Read Jarai Adoh Bơni Hơơč 135 Bible Online

Adoh Bơni Hơơč 135 - Jarai bible

Adoh Bơni Hơơč 135

¹Bơni hơơč bĕ kơ Yahweh! Bơni hơơč bĕ kơ Ñu, Ơ ƀing ding kơna Yahweh hơi,

²jing ƀing kơkuh pơpŭ amăng Sang Yang Yahweh, jing amăng anih wăl tơdron Sang Yang Ơi Adai ta.

³Bơni hơơč bĕ kơ Yahweh, yuakơ Yahweh jing hiam klă; adoh bơni hơơč bĕ kơ anăn Ñu, yuakơ anăn Ñu jing hiam rô̆.

⁴Yahweh hơmâo ruah mă laih ƀing Yakôb jing lŏm kơ Ñu pô, sĭt ƀing Israel anŭn jing hĭ mŭk dram kơ Ñu pô yơh.

⁵Kâo thâo sĭt Yahweh jing prŏng prin biă mă, sĭt Khua Yang ta jing glông hloh kơ abih bang yang rơba̱ng yơh.

⁶Yahweh ngă hơdôm tơlơi pơmơak kơ Ñu pô amăng adai rơngit adih hrŏm hăng lŏn tơnah anai, laih anŭn amăng ia rơsĭ hrŏm hăng abih bang anih hlung dơlăm gah yŭ yơh.

⁷Ñu ngă brơi kơ kơthul tơbiă rai mơ̆ng rơnuč akiăng lŏn tơnah; Ñu brơi rai kơmlă hrŏm hăng hơjan, laih anŭn ba tơbiă angĭn mơ̆ng anih pơkom Ñu yơh.

⁸Yahweh pơrai hĭ abih bang ƀing ană kơčoa ƀing Êjip, jing ană kơčoa gơñu wơ̆t hăng ană blung hlâo hlô mơnơ̆ng rong gơñu mơ̆n.

⁹Ñu brơi rai khul gru kơnăl mơsêh mơyang amăng tŏng krah ƀing gih yơh, Ơ ƀing Êjip ăh, kiăng kơ pơkơdơ̆ng glaĭ hăng pơtao Pharaoh wơ̆t hăng ƀing khua moa ñu mơ̆n.

¹⁰Ñu pơrai hĭ lu lŏn čar laih anŭn pơdjai hĭ ƀing pơtao dưi kơtang tui anai;

¹¹Sihôn jing pơtao ƀing Amôr, Ôg jing pơtao ƀing Basan, laih anŭn abih bang ƀing pơtao ƀing kơnung djuai Kanaan yơh.

¹²Laih anŭn Ñu pha brơi lŏn čar ƀing anŭn jing hĭ lŏn kŏng ngăn kơ ƀing ană plei Ñu, jing lŏn kŏng ngăn kơ ƀing ană plei Israel yơh.

¹³Ơ Yahweh ăh, anăn Ih yơh mơnuih mơnam či pơhaih nanao hlŏng lar, Ơ Yahweh ăh, tơlơi hing ang Ih či dŏ amăng abih bang rơnŭk mơnuih pơanăp yơh.

¹⁴Samơ̆ Yahweh či glưh pran jua pap kơ ƀing ding kơna Ñu laih anŭn či phat kơđi brơi kơ ană plei Ñu anŭn yơh.

¹⁵Ƀing yang rup trah ƀing lŏn čar pơkŏn jing kơnơ̆ng pơkra rai mơ̆ng amrăk mah đôč, sĭt kơnơ̆ng tơngan mơnuih mơnam đôč yơh pơkra rai khul yang rơba̱ng anŭn.[219]

¹⁶Ƀing gơñu hơmâo amăng bah, samơ̆ ƀu thâo pơhiăp ôh, ƀing gơñu hơmâo mơta, samơ̆ ƀu thâo ƀuh ôh.

¹⁷Ƀing gơñu hơmâo tơngia, samơ̆ ƀu thâo hơmư̆ ôh, laih anŭn amăng bah gơñu kŏn thâo suă jua lơi.

¹⁸Ƀing hlơi pô pơkra rai khul rup trah anŭn či jing hĭ hrup hăng khul rup anŭn yơh, laih anŭn wơ̆t hăng ƀing đaŏ kơnang kơ khul rup trah anŭn ăt hrup hăng anŭn mơ̆n.

¹⁹Bơni hơơč bĕ kơ Yahweh, Ơ ƀing ană plei Israel hơi, bơni hơơč bĕ kơ Yahweh, Ơ ƀing khua ngă yang jing ƀing ană tơčô A̱rôn hơi!

²⁰Ơ ƀing ană tơčô Lêwi hơi, bơni hơơč bĕ kơ Yahweh, Ơ abih bang ƀing mơnuih huĭ pơpŭ kơ Ñu, bơni hơơč bĕ kơ Yahweh.

²¹Kwưh kiăng kơ tơlơi bơni hơơč kơ Yahweh tơbiă rai mơ̆ng anih Ziôn, jing kơ Pô dŏ amăng plei prŏng Yerusalaim. Bơni hơơč bĕ kơ Yahweh!