Read Jarai Adoh Bơni Hơơč 64 Bible Online

Adoh Bơni Hơơč 64 - Jarai bible

Adoh Bơni Hơơč 64

¹Kơ pô gai ayŭ. Tơlơi bơni hơơč Dawid adoh. Ơ Ơi Adai hơi, hơmư̆ bĕ tơlơi kâo brŏk ƀuăh! Kâo huĭ biă mă kơ ƀing rŏh ayăt kâo, tui anŭn pơklaih hĭ tơlơi hơdip kâo bĕ!

²Pơgang bĕ kâo mơ̆ng khul hơdră mơneč hơgŏm ƀing sat ƀai, laih anŭn mơ̆ng tơpul mơnuih lu sat ƀai anŭn.

³Ƀing gơñu săh jơlah gơñu hrup hăng săh đao gưm, laih anŭn gle̱ng khul boh hiăp gơñu pơruă kar hăng gle̱ng ƀrŏm hraŏ yơh.

⁴Ƀing gơñu ječ ameč pơnăh ƀing tơpă hơnơ̆ng mơ̆ng anih dŏ krăp gơñu; ƀing gơñu pơnăh hĭ ƀing gơ̆ blĭp blăp ƀu thâo huĭ hyưt ôh.

⁵Ƀing gơñu pơtrŭt tơdruă gơñu amăng khul hơdră mơneč sat ƀai gơñu; ƀing gơñu pơlaĭ pơ anih pă ƀing gơñu či ƀač lui čơđo̱ng gơñu hơgŏm. Ƀing gơñu laĭ tui anai, “Ƀu hơmâo hlơi pô ƀuh ƀing ta ƀač čơđo̱ng anŭn ôh.”

⁶Ƀing gơñu pơkra hơdră sat ƀai laih anŭn laĭ tui anai, “Ƀing ta hơmâo pơkra hlo̱m ƀo̱m laih hơdră mơneč sat ƀai.” Sĭt yơh pran jua laih anŭn tơlơi pơmĭn mơnuih hơmâo mơneč dơlăm hơgŏm.

⁷Samơ̆ Ơi Adai či pơnăh khul ƀrŏm Ñu ƀơi ƀing gơñu, laih anŭn blĭp blăp ƀing gơñu či rơka ruă hĭ yơh.

⁸Ơi Adai či pơrai hĭ ƀing gơñu yua mơ̆ng hơdôm boh hiăp sat mơ̆ng jơlah gơñu anŭn; abih bang mơnuih ƀuh ƀing gơñu, či tơtăh hĭ akŏ gơñu yơh.

⁹Tui anŭn, abih bang mơnuih mơnam či huĭ hyưt yơh; ƀing gơñu či hơđơ̆ng pơmĭn kơ hơget tơlơi Ơi Adai hơmâo ngă laih, laih anŭn ruai pơhaih kơ khul bruă Ñu anŭn yơh.

¹⁰Brơi bĕ abih bang ƀing mơnuih tơpă hơnơ̆ng hơ̆k mơak yuakơ hơdôm tơlơi Yahweh hơmâo ngă laih. Brơi bĕ ƀing gơñu dŏ kơđap amăng Ñu; laih anŭn brơi bĕ abih bang ƀing mơnuih hiam klă hơ̆k kơdơ̆k.