Read Jarai Adoh Bơni Hơơč 57 Bible Online

Adoh Bơni Hơơč 57 - Jarai bible

Adoh Bơni Hơơč 57

¹Kơ pô gai ayŭ. Tơlơi bơni hơơč Dawid adoh tui hăng dơnai ayŭ “Anăm Pơrai Hĭ Ôh” tơdang ñu hơmâo đuaĭ kơdŏp hĭ laih mơ̆ng pơtao Saul amăng pa̱r čư̆. Pap mơñai kơ kâo đa, Ơ Ơi Adai hơi, pap kơ kâo bĕ, yuakơ kâo rai pơ ih kiăng kơ pran jua kâo hơmâo tơlơi dŏ kơđap. Gah yŭ čăng tơu Ih yơh kâo hơduah ƀuh tơlơi kơđap pơgang tơl tơlơi răm rai prŏng anŭn rơgao hĭ.

²Kâo iâu kwưh pơ Ơi Adai, jing Pô Glông Hloh, pơ Ơi Adai yơh jing Pô pha brơi kơ kâo djŏp mơta tơlơi kâo kơƀah kiăng.

³Ñu či mơit rai tơlơi djru mơ̆ng adai adih kiăng kơ pơklaih hĭ kâo; Ñu či pơrai hĭ ƀing kơtư̆ juă kâo. Ơi Adai či pơrơđah kơ kâo tơlơi khăp hiam klă Ñu laih anŭn tơlơi tŏng ten Ñu.

⁴Ƀing rŏh ayăt wang dar kâo hrup hăng khul rơmung dŭl mơhao hek ƀơ̆ng mơnuih. Tơgơi gơñu hrup hăng khul tơbăk laih anŭn khul ƀrŏm hraŏ; jơlah gơñu hrup hăng khul đao tơma yơh.

⁵Pơrơđah bĕ tơlơi prŏng prin Ih amăng adai rơngit adih, Ơ Ơi Adai hơi, laih anŭn bang bĕ tơlơi ang yang Ih gah ngŏ kơ abih lŏn tơnah anai.

⁶Ƀing rŏh ayăt hơmâo dưm laih čơđo̱ng kiăng kơ mă kâo; tui anŭn jua pơmĭn kâo bă hăng tơlơi rŭng răng. Ƀing gơñu klơi amăng luh ƀač ƀơi jơlan kâo, samơ̆ gơñu pô yơh lê̆ hĭ laih amăng anŭn.

⁷Jua bơngăt kâo dŏ hơđơ̆ng hlo̱m ƀo̱m laih, Ơ Ơi Adai ăh, jua bơngăt kâo dŏ hơđơ̆ng hlo̱m ƀo̱m laih! Kâo či yua ayŭ kiăng kơ adoh bơni hơơč kơ Ih hăng abih jua bơngăt kâo yơh!

⁸Kâo či mơdưh kiăng kơ adoh yơh! Kâo či mơdưh kiăng kơ pĕ go̱ng trưng laih anŭn go̱ng trap kâo yơh! Kâo či mơdưh hlâo kơ yang hrơi ƀlĕ yơh.

⁹Kâo či bơni hơơč kơ Ih tŏng krah ƀing mơnuih mơnam yơh, Ơ Khua Yang ăh. Kâo či bơni hơơč kơ Ih tŏng krah ƀing lŏn čar yơh.

¹⁰Tơlơi khăp hiam klă Ih prŏng prin truh pơ adai adih, laih anŭn tơlơi tŏng ten Ih kơjăp truh pơ adai rơngit yơh.

¹¹Pơrơđah bĕ tơlơi yom pơphan Ih amăng adai adih, Ơ Ơi Adai hơi, laih anŭn bang bĕ tơlơi ang yang Ih kơ abih bang lŏn tơnah anai.