Read Jarai Adoh Bơni Hơơč 41 Bible Online

Adoh Bơni Hơơč 41 - Jarai bible

Adoh Bơni Hơơč 41

¹Kơ pô gai ayŭ. Tơlơi bơni hơơč Dawid adoh. Mơyŭn mơak yơh kơ hlơi pô pơmĭn djru kơ ƀing ƀun rin ƀu hơmâo anih kơnang; Yahweh či pơklaih hĭ ñu yơh amăng hrơi ñu bưp tơlơi rŭng răng.

²Yahweh či răng pơgang gơ̆ laih anŭn răk wai brơi tơlơi hơdip gơ̆ yơh; Ñu či ngă brơi kơ gơ̆ hơ̆k mơak đĭ kơyar amăng anih lŏn Yahweh ƀuăn brơi laih; Ñu ƀu či jao lui hĭ ôh gơ̆ amăng tơlơi khăp kiăng ƀing rŏh ayăt gơ̆.

³Yahweh či gŭm djru gơñu tơdang ƀing gơñu ruă duăm laih anŭn pơsuaih pơkơtang glaĭ hĭ ƀing gơñu mơ̆ng tơlơi ruă duăm anŭn yơh.

⁴Bơ kơ kâo, kâo laĭ tui anai, “Ơ Yahweh ăh, kâo pơhaih tơlơi soh kâo; rơkâo kơ Ih khăp pap kơ kâo đa laih anŭn pơsuaih hĭ kâo bĕ.”

⁵Ƀing rŏh ayăt kâo pơhiăp ƀrưh ƀai kơ tơlơi kâo tui anai, “Hơbĭn ñu či djai hĭ tañ laih anŭn ñu ƀu či hơmâo rai ană tơčô ôh lĕ?”

⁶Tơdang sa čô amăng ƀing gơñu rai čuă lăng kâo, ñu ngă mă pơjuh alum kâo, samơ̆ pran jua ñu pơƀut glaĭ tơlơi pơthâo sat pơhiăp soh kơ tơlơi kâo yơh; giŏng anŭn ñu tơbiă nao ră ruai kâo kơ djŏp djang anih.

⁷Abih bang ƀing pơrơmut kơ kâo pơhiăp pơhoč[50] hăng tơdruă pơkơdơ̆ng glaĭ hăng kâo, laih anŭn ƀing gơñu pơmĭn kiăng tơlơi truh sat biă mă či truh ƀơi kâo.

⁸Giŏng anŭn, ƀing gơñu laĭ tui anai, “Tơlơi ruă djai mơnuih yơh hơmâo dŏ laih amăng ñu; tui anŭn ñu ƀu či dưi tơgŭ đuaĭ hĭ dơ̆ng tah mơ̆ng anih pĭt ñu.”

⁹Wơ̆t dah giăng mah kâo jing pô kâo kơnang biă mă, jing pô juăt ƀơ̆ng huă hrŏm hăng kâo, ăt wir pơblư̆ hĭ kâo mơ̆n.[51]

¹⁰Samơ̆ Ih yơh, Ơ Yahweh ăh, pap mơñai kơ kâo đa laih anŭn pơsuaih pơkơtang glaĭ kâo bĕ, tui anŭn kâo či rŭ nua glaĭ ƀơi ƀing rŏh ayăt kâo anŭn yơh.

¹¹Giŏng anŭn, kâo thâo sĭt Ih mơak hăng kâo yơh, yuakơ ƀing rŏh ayăt kâo anŭn ƀu či ur dreo dưi hĭ hloh kơ kâo ôh.

¹²Ih či djru kâo yơh, yuakơ kâo tŏng ten ngă tơlơi djơ̆ tơpă, laih anŭn Ih či brơi kâo dŏ ƀơi anăp Ih hlŏng lar yơh.

¹³Ơ ƀing Israel, bơni hơơč bĕ kơ Yahweh, jing Ơi Adai ta! Bơni hơơč bĕ kơ Ñu čơdơ̆ng mơ̆ng ră anai hlŏng truh kơ hlŏng lar! Amen! Amen![52] [53]