Read Jarai Adoh Bơni Hơơč 55 Bible Online

Adoh Bơni Hơơč 55 - Jarai bible

Adoh Bơni Hơơč 55

¹Kơ pô gai ayŭ. Tơlơi bơni hơơč Dawid adoh. Rơkâo kơ Ih pơđi̱ng tơngia hơmư̆ tơlơi kâo iâu laĭ bĕ, Ơ Ơi Adai hơi; anăm pơdŏp hĭ ôh ƀô̆ mơta Ih mơ̆ng tơlơi kâo kwưh!

²Hơmư̆ kâo laih anŭn laĭ glaĭ kơ kâo bĕ; tơlơi pơmĭn kâo pơrŭng hĭ kâo. Kâo ƀlơ̆ng bơngơ̆t biă mă,

³yua mơ̆ng khul tơlơi ƀing rŏh ayăt kâo pơhuĭ kâo, laih anŭn yua mơ̆ng khul tơlơi ƀing sat ƀai kâo kơtư̆ juă kâo. Ƀing gơñu pơrŭng pơrăng kâo; ƀing gơñu hil nač kơ kâo yuakơ ƀing gơñu khŏn ngă sat kơ kâo.

⁴Pran jua kâo bơngơ̆t bơngañ biă mă yơh, laih anŭn tơlơi huĭ bra̱l tơlơi djai pơruă hĭ kâo.

⁵Tơlơi huĭ hyưt hăng tơlơi tơtư̆ tơtơ̆ng hơñăk mă kâo; laih anŭn tơlơi huĭ sat go̱m mă hĭ kâo.

⁶Kâo pơhiăp hăng kâo pô, “Kâo pơmĭn kiăng kâo hơmâo čăng hrup hăng čim pơrơgŏm! Tui anŭn, kâo či pŏr đuaĭ hĭ kiăng hơduah anih pơdơi.

⁷Kâo či pŏr đuaĭ hĭ ataih yơh laih anŭn pơkra anih kâo dŏ amăng tơdron ha̱r.

⁸Kâo či ječ ameč hơduah sem kơ kâo pô sa anih dŏ kơđap mơ̆ng angĭn rơbŭ kơthel laih anŭn mơ̆ng angĭn hơkruăh.”

⁹Ơ Khua Yang hơi, rơkâo kơ Ih pơrŭng pơlŭk lăk hĭ bĕ tơlơi pơhiăp ƀing rŏh ayăt kâo, yuakơ kâo ƀuh tơlơi ƀrưh mơhiăh hăng tơlơi pơrŭng pơrăng amăng plei prŏng.

¹⁰Ƀing sat anŭn wang dar ƀơi pơnăng plei anŭn hrơi hăng mlam, pơbă hĭ amăng plei anŭn hăng tơlơi sat laih anŭn tơlơi jăm juă.

¹¹Hơmâo tơlơi ƀrưh ƀai amăng djŏp anih; khul jơlan plei anŭn bă hăng tơlơi kơtư̆ juă laih anŭn tơlơi plư pleč.

¹²Tơdah anŭn jing tơlơi rŏh ayăt kâo klao djik kơ kâo, kâo ăt dưi dŏ kơjăp mơ̆n; tơdah anŭn jing pô pơrơmut kâo tơgŭ pơkơdơ̆ng glaĭ hăng kâo, kâo pô dưi pơpĕ đuaĭ hĭ mơ̆ng ñu yơh.

¹³Samơ̆ tơlơi kâo rŭng răng anŭn jing yua mơ̆ng ih yơh, jing mơnuih hrup hăng kâo pô, jing gŏp kâo laih anŭn jing gơyut gơyâo jĕ hăng kâo.

¹⁴Hlâo adih ƀing ta hơmâo pơgop pơlir jĕ giăm hrŏm hơbĭt laih hăng tơdruă laih anŭn ăt kơkuh pơpŭ hrŏm hơbĭt amăng Sang Yang Ơi Adai mơ̆n.

¹⁵Brơi bĕ kơ ƀing rŏh ayăt kâo tŏ tơnŏ djai hĭ mơtam; brơi bĕ ƀing gơñu trŭn nao pơ anih ƀing djai Seôl! Tơlơi sat ƀai dŏ amăng sang gơñu laih anŭn amăng pran jua gơñu.

¹⁶Samơ̆ kâo iâu kwưh đĭ Yahweh kơ tơlơi djru, laih anŭn Ñu jing Ơi Adai či pơklaih hĭ kâo.

¹⁷Mơguah, hrơi dơ̆ng laih anŭn mơmŏt kâo brŏk ƀuăh hăng kwưh pơkrao pơ Ñu, laih anŭn Ñu hơmư̆ hiăp kâo yơh.

¹⁸Ñu či ba kâo glaĭ rơnŭk rơnua mơ̆ng tơlơi ƀing pơblah pơkơdơ̆ng glaĭ hăng kâo, wơ̆t tơdah ƀing pơkơdơ̆ng glaĭ hăng kâo anŭn jing lu biă mă.

¹⁹Ơi Adai yơh, jing Pô dŏ git gai wai lăng nanao čơdơ̆ng mơ̆ng hlŏng lar, či hơmư̆ kâo laih anŭn pơrai hĭ ƀing rŏh kâo anŭn; yuakơ ƀing gơñu hơngah hĭ ƀu kiăng pơplih ôh hơdră jơlan sat gơñu, laih anŭn dơ̆ng ƀing gơñu ƀu huĭ pơpŭ kơ Ơi Adai ôh.

²⁰Gơyut kâo kơsung blah hĭ ƀing gŏp djru ñu; tui anŭn ñu pơrai hĭ laih hơdôm tơlơi ñu ƀuăn.

²¹Khul tơlơi pơhiăp ñu tơbơr hloh kơ ia rơmuă tơsâo. samơ̆ hơmâo tơlơi pơrơmut amăng pran jua ñu; khul boh hiăp ñu rơmuăn hloh kơ ia rơmuă ôliwơ, samơ̆ boh hiăp ñu anŭn khăt kar hăng khul đao tơma.

²²Jao bĕ khul tơlơi rŭng răng ih kơ Yahweh, tui anŭn Ñu či gŭm djru ih yơh; Ñu ƀu či lui hĭ ƀing mơnuih tŏng ten hăng Ñu kơdŭn đuaĭ hĭ ôh.

²³Samơ̆ Ih yơh, Ơ Ơi Adai ăh, či brơi ƀing sat ƀai trŭn nao pơ pơsat brŭ răm gơñu; ƀing ngă tuh drah mơnuih wơ̆t hăng ƀing pơƀlŏr či rơngiă hĭ hlâo kơ sămkrah rơnŭk hơdip gơñu rơgao hĭ. Bơ kơ kâo, kâo či đaŏ kơnang amăng Ih yơh.