Read Jarai Adoh Bơni Hơơč 35 Bible Online

Adoh Bơni Hơơč 35 - Jarai bible

Adoh Bơni Hơơč 35

¹Tơlơi bơni hơơč Dawid adoh. Ơ Yahweh hơi, pơkơdơ̆ng glaĭ bĕ hăng ƀing pơkơdơ̆ng glaĭ hăng kâo, blah glaĭ bĕ hăng ƀing blah glaĭ hăng kâo!

²Rơkâo kơ Ih mă bĕ khiơl anet laih anŭn khiơl prŏng; prap pre bĕ kiăng kơ djru kâo!

³Hră̱ nao bĕ tơbăk hăng jo̱ng pơblah Ih kiăng pơkơdơ̆ng glaĭ hăng ƀing kiaŏ blah kâo. Pơkơjăp glaĭ bĕ jua bơngăt kâo tui anai, “Kâo jing Pô Pơklaih ih.”

⁴Brơi bĕ kơ ƀing hlơi pô kiăng pơdjai hĭ kâo thuơ hĭ laih anŭn tŭ tơlơi mlâo mlañ! Brơi bĕ kơ ƀing hlơi pô pơkra mơneč sat kiăng pơkơdơ̆ng glaĭ hăng kâo kơdŭn glaĭ hĭ laih anŭn rŭng răng!

⁵Brơi bĕ ƀing gơñu jing kar hăng adrăng angĭn pưh pơđuaĭ hĭ, tơdang ling jang Yahweh puh pơđuaĭ hĭ ƀing gơñu.

⁶Brơi bĕ jơlan rơbat gơñu jing hĭ kơnăm mơmŏt laih anŭn tơbơr tơdang ling jang Yahweh ăt kiaŏ pơrai hĭ ƀing gơñu mơ̆n!

⁷Ƀing gơñu ƀač čơđo̱ng hơgŏm kơ kâo ƀu hơmâo tơhơnal tơlơi ôh laih anŭn kŏn hơmâo tơhơnal tơlơi hơget lơi ƀing gơñu klơi amăng luh ƀač kơ kâo.

⁸Samơ̆ brơi bĕ tơlơi răm rai či truh blĭp blăp ƀơi ƀing gơñu! Anŭn jing brơi bĕ ƀing gơñu djơ̆ glaĭ ƀơi čơđo̱ng ƀing gơñu ƀač hơgŏm laih anŭn brơi bĕ ƀing gơñu lê̆ glaĭ pơ amăng luh gơñu klơi hăng răm rai hĭ yơh.

⁹Giŏng anŭn, jua bơngăt kâo či hơ̆k mơak yuakơ tơlơi Yahweh hơmâo ngă laih yơh, sĭt kâo či mơak mơai yơh yuakơ Ñu pơklaih hĭ laih kâo.

¹⁰Kâo či laĭ kơ Yahweh hăng abih drơi kâo tui anai, “Ƀu hơmâo ôh hlơi pô hrup hăng Ih. Ih pơrơngai hĭ ƀing tơdu rơmơ̆n mơ̆ng ƀing kơtang hloh, jing ƀing kơtư̆ juă ƀing tơdu rơmơ̆n kơƀah kơƀap anŭn.”

¹¹Ƀing mơnuih ƀrưh ƀai ngă gơ̆ng jơlan ƀlŏr pơkơdơ̆ng glaĭ hăng kâo laih anŭn gơñu phŏng kơ kâo hơdôm tơlơi soh sat kâo ƀu thâo ôh.

¹²Ƀing gơñu pơglaĭ kơ kâo tơlơi sat pơala kơ tơlơi hiam, tui anŭn jua bơngăt kâo rŭng răng yơh.

¹³Samơ̆ tơdang ƀing gơñu duăm ruă, kâo čut ao tâo, laih anŭn kŏm ƀơ̆ng kiăng kơ pơrơđah tơlơi kâo rơngot hơning; kâo pơluă gŭ kâo pô laih anŭn iâu laĭ,

¹⁴kar hăng kâo iâu laĭ kơ gơyut gơyâo kâo ƀôdah kơ ayŏng adơi kâo. Kâo rơbat nao jum dar akŭp akŏ kiăng kơ pơrơđah kâo kơŭ kơuăn, kar hăng sa čô kơŭ kơuăn kơ amĭ ñu.

