Read Jarai Adoh Bơni Hơơč 112 Bible Online

Adoh Bơni Hơơč 112 - Jarai bible

Adoh Bơni Hơơč 112

¹Bơni hơơč bĕ kơ Yahweh! Mơyŭn mơak yơh kơ hlơi pô huĭ pơpŭ kơ Yahweh, jing pô hơ̆k mơak tui gưt hơdôm tơlơi Ñu pơđar.

²Ƀing ană bă ñu yơh či đĭ kơyar amăng anih lŏn gơñu; sĭt kơnung djuai ñu anŭn či tŭ gơnam bơni hiam yơh.

³Sang anŏ ñu či hơmâo mŭk dram pơdrŏng săh yơh, laih anŭn gơnam bơni mơnuih tơpă hơnơ̆ng anŭn či dŏ nanao hlŏng lar yơh.

⁴Amăng mông kơnăm mơmŏt ƀing mơnuih djơ̆ tơpă yơh či jing hĭ kar hăng tơlơi bơngač pơčrang brơi kơ ƀing mơnuih khăp pap, thâo pap laih anŭn tơpă hơnơ̆ng yơh.

⁵Gơnam hiam yơh či truh kơ hlơi pô čơmah laih anŭn rơngai brơi čan, jing pô hơdip hơdơ̆ng hăng tơlơi djơ̆ găl yơh.

⁶Sĭt sa čô tơpă hơnơ̆ng ƀu či răm rơngiă ôh, samơ̆ ƀing mơnuih rơnŭk pơanăp či djă̱ hơdơr kơ ñu nanao.

⁷Mơnuih tơpă anŭn ƀu či huĭ bra̱l ôh kơ tơlơi pơthâo sat; tơlơi đaŏ ñu jing kơtang, laih anŭn ñu đaŏ kơnang amăng Yahweh.

⁸Pran jua ñu ƀu ƀlơ̆ng bơngơ̆t ôh kŏn huĭ bra̱l lơi, tơl ñu ƀuh ƀing rŏh ayăt ñu thuơ hĭ yơh.

⁹Ñu čơmah pha brơi gơnam ñu kơ ƀing kơƀah kơƀap, laih anŭn tơlơi hiam klă Ñu anŭn ăt či dŏ nanao hlŏng lar yơh; ñu či jing mơnuih dưi mơyang arăng pơpŭ pơyom yơh.[196]

¹⁰Ƀing mơnuih sat ƀai či ƀuh tơlơi anai laih anŭn hil rơañ; ƀing gơñu či kĕ tơgơi laih anŭn răm rơngiă hĭ; khul tơlơi čang rơmang gơñu či jing hĭ đôč đač yơh.