Read Jarai Adoh Bơni Hơơč 136 Bible Online

Adoh Bơni Hơơč 136 - Jarai bible

Adoh Bơni Hơơč 136

¹Hơdơr bơni bĕ kơ Yahweh, yuakơ Ñu jing hiam klă. Tơlơi khăp hiam klă Ñu dŏ nanao hlŏng lar. [220]

²Hơdơr bơni bĕ kơ Ơi Adai jing Pô prŏng hloh kơ abih bang yang pơkŏn. Tơlơi khăp hiam klă Ñu dŏ nanao hlŏng lar.

³Hơdơr bơni bĕ kơ Khua Yang jing Pô dưi kơtang hloh kơ abih bang khua pơkŏn. Tơlơi khăp hiam klă Ñu dŏ nanao hlŏng lar.

⁴Kơnơ̆ng hơjăn Ñu yơh dưi ngă tơlơi mơsêh mơyang prŏng prin. Tơlơi khăp hiam klă Ñu dŏ nanao hlŏng lar.

⁵Yuakơ Ñu rơgơi yơh, Ñu hrih pơjing rai adai rơngit. Tơlơi khăp hiam klă Ñu dŏ nanao hlŏng lar. [221]

⁶Ñu yơh jing Pô pơjing rai lŏn tơnah dŏ ƀơi gah ngŏ khul ia rơsĭ. Tơlơi khăp hiam klă Ñu dŏ nanao hlŏng lar. [222]

⁷Ñu yơh jing Pô hrih pơjing khul pul yom pơphan. Tơlơi khăp hiam klă Ñu dŏ nanao hlŏng lar. [223]

⁸Ñu brơi yang hrơi git gai tơdang hrơi. Tơlơi khăp hiam klă Ñu dŏ nanao hlŏng lar.

⁹Ñu brơi yang blan laih anŭn khul pơtŭ git gai tơdang mlam. Tơlơi khăp hiam klă Ñu dŏ nanao hlŏng lar.

¹⁰Ñu yơh pơdjai hĭ ƀing ană kơčoa ƀing Êjip. Tơlơi khăp hiam klă Ñu dŏ nanao hlŏng lar. [224]

¹¹Ñu yơh dui ba ƀing Israel tơbiă mơ̆ng lŏn čar ƀing Êjip anŭn. Tơlơi khăp hiam klă Ñu dŏ nanao hlŏng lar. [225]

¹²Ñu yơr tơbiă hơpăl tơngan dưi kơtang Ñu kiăng kơ dui ba ƀing gơñu yơh. Tơlơi khăp hiam klă Ñu dŏ nanao hlŏng lar.

¹³Ñu yơh pơkăh pơpha rơsĭ Mriah jing hĭ dua bơnăh. Tơlơi khăp hiam klă Ñu dŏ nanao hlŏng lar. [226]

¹⁴Laih anŭn Ñu dui ba ƀing Israel găn nao amăng tŏng krah ia anŭn. Tơlơi khăp hiam klă Ñu dŏ nanao hlŏng lar.

¹⁵Samơ̆ Ñu tơlư̆ hĭ pơtao Pharaoh wơ̆t hăng ƀing ling tơhan ñu mơ̆n amăng rơsĭ Mriah anŭn. Tơlơi khăp hiam klă Ñu dŏ nanao hlŏng lar.

¹⁶Ñu yơh dui ba ƀing ană plei Ñu găn tơdron ha̱r. Tơlơi khăp hiam klă Ñu dŏ nanao hlŏng lar.

¹⁷Ñu jing Pô pơrai hĭ laih ƀing pơtao prŏng. Tơlơi khăp hiam klă Ñu dŏ nanao hlŏng lar.

¹⁸Ñu yơh jing Pô pơdjai hĭ ƀing pơtao dưi kơtang anai: Tơlơi khăp hiam klă Ñu dŏ nanao hlŏng lar.

¹⁹Ñu pơdjai hĭ Sihôn jing pơtao mơnuih Amôr. Tơlơi khăp hiam klă Ñu dŏ nanao hlŏng lar. [227]

²⁰Ñu ăt pơdjai hĭ Ôg jing pơtao ƀing Basan mơ̆n. Tơlơi khăp hiam klă Ñu dŏ nanao hlŏng lar. [228]

²¹Laih anŭn Ñu pha brơi laih lŏn čar ƀing pơtao anŭn jing hĭ lŏn kŏng ngăn kơ ƀing ană plei Ñu. Tơlơi khăp hiam klă Ñu dŏ nanao hlŏng lar.

²²Ñu pha brơi lŏn kŏng ngăn anŭn kơ ƀing ding kơna Ñu ƀing Israel yơh. Tơlơi khăp hiam klă Ñu dŏ nanao hlŏng lar.

²³Ñu yơh ƀu wơr bĭt hĭ ôh ƀing gơmơi tơdang ƀing rŏh ayăt gơmơi mă hĭ ƀing gơmơi jing mơnă laih. Tơlơi khăp hiam klă Ñu dŏ nanao hlŏng lar.

²⁴Ñu pơrơngai hĭ laih ƀing gơmơi mơ̆ng ƀing rŏh ayăt gơmơi yơh. Tơlơi khăp hiam klă Ñu dŏ nanao hlŏng lar.

²⁵Laih anŭn Ñu pha brơi gơnam ƀơ̆ng kơ abih bang djuai mơnơ̆ng yơh. Tơlơi khăp hiam klă Ñu dŏ nanao hlŏng lar.

²⁶Hơdơr bơni bĕ kơ Ơi Adai pơ adai rơngit adih. Tơlơi khăp hiam klă Ñu dŏ nanao hlŏng lar.