Read Jarai Adoh Bơni Hơơč 17 Bible Online

Adoh Bơni Hơơč 17 - Jarai bible

Adoh Bơni Hơơč 17

¹Tơlơi Dawid Iâu Laĭ Ơ Yahweh, hơmư̆ bĕ tơlơi kâo kwưh rơkâo kơ tơlơi djơ̆ lăp; pơđi̱ng tơngia bĕ ƀơi tơlơi kâo iâu kơ tơlơi djru! Hơmư̆ bĕ kơ tơlơi iâu laĭ kâo yuakơ amăng bah kâo ƀu iâu laĭ pleč ƀlŏr.

²Rơkâo kơ Ih phat kơđi hiam brơi kơ kâo, laih anŭn ngă bĕ hơget tơlơi jing djơ̆ lăp.

³Ih thâo krăn jua pơmĭn kâo. Ih hơmâo rai laih kiăng lông lăng kâo tơdang mlam; Ih hơmâo ep kơsem laih kâo abih bang laih anŭn ƀu ƀuh ôh tơlơi amoaih kluh sat amăng kâo. Amăng bah kâo ƀu pơhiăp sat ƀai hơget ôh,

⁴kar hăng ƀing arăng pơhiăp sat ƀai; kâo hơmâo gưt tui laih tơlơi pơđar mơ̆ng amăng bah Ih laih anŭn ƀu đuaĭ tui ôh jơlan mơnuih ƀrưh mơhiăh.

⁵Yak kâo rơbat nanao amăng jơlan Ih laih anŭn tơkai kâo ƀu či lui wir hĭ ôh mơ̆ng hơdôm jơlan anŭn.

⁶Ơ Ơi Adai ăh, kâo iâu laĭ Ih yuakơ kâo thâo Ih či laĭ glaĭ kơ kâo; tui anŭn pơđi̱ng tơngia bĕ kơ kâo laih anŭn hơmư̆ brơi bĕ hiăp kâo đa.

⁷Pơrơđah bĕ tơlơi khăp hiam klă Ih kơ kâo; Ih yơh jing Pô pơklaih hĭ kâo laih anŭn ƀơi djeo Ih yơh kâo dŏ kơđap rơnŭk rơnua mơ̆ng ƀing ayăt kâo.

⁸Pơgang bĕ kâo kar hăng Ih răk wai alăk mơta Ih; brơi bĕ kâo dŏ rơnŭk hơđơ̆ng gah yŭ tơu čăng Ih

⁹mơ̆ng khul tơlơi ƀing sat ƀai kơsung blah, jing ƀing rŏh ayăt mơnuih mơnam wang dar kâo;

¹⁰Pran jua khăng tiu gơñu ƀu hơmâo tơlơi pap ôh, laih anŭn amăng bah gơñu ăt pơhiăp pơgao ang mơ̆n.

¹¹Ră anai ƀing gơñu dŏ wang dar kâo pơpă anih kâo wir wĕh nao, dŏ krăp mông mơyŭn kiăng kơ glŏm hĭ kâo pơ lŏn.

¹²Ƀing gơñu hrup hăng hơdôm rơmung dŭl rơpa dŏ krăp tơguan kâo, kiăng hek pơrai hĭ kâo jing lu črăn.

¹³Rai bĕ, Ơ Yahweh! Klă̱ anăp pơkơdơ̆ng glaĭ bĕ hăng ƀing rŏh ayăt kâo laih anŭn dưi hĭ bĕ hăng ƀing gơñu! Pơklaih hĭ bĕ kâo mơ̆ng mơnuih sat hăng đao Ih.

¹⁴Pơklaih bĕ kâo hăng tơngan Ih mơ̆ng ƀing mơnuih amăng lŏn tơnah anai jing ƀing hơmâo abih bang gơnam gơñu kiăng. Pơkơhma̱l hĭ bĕ ƀing gơñu hăng khul tơlơi tơnap tap Ih hơmâo răk pioh laih kơ ƀing gơñu; brơi hơmâo djŏp tơlơi tơnap kơ ƀing ană bă ñu laih anŭn ăt djă̱ pioh tơlơi tơnap kơ ƀing tơčô tơčĕ gơñu mơ̆n!

¹⁵Samơ̆ bơ kơ kâo, kâo či ƀuh Ih yơh yuakơ kâo ƀu hơmâo ngă tơlơi soh ôh; laih anŭn tơdang kâo mơdưh, kâo či mơak mơai biă mă yơh ƀơi anăp mơta Ih.