Read Jarai Adoh Bơni Hơơč 147 Bible Online

Adoh Bơni Hơơč 147 - Jarai bible

Adoh Bơni Hơơč 147

¹Bơni hơơč bĕ kơ Yahweh! Hiam mơak biă mă yơh kiăng kơ adoh bơni hơơč kơ Ơi Adai ta; mơak mơai laih anŭn djơ̆ găl biă mă yơh kiăng bơni hơơč kơ Ñu.

²Yahweh yơh jing Pô hlak rŭ̱ pơdơ̆ng glaĭ plei Yerusalaim; Ñu hlak ba glaĭ ƀing Israel jing ƀing dŏ ataih amăng lŏn čar tuai.

³Ñu pơhla̱o hĭ ƀing hơmâo pran jua pơčah laih laih anŭn akă pŏn hĭ khul nam rơka gơñu.

⁴Tơdang Ñu hrih pơjing adai rơngit, Ñu khưp ngă laih mrô khul pơtŭ laih anŭn hơmâo pơanăn laih rĭm sar pơtŭ anŭn.

⁵Khua Yang ta jing prŏng prin laih anŭn kơtang mơyang biă mă; tơlơi thâo rơgơi Ñu mơnuih mơnam ƀu thâo pơkă ôh.

⁶Yahweh grơ̆ng djru brơi kơ ƀing arăng kơtư̆ juă, samơ̆ jăm juă hĭ ƀing sat ƀai ƀơi lŏn.

⁷Adoh bơni bĕ kơ Yahweh hăng tơlơi adoh hơdơr bơni; pĕ bĕ ayŭ kơ Ơi Adai ta hăng go̱ng trưng.

⁸Ñu go̱m hĭ adai rơngit adih hăng kơthul; Ñu brơi rai ia hơjan kơ lŏn tơnah laih anŭn ngă brơi kơ rơ̆k dưi čăt đĭ ƀơi khul bŏl čư̆.

⁹Ñu pha brơi gơnam ƀơ̆ng kơ hlô mơnơ̆ng laih anŭn tơdang khul ană čim ak ur, Ñu čem rong brơi yơh.

¹⁰Yahweh ƀu mơak amăng tơlơi kơtang khul aseh pơblah ôh, laih anŭn Ñu kŏn mơak mơai lơi hăng pơtih pha ƀing tơhan khĭn kơtang.

¹¹Kơđai glaĭ, Yahweh mơak amăng ƀing mơnuih huĭ pơpŭ kơ Ñu, jing amăng ƀing hlơi pô čang rơmang amăng tơlơi khăp hiam klă Ñu yơh.

¹²Pơdun đĭ bĕ Yahweh, Ơ ƀing Yerusalaim hơi! Bơni hơơč bĕ kơ Ơi Adai ta, Ơ ƀing Ziôn ăh!

¹³Ñu pơkơjăp brơi khul čơnŭh kăl amăng ja̱ng plei prŏng ta, laih anŭn bơni hiam kơ ƀing ta jing ƀing ană plei dŏ amăng plei anŭn yơh.

¹⁴Ñu pha brơi tơlơi rơnŭk rơno̱m kơ guai lŏn čar ta laih anŭn pơhrăp hĭ ƀing ta hăng khul pơdai hiam hloh yơh.

¹⁵Yahweh brơi rai tơlơi pơđar Ñu ƀơi lŏn tơnah anai; laih anŭn hơdôm boh hiăp Ñu pơgiŏng hĭ tañ biă mă.

¹⁶Ñu pơbra hyu ple̱r tơpŭng hrup hăng sa blah khăn sŏm laih anŭn pơlar hyu ple̱r ƀlit kar hăng hơbâo apui yơh.

¹⁷Ñu plĕ trŭn ple̱r tơlŏ Ñu hrup hăng khul boh pơtâo anet. Hlơi pô dưi dŏ kơjăp hăng tơlơi ple̱r rơŏt Ñu brơi rai anŭn lĕ?

¹⁸Tơdơi kơ anŭn Ñu brơi rai boh hiăp Ñu dơ̆ng laih anŭn abih ple̱r anŭn lê̱k hĭ mơtam; Ñu mơit rai angĭn thut, tui anŭn ia rô nao yơh.

¹⁹Yahweh hơmâo pơhiăp pơhaih laih boh hiăp Ñu kơ ƀing Yakôb, sĭt Ñu pơrơđah hơdôm tơlơi pơtă pơtăn Ñu laih anŭn tơlơi djơ̆ pơtă Ñu kơ ƀing Israel.

²⁰Ñu ƀu hơmâo ngă laih ôh hơdôm tơlơi bruă anŭn kơ ƀing lŏn čar pơkŏn, laih anŭn bơ kơ hơdôm tơlơi juăt Ñu, ƀing lŏn čar anŭn ƀu thâo krăn ôh. Bơni hơơč kơ Yahweh!