¹⁵Samơ̆ tơdang kâo tơhneč rơbuh, abih bang ƀing sat ƀai anŭn hơ̆k mơak laih anŭn ƀing gơñu pơƀut glaĭ jum dar kâo kiăng klao djik kơ kâo; ƀing mơnuih kâo ƀu thâo krăn ôh pơƀut pơkơdơ̆ng glaĭ hăng kâo laih anŭn taih kâo ƀu pơdơi ôh.

¹⁶Ƀing gơñu kĕ tơgơi gle̱ng nao pơ kâo hăng tơlơi pơrơmut kar hăng sa čô pô djik djak kơ mơnuih rơwen,

¹⁷Ơ Yahweh, hơbĭn sui dơ̆ng Ih kơnơ̆ng dŏ lăng kơ tơlơi sat anŭn đôč lĕ? Rơkâo kơ Ih pơklaih hĭ bĕ tơlơi hơdip kâo mơ̆ng tơlơi ƀing gơñu kơsung blah; pơklaih hĭ bĕ tơlơi hơdip yom kâo mơ̆ng hơdôm rơmung dŭl anai!

¹⁸Tui anŭn, kâo či bơni kơ Ih tŏng krah tơlơi pơjơnum prŏng ƀing ană plei Ih yơh; ƀơi anăp abih bang ană plei yơh kâo či bơni hơơč kơ Ih.

¹⁹Anăm brơi ôh ƀing pơblư̆ pơƀlŏr kơ tơlơi kâo klao djik djak kơ tơlơi kâo thuơ. Anăm brơi ôh ƀing hlơi pô pơrơmut kơ kâo ƀu hơmâo tơhơnal tơlơi anŭn gle̱ng mơta mơak mơai gơñu tơdang ƀing gơñu ƀuh kâo rơngot hơning.[43]

²⁰Ƀing gơñu ƀu pơhiăp rơnŭk rơnua ôh, samơ̆ ƀing gơñu pơčeh djŏp mơta tơlơi ƀlŏr kiăng kơ pơkơdơ̆ng glaĭ hăng ƀing mơnuih khăp kiăng rơnŭk rơnua.

²¹Ƀing gơñu săl kơ kâo hăng pơhiăp kraih tui anai, “Hah! Hăng mơta gơmơi pô yơh ƀing gơmơi hơmâo ƀuh laih hơget tơlơi ih ngă!”

²²Samơ̆, Ơ Yahweh ăh, Ih yơh hơmâo ƀuh laih tơlơi anai. Tui anŭn, rơkâo kơ Ih anăm dŏ rơiăt ôh; anăm Ih pô dŏ ataih hĭ mơ̆ng kâo ôh Ơ Yahweh ăh.

²³Tơgŭ bĕ laih anŭn pơhiăp pơgang brơi kơ kâo đa! Ơ Khua Yang Ơi Adai kâo hơi, djru pơkơdơ̆ng glaĭ brơi kơ kâo bĕ.

²⁴Ih yơh jing tơpă hơnơ̆ng, Ơ Yahweh ăh, tui anŭn pơhaih bĕ kâo jing mơnuih ƀu soh ƀơi anăp ƀing rŏh ayăt kâo; anăm brơi ƀing gơñu klao djik djak kơ kâo ôh.

²⁵Anăm brơi ôh ƀing gơñu pơlaĭ kơ tơdruă gơñu tui anai, “Ơ anŭn yơh jing tơlơi djơ̆ tui hăng tơlơi pran jua ta amoaih kiăng!” Ƀôdah laĭ, “Ƀing ta hơmâo lun ƀơ̆ng hĭ laih ñu.”

²⁶Hlơi pô klao djik djak kơ tơlơi kâo tơnap tap brơi bĕ ƀing gơñu mlâo mlañ laih anŭn rŭng răng hlo̱m ƀo̱m! Hlơi pô pơđĭ gơñu pô jing hiam klă hloh kơ kâo brơi bĕ ƀing gơñu buh mă tơlơi mlâo laih anŭn tơlơi djik djak!

²⁷Samơ̆ hlơi pô khăp kiăng kơ tơlơi khua phat kơđi pơhaih kâo jing mơnuih ƀu soh, brơi bĕ ƀing gơñu ur dreo hơ̆k kơdơ̆k mơak mơai, laih anŭn dưi laĭ nanao tui anai, “Yahweh jing prŏng prin biă mă yơh! Ñu mơak yuakơ kâo, jing ding kơna Ñu, dưi đĭ kơyar!”

²⁸Giŏng anŭn, amăng bah kâo či pơhaih tơlơi tơpă hơnơ̆ng Ih, laih anŭn kâo či bơni hơơč kơ Ih čơdơ̆ng mơ̆ng mơguah truh kơ klăm.