Read Jarai Adoh Bơni Hơơč 6 Bible Online

Adoh Bơni Hơơč 6 - Jarai bible

Adoh Bơni Hơơč 6

¹Kơ pô gai ayŭ. Tơlơi bơni hơơč Dawid kiăng kơ adoh hăng go̱ng. Ơ Yahweh anăm ƀuăh pơkra kâo tơdang Ih hil ôh, anăm pơkơhma̱l hĭ kâo tơdang Ih nač ôh.[10]

²Pap khăp kơ kâo bĕ, Ơ Yahweh ăh, yuakơ kâo tơdu rơmơ̆n đơi; pha brơi kơ kâo tơlơi kơtang bĕ, yuakơ kâo gleh rơmơ̆n biă mă.

³Bơngăt jua kâo ăt rŭng răng biă mă. Ơ Yahweh, hơbĭn sui Ih ăt dŏ pơtrưĭ ƀu kiăng djru kơ kâo ôh lĕ?

⁴Rai pơklaih kâo bĕ, Ơ Yahweh hơi; hăng tơlơi khăp hiam klă Ih yơh rơkâo Ih anăm brơi ôh arăng pơdjai hĭ kâo.

⁵Ƀu hơmâo hlơi pô ôh dưi djă̱ hơdơr kơ Ih tơdơi kơ ñu djai laih; ƀu hơmâo hlơi pô ôh bơni hơơč kơ Ih amăng Seôl jing anih hlung dơlăm ƀing djai anŭn.

⁶Kâo tơdu rơmơ̆n nanao yơh mơ̆ng tơlơi kơŭ kơuăn; rĭm mlam anih pĭt kâo mơsăh yuakơ kâo hia, laih anŭn sưng pĭt kâo bă hăng ia mơta yơh.

⁷Mơta kâo rơgah rơgañ yuakơ rơngot hơning, tơdu ƀu rơđah yuakơ abih bang tơlơi ƀing rŏh ayăt kâo yơh ngă.

⁸Đuaĭ ataih bĕ mơ̆ng kâo, Ơ abih bang ƀing ngă tơlơi jŭ̱ sat, yuakơ Yahweh hơmư̆ laih hiăp kâo čŏk hia.[11]

⁹Yahweh hơmư̆ tơlơi kâo iâu kwưh kơ tơlơi djru, laih anŭn Ñu či mă tŭ hơdôm tơlơi kâo iâu laĭ yơh.

¹⁰Abih bang ƀing rŏh ayăt kâo Ơi Adai či pơmlâo hĭ yơh; amăng tơlơi rŭng răng blĭp blăp yơh ƀing gơñu či kơdŭn đuaĭ hĭ mlâo biă mă yơh.