Read Jarai Adoh Bơni Hơơč 20 Bible Online

Adoh Bơni Hơơč 20 - Jarai bible

Adoh Bơni Hơơč 20

¹Kơ pô gai ayŭ. Tơlơi bơni hơơč Dawid adoh. Rơkâo Yahweh laĭ glaĭ kơ ih tơdang ih dŏ amăng tơlơi tơnap rŭng! Rơkâo Ơi Adai Yakôb, jing ơi adon ta, pơgang brơi kơ ih, pơtao ăh!

²Rơkâo Ñu djru kơ ih mơ̆ng anih Sang Yang Ñu laih anŭn pha brơi kơ ih tơlơi gŭm djru mơ̆ng anih Ñu Čư̆ Ziôn.

³Rơkâo Ñu tŭ mă abih gơnam pơyơr ih pơyơr đĭ laih anŭn Ñu mơak hăng gơnam pơyơr čuh ih.

⁴Rơkâo Ñu pha brơi kơ ih abih tơlơi pran jua ih amoaih kiăng laih anŭn brơi kơ ih dưi ngă jing hĭ tui hăng hơdră bruă ih yơh.

⁵Giŏng anŭn, ƀing gơmơi či ur dreo mơak mơai kơ tơlơi ih dưi hĭ laih anŭn bơni hơơč kơ Ơi Adai ta tơdang ih dưi hĭ. Rơkâo Yahweh laĭ glaĭ kơ abih bang tơlơi ih rơkâo, Ơ pơtao ăh.

⁶Ră anai kâo thâo Yahweh brơi tơlơi dưi hĭ kơ pơtao jing pô Ñu ruah laih; Ñu laĭ glaĭ kơ gơ̆ mơ̆ng anih adai rơgoh hiam Ñu laih anŭn yua mơ̆ng tơlơi dưi mơyang hơpăl tơngan gah hơnuă Ñu yơh, pha brơi kơ gơ̆ lu tơlơi dưi hĭ prŏng prin.

⁷Đơđa mơnuih đaŏ kơnang kơ rơdêh aseh blah gơñu laih anŭn đơđa mơnuih pơkŏn đaŏ kơnang kơ aseh blah gơñu, samơ̆ ƀing ta đaŏ kơnang amăng anăn dưi mơyang Yahweh Ơi Adai ta yơh.

⁸Ƀing gơñu či tơhneč laih anŭn lê̆ rơbuh, samơ̆ ƀing ta či tơgŭ laih anŭn dŏ dơ̆ng kơjăp yơh.

⁹Ơ Yahweh hơi, pha brơi bĕ kơ pơtao gơmơi, jing pô Ih ruah, tơlơi dưi hĭ; laĭ glaĭ bĕ kơ ƀing gơmơi tơdang ƀing gơmơi kwưh rơkâo.