Read Jarai Adoh Bơni Hơơč 122 Bible Online

Adoh Bơni Hơơč 122 - Jarai bible

Adoh Bơni Hơơč 122

¹Tơlơi adoh tơdang đĭ nao pơ Sang Yang Ơi Adai. Tơlơi adoh bơni hơơč Dawid čih kơčĕ. Kâo hơ̆k mơak biă mă yơh hrŏm hăng ƀing hlơi pô pơhiăp hăng kâo tui anai, “Nă, brơi kơ ƀing ta đĭ nao bĕ pơ Sang Yang Yahweh.”

²Laih anŭn ră anai ƀing gơmơi truh pơ anai laih, Ơ plei prŏng Yerusalaim hơi, laih anŭn ƀing gơmơi hlak dŏ dơ̆ng gah lăm kơ amăng ja̱ng ih yơh!

³Yerusalaim jing sa boh plei prŏng arăng ma̱n pơdơ̆ng glaĭ laih jing anih tŏ tơroai hiam rô̆ laih anŭn rơguat kơdrăm.

⁴Anŭn yơh jing anih hơmâo ƀing kơnung djuai ƀing Israel đĭ nao, jing ƀing ană plei Yahweh yơh, kiăng kơ bơni hơơč kơ anăn Yahweh tui hluai hăng tơlơi pơtă pơtăn Ñu pha brơi laih kơ ƀing Israel.

⁵Pơ anih anŭn yơh hơmâo khul grê pơtao ƀing pơtao dŏ be̱r kiăng kơ phat kơđi ƀing ană plei hăng tơlơi djơ̆ tơpă, jing khul grê pơtao ƀing pơtao jing ană tơčô pơtao Dawid yơh.

⁶Iâu laĭ bĕ kơ tơlơi rơnŭk rơno̱m plei prŏng Yerusalaim tui anai, “Kwưh kiăng brơi kơ ƀing hlơi pô khăp kơ ih dŏ rơnŭk hơđơ̆ng yơh.

⁷Kwưh kiăng brơi kơ hơmâo tơlơi rơnŭk rơnua dŏ amăng lăm kơ khul pơnăng plei ih laih anŭn tơlơi rơnŭk hơđơ̆ng amăng khul kơđông kơjăp ih.”

⁸Ơ plei Yerusalaim ăh, yuakơ tơhơnal tơlơi ƀing ayŏng adơi kâo wơ̆t hăng ƀing gơyut gơyâo kâo yơh, kâo laĭ kơ ih tui anai, “Brơi tơlơi rơnŭk rơno̱m dŏ amăng ih!”

⁹Yuakơ tơhơnal tơlơi Sang Yang Yahweh Ơi Adai gơmơi yơh, kâo iâu laĭ kơ tơlơi đĭ kơyar ih.