Read Jarai Adoh Bơni Hơơč 46 Bible Online

Adoh Bơni Hơơč 46 - Jarai bible

Adoh Bơni Hơơč 46

¹Kơ pô gai ayŭ tui hăng dơnai ƀing hlak ai đah kơmơi. Tơlơi bơni hơơč ƀing ană tơčô Kôrah adoh. Ơi Adai jing Pô pơgang laih anŭn Pô pơkơtang ƀing ta; Ñu prap pre nanao kiăng kơ djru ƀing ta amăng hrơi rŭng răng.

²Tui anŭn, ƀing gơmơi ƀu či huĭ hyưt ôh, wơ̆t tơdah lŏn tơnah pơpư̆ pơgơi laih anŭn khul čư̆ glưh trŭn amăng ia rơsĭ dơlăm;

³wơ̆t tơdah ia rơsĭ klă̱ klŭng pơdơnai pơrơboh biă mă laih anŭn khul bŏl čư̆ pơpư̆ pơgơi yuakơ dơnai pơgơi kơtang biă mă anŭn.

⁴Hơmâo sa boh krong ba rai tơlơi hơ̆k mơak pơ plei Ơi Adai,[57] pơ sang rơgoh hiam[58] jing anih Pô Glông Hloh dŏ.

⁵Ơi Adai dŏ amăng plei anŭn, tui anŭn plei anŭn ƀu či răm rai hĭ ôh; Ơi Adai či rai djru kơ plei anŭn ƀơi hlak mơguah sêng brêng yơh.

⁶Ƀing lŏn čar tuai či huĭ bra̱l kraih, tui anŭn lu dêh čar anŭn či pơpư̆ pơgơi yơh; Ơi Adai pơhiăp trŭn kar hăng dơnai grŏm laih anŭn lŏn tơnah săn ƀlĭ hĭ mơtam.

⁷Yahweh Dưi Kơtang dŏ hăng ƀing ta; Ơi Adai ƀing Yakôb yơh jing kơđông ƀing ta dŏ kơdŏp.

⁸Rai laih anŭn lăng bĕ tơlơi bruă Yahweh hơmâo ngă laih. Lăng bĕ ƀơi hơdôm tơlơi hli̱ng hla̱ng Ñu hơmâo ngă laih ƀơi lŏn tơnah.

⁹Ñu pơđŭt hĭ tơlơi pơblah wang ƀơi djŏp djang lŏn tơnah; Ñu wŏk kơjŏh hĭ khul hraŏ, pơrai hĭ khul tơbăk, laih anŭn čuh hĭ khul khiơl amăng apui.

¹⁰Ơi Adai laĭ kơ ƀing ta, “Anăm pơblah dơ̆ng tah, brơi kơ ƀing gih thâo krăn bĕ, Kâo yơh jing Ơi Adai, jing Pô ƀing mơnuih mơnam či pơpŭ pơdun đĭ amăng abih bang lŏn čar, jing Pô ƀing mơnuih mơnam či pơpŭ pơdun đĭ amăng abih bang lŏn tơnah yơh.”

¹¹Yahweh Dưi Kơtang dŏ hăng ƀing ta; Ơi Adai ƀing Yakôb yơh jing kơđông ƀing ta dŏ kơdŏp.