Read Jarai Adoh Bơni Hơơč 3 Bible Online

Adoh Bơni Hơơč 3 - Jarai bible

Adoh Bơni Hơơč 3

¹Tơlơi bơni hơơč Dawid adoh tơdang ñu đuaĭ kơdŏp mơ̆ng ană ñu Absalôm. Ơ Yahweh hơi, ƀing rŏh ayăt kâo jing lu biă mă, lu biă mă yơh ƀing mơnuih tơgŭ pơkơdơ̆ng glaĭ hăng kâo!

²Hơmâo lu ƀing gơñu pơră pơruai kơ tơlơi kâo tui anai, “Ơi Adai ƀu či djru pơklaih hĭ ñu ôh.”

³Samơ̆ Ih yơh, Ơ Yahweh hơi, jing khiơl pơgang kâo, Ih brơi kơ kâo dưi hĭ kơ ƀing rŏh ayăt kâo laih anŭn Ih djru kâo dưi angak đĭ ƀô̆ mơta kâo.

⁴Kâo iâu kwưh đĭ Yahweh kơ tơlơi djru, laih anŭn Ñu laĭ glaĭ kơ kâo mơ̆ng Sang Yang Ziôn jing anih bŏl čư̆ rơgoh hiam Ñu.

⁵Tơdang kâo đih, kâo dưi pĭt rơnŭk rơnua, truh kơ mơguah yơh kâo dưi mơdưh dơ̆ng, yuakơ Yahweh wai lăng kâo.

⁶Kâo ƀu huĭ ôh kơ rơbâo rơbăn ƀing rŏh ayăt jing ƀing wang dar pơkơdơ̆ng glaĭ hăng kâo mơ̆ng djŏp akiăng.

⁷Ơ Yahweh Ơi Adai kâo hơi, rai djru pơklaih kâo bĕ yuakơ Ih hơmâo păh laih ƀơi ka̱ng abih bang ƀing rŏh ayăt kâo kiăng kơ klao djik laih anŭn pơrai hĭ tơgơi gơñu kiăng kơ ƀing gơñu ƀu dưi ngă sat kơ kâo dơ̆ng tah.

⁸Tơlơi pơklaih hĭ mơ̆ng tơlơi huĭ hyưt tơbiă rai mơ̆ng Ih yơh Yahweh ăh; rơkâo kơ Ih bơni hiam kơ ƀing ană plei Ih.