră anai kâo ƀu dưi jing hĭ amăng tơlơi anŭn ôh.

¹⁴“Pô rơngot hơning kar hăng kâo, jing pô ƀu dưi gring djru brơi kơ ñu pô ôh, wơ̆t tơdah ñu ƀu huĭ pơpŭ ƀôdah huĭ pơpŭ kơ Pô Dưi Kơtang.

¹⁵Samơ̆ bơ kơ ƀing gih, jing ƀing ayŏng adơi kâo, plư pleč hĭ kâo kar hăng khul hơnŏh ia jing kar hăng ia thu kho̱t hĭ tơdang ƀu hơmâo ôh ia hơjan rai.

¹⁶Amăng bơyan puih, hơnŏh ia tŭ go̱m hĭ hăng ple̱r laih anŭn hăng ple̱r tơpŭng,

¹⁷samơ̆ ñu rơngiă hĭ ia ñu laih anŭn rơngiă hĭ amăng tơlơi pơiă, laih anŭn hơnŏh ia anŭn thu kho̱t hĭ yơh.

¹⁸Ƀing tuai đuaĭ hyu găn ƀơi ñu wĕh nao hơduah ia; ƀing gơñu hyu hơduah laih anŭn djai hĭ amăng tơdron ha̱r.

¹⁹Ƀing grup sĭ mơnia mơ̆ng anih Têma hyu hơduah sem ia, ƀing grup sĭ mơnia mơ̆ng anih Seba čang rơmang hơduah ƀuh ia,[23]

²⁰samơ̆ ƀing gơñu tah hơtai hĭ yuakơ kơnang kơ ia anŭn; tơdang ƀing gơñu truh pơ anŭn, ƀing gơñu tah hơtai yơh.

²¹Ƀing gih ƀu djru kơ kâo ôh, samơ̆ jing kar hăng khul hơnŏh ia thu anŭn; ƀing gih ƀuh anih hơdip huĭ hyưt kâo laih anŭn jing hĭ huĭ bra̱l yơh.

²²Kâo ƀu či laĭ ôh hăng ih tui anai, ‘Djru pha brơi kơ kâo đa, ƀôdah kla kơ arăng brơi kơ kâo bĕ mơ̆ng mŭk dram ih’?

²³Laih anŭn kâo ƀu či rơkâo ôh kar hăng anai, ‘Pơklaih hĭ bĕ kâo mơ̆ng ƀing rŏh ayăt kâo, laih anŭn song glaĭ bĕ kâo mơ̆ng ƀing kơtư̆ juă kâo’?

²⁴“Pơtô bĕ kơ kâo tui anŭn kâo či dŏ rơiăt; pơrơđah bĕ kơ kâo, pơpă tơlơi kâo ngă soh lĕ.

²⁵Khul tơlơi pơhiăp tơpă jing ruă nuă biă mă yơh. Samơ̆ ƀing gih ƀu pơrơjăh hơget ôh mơ̆ng tơlơi ƀing gih pơhiăp kơ tơlơi kâo.

²⁶Ƀing gih kiăng pơtơpă glaĭ hơget tơlơi kâo pơhiăp, laih anŭn pơmĭn ƀlơ̆ng kơ tơlơi kâo pơhiăp jing kar hăng angĭn wơ̆t tơdah kâo ƀu hơmâo tơlơi čang rơmang ôh.

²⁷Ƀing gih ăt či ngă čram kiăng kơ mă mơnuih tơhrit ama laih anŭn ngă pơdrŏng hĭ gih pô yua mơ̆ng sĭ hĭ gơyut jĕ giăm gih.

²⁸“Samơ̆ ră anai, rơkâo lăng bĕ ƀơi ƀô̆ mơta kâo. Kâo ƀu či pơhiăp ƀlŏr hăng ƀing gih ôh.

²⁹Rơkâo ƀing gih pơmĭn glaĭ bĕ, anăm jing hrup hăng ƀing ƀu tơpă ôh; pơmĭn glaĭ bĕ, yuakơ kơnuih tơpă sĭt kâo jing djơ̆.

³⁰Kâo ƀu pơhiăp khul boh hiăp soh sat ôh. Kâo dưi pơkơnăl tŏng krah khul boh hiăp hiam hăng boh hiăp sat.