Read Jarai Adoh Bơni Hơơč 32 Bible Online

Adoh Bơni Hơơč 32 - Jarai bible

Adoh Bơni Hơơč 32

¹Tơlơi bơni hơơč Dawid adoh. Mơyŭn hiam yơh kơ hlơi pô tơlơi wĕ wŏ ñu Yahweh pap brơi laih, tơlơi soh ñu Yahweh lŏm hĭ laih.[39]

²Mơyŭn hiam yơh kơ hlơi pô tơlơi sat ñu Yahweh ƀu yap pơkơdơ̆ng glaĭ hăng ñu ôh, laih anŭn jua pơmĭn ñu ƀu hơmâo ôh tơlơi pleč ƀlŏr.

³Tơdang kâo dŏ rơiăt hơngah ƀu pơhaih hĭ ôh tơlơi soh kâo, tơlang tơleh kâo tơdu rơmơ̆n yơh yuakơ kâo pơkrao hia amăng abih hrơi.

⁴Ơ Yahweh hơi, hrơi hăng mlam mơtam tơngan Ih pơkơhma̱l hĭ kâo; tơlơi kơtang kâo hrŏ tơdu hĭ laih abih bang, kar hăng kơhŭl ia thu rơngiă hĭ amăng tơlơi pơiă bơyan pha̱ng.

⁵Giŏng anŭn, Kâo pơrơđah hĭ tơlơi soh kâo kơ Ih; kâo ƀu pơdŏp ôh hơdôm tơlơi sat kâo hơmâo ngă laih. Kâo laĭ, “Kâo či pơhaih abih tơlơi wĕ wŏ kâo kơ Ih yơh, Ơ Yahweh ăh,” tui anŭn Ih pap brơi kơ kâo laih anŭn abih bang tơlơi soh sat kâo rơngiă hĭ yơh.

⁶Hơnŭn yơh, brơi bĕ abih bang ană plei tŏng ten Ih iâu laĭ kơ Ih, tơdang ƀing gơñu dưi hơduah ƀuh Ih; sĭt yơh tơdang glung ia li̱ng prŏng tŭn rai, ia anŭn ƀu či lip truh pơ ƀing gơñu ôh.

⁷Ih jing anih kâo đuaĭ kơdŏp mơ̆ng ƀing rŏh ayăt kâo; Ih či pơklaih hĭ kâo mơ̆ng tơlơi rŭng răng. Ƀing adơi ai kâo adoh kraih jum dar kâo, yuakơ Ih pơklaih laih kâo.

⁸Yahweh laĭ kơ kâo tui anai, “Kâo či pơtô kơ ih jơlan ih năng rơbat nao; Kâo či djru pơmĭn kơ ih laih anŭn mơta Kâo či wai lăng ih yơh.

⁹Anăm ih jing kar hăng aseh ƀôdah aseh glưn ôh; jing hlô mơnơ̆ng arăng khŏm yua glang hăng hrĕ git kăh kiăng kơ gơñu dưi thâo pơpă či nao ƀôdah dơ̆ng glaĭ.”

¹⁰Ƀing sat ƀai či khŏm tŭ ruă nuă lu yơh, samơ̆ ƀing hlơi pô đaŏ kơnang kơ Yahweh, ñu anŭn Ơi Adai či wang dar hăng tơlơi khăp hiam klă Ñu kiăng kơ răng pơgang yơh.

¹¹Hơ̆k kơdơ̆k mơak mơai bĕ, Ơ ƀing gih jing ƀing tơpă hơnơ̆ng hơi, yuakơ tơlơi Yahweh hơmâo ngă laih, dreo mơak bĕ, Ơ abih bang ƀing gih jing ƀing hơmâo jua pơmĭn tơpă hiam.