Read Jarai Adoh Bơni Hơơč 24 Bible Online

Adoh Bơni Hơơč 24 - Jarai bible

Adoh Bơni Hơơč 24

¹Tơlơi bơni hơơč Dawid adoh. Lŏn tơnah laih anŭn abih bang kơyâo pơtâo mơnơ̆ng mơnuă amăng anŭn jing lŏm kơ Yahweh soh sel; sĭt lŏn tơnah laih anŭn abih bang mơnuih mơnam hơdip ƀơi anŭn jing ƀing lŏm kơ Ñu yơh.[31]

²Ñu yơh hrih pơjing lŏn thu ƀơi tŏng krah ia rơsĭ laih anŭn pơkra atur lŏn tui hăng anŭn amăng ia rơsĭ dơlăm.

³Hlơi hơmâo tơlơi dưi kiăng đĭ nao pơ Ziôn jing bŏl čư̆ Yahweh lĕ? Hlơi dưi mŭt nao amăng Sang Yang rơgoh hiam Ñu lĕ?

⁴Anŭn jing ƀing hlơi pô tơngan gơñu ngă tơlơi tơpă hơnơ̆ng laih anŭn jua pơmĭn gơñu pơmĭn tơlơi jơngeh yơh, jing ƀing jua bơngăt gơñu ƀu kơkuh pơpŭ ôh kơ rup trah laih anŭn kŏn ƀuăn rơ̆ng ƀlŏr lơi.[32]

⁵Yahweh yơh či bơni hiam kơ ƀing gơñu, laih anŭn Ơi Adai jing Pô pơklaih gơñu yơh či yap ƀing gơñu jing ƀing ƀu ngă soh ôh.

⁶Anŭn jing ƀing mơnuih hơduah sem Ơi Adai, jing ƀing rai hơduah sem ƀô̆ mơta Ơi Adai Yakôb yơh.

⁷Pŏk prŏng phing phang bĕ, Ơ ƀing wai khul amăng ja̱ng hơi! Pŏk bĕ khul bah amăng sang yang đưm đă adih! Tui anŭn, Pơtao ang yang prŏng dưi mŭt rai yơh.

⁸Hlơi jing pô Pơtao ang yang prŏng anai lĕ? Ñu yơh jing Yahweh, Pô kơtang mơyang laih anŭn dưi kơtang yơh, jing Yahweh, Pô dưi hĭ amăng tơdron blah.

⁹Pŏk prŏng phing phang bĕ, Ơ ƀing wai khul amăng ja̱ng hơi! Pŏk bĕ khul bah amăng đưm đă adih! Tui anŭn, Pơtao ang yang prŏng dưi mŭt rai yơh.

¹⁰Hlơi jing pô Pơtao ang yang prŏng anai lĕ? Anŭn jing Yahweh Dưi Kơtang yơh, Ñu yơh jing Pơtao ang yang prŏng!