Read Jarai Adoh Bơni Hơơč 1 Bible Online

Adoh Bơni Hơơč 1 - Jarai bible

Adoh Bơni Hơơč 1

¹Mơyŭn mơak yơh kơ hlơi pô ƀu rơbat tui ôh ƀơi jơlan ƀing sat ƀai pơtô, kŏn dŏ dơ̆ng sa pran sa jua hrŏm hơbĭt lơi hăng ƀing mơnuih soh sat laih anŭn kŏn dŏ be̱r pơgop pơlir hrŏm hơbĭt lơi hăng ƀing mơnuih ƀrưh ƀai kơ Yahweh.

²Samơ̆ ñu mơak gưt tui Tơlơi Juăt Yahweh, laih anŭn pơmĭn pơhrăm kơ tơlơi juăt anŭn hrơi mlam.

³Ñu anŭn hrup hăng sa ƀĕ kơyâo čăt jĕ ƀơi hơnŏh ia yơh, pơtơbiă rai boh djơ̆ tui hăng bơyan nanao laih anŭn hla ñu ƀu thâo gliu djot hĭ ôh. Amăng abih bang bruă pô anŭn ngă, dưi jing soh sel.[1]

⁴Samơ̆ ƀing sat ƀai ƀu djơ̆ kar hăng anŭn ôh, ƀing gơñu hrup hăng hơkam pơdai angĭn puh pơđuaĭ hĭ.

⁵Hơnŭn yơh Yahweh ƀu či yap tơpă ôh kơ ƀing sat ƀai amăng hrơi Ñu phat kơđi, ƀing mơnuih soh sat kŏn dŏ hrŏm hơbĭt hăng ƀing ană plei Yahweh lơi.

⁶Yuakơ anŭn yơh, Yahweh răk wai dui ba nanao ƀing mơnuih tơpă hơnơ̆ng amăng jơlan gơñu, samơ̆ jơlan ƀing sat ƀai či ba gơñu truh kơ tơlơi răm rơngiă hĭ yơh.