Read Jarai Adoh Bơni Hơơč 72 Bible Online

Adoh Bơni Hơơč 72 - Jarai bible

Adoh Bơni Hơơč 72

¹Tơlơi bơni hơơč pơtao Solomôn adoh. Pơtô bĕ kơ pơtao gơmơi kiăng phat kơđi hăng tơlơi tơpă hơnơ̆ng Ih, Ơ Ơi Adai hơi; pha brơi bĕ tơlơi djơ̆ tơpă Ih kơ gơ̆ jing ană pơtao.

²Tui anŭn, ñu či git gai wai lăng ană plei Ih hăng tơlơi djơ̆ tơpă; hăng tơlơi tơpă hơnơ̆ng yơh ñu či git gai djru ƀing ƀun rin jing ƀing arăng kơtư̆ juă.

³Brơi bĕ abih anih lŏn jing khul čư̆ čan pơtơbiă rai gơnam tăm bă blai; laih anŭn brơi bĕ khul bŏl čư̆ pơtơbiă rai lu bơyan pĕ hơpuă yuakơ tơlơi tơpă hơnơ̆ng pơtao.

⁴Brơi bĕ kơ pơtao gơmơi phat kơđi brơi kơ mơnuih ƀun rin anŭn găl djơ̆; brơi bĕ kơ ñu thâo djru ƀing mơnuih kơƀah kơƀap laih anŭn pơrai hĭ ƀing mơnuih kơtư̆ juă ƀing gơ̆.

⁵Brơi bĕ kơ ană plei Ih kơkuh pơpŭ kơ Ih nanao kar hăng hrơi yang hrơi ăt dŏ pơčrang nanao, laih anŭn kar hăng yang blan brơi tơlơi bơngač nanao, truh kơ khul rơnŭk pơanăp yơh.

⁶Brơi bĕ kơ pơtao gơmơi jing kar hăng ia hơjan lê̆ ƀơi khul đang hơma thu krô, hrup hăng ia hơjan pruih ƀơi anih lŏn gơmơi anai yơh.

⁷Brơi bĕ tơlơi tơpă hơnơ̆ng đĭ kơyar amăng rơnŭk ñu jing pơtao laih anŭn tơlơi rơnŭk rơnua dưi đĭ kơyar nanao kar hăng yang blan ăt dŏ brơi tơlơi bơngač nanao yơh.

⁸Brơi bĕ tơlơi git gai wai lăng ñu či lar čơdơ̆ng mơ̆ng ia rơsĭ gah anai truh pơ ia rơsĭ gah adih, laih anŭn čơdơ̆ng mơ̆ng krong Huphrat hlŏng truh pơ rơnuč lŏn tơnah yơh.[81]

⁹Brơi bĕ ƀing kơnung djuai amăng tơdron ha̱r prŏng či bon kơkuh ƀơi anăp ñu; brơi bĕ ƀing rŏh ayăt anŭn, jing ƀing ñu blah juă laih, či bon rơbuh gơñu pô ƀơi lŏn mơ̆n.

¹⁰Brơi bĕ kơ pơtao Tarsis laih anŭn ƀing pơtao khul čar plao ia či ba rai kơ ñu khul gơnam brơi pơyơr; laih anŭn ƀing pơtao Čheba hăng Seba[82] či ba gơnam pơyơr kơ ñu yơh.

¹¹Brơi bĕ kơ abih bang ƀing pơtao či bon kơkuh ƀơi anăp ñu, laih anŭn abih bang ƀing ană plei gơñu mă bruă kơ ñu yơh.

¹²Ñu či pơklaih hĭ ƀing kơƀah kơƀap jing ƀing iâu kwưh đĭ kơ ñu, wơ̆t hăng ƀing mơnuih arăng kơtư̆ juă laih anŭn ƀu hơmâo hlơi pô djru ƀing gơ̆ ôh.

¹³Ñu či hơmâo tơlơi pap mơñai kơ ƀing tơdu laih anŭn kơƀah kơƀap; ñu či pơklaih hĭ tơlơi hơdip ƀing mơnuih kơƀah kơƀap anŭn yơh.

¹⁴Ñu či pơklaih hĭ ƀing gơ̆ mơ̆ng tơlơi arăng kơtư̆ juă hăng ƀrưh mơhiăh, yuakơ tơlơi hơdip ƀing gơ̆ jing yom pơphan yơh ƀơi anăp ñu.

¹⁵Kwưh kiăng kơ pơtao gơmơi hơdip sui! Brơi bĕ kơ ƀing čar Čheba ba rai mah kơ ñu; brơi bĕ kơ ƀing ană plei iâu laĭ brơi kơ ñu nanao, laih anŭn rơkâo kơ Ih bơni hiam kơ ñu nanao!

¹⁶Brơi hơmâo bĕ pơdai bă blai amăng abih bang anih lŏn gơmơi, wơ̆t tơdah ƀơi khul kơčŏng čư̆ mơ̆n, kar hăng ƀơi khul čư̆ čan amăng anih lŏn Lebanôn. Brơi bĕ khul plei pla gơmơi bă kơ mơnuih, kar hăng khul rơ̆k čăt bă amăng tơdron.

¹⁷Brơi bĕ kơ anăn pơtao gơmơi dŏ nanao hlŏng lar; brơi bĕ tơlơi hing ang kơ anăn ñu lar hyu nanao kar hăng yang hrơi pơčrang nanao. Brơi bĕ abih bang lŏn čar tŭ mă tơlơi bơni hiam mơ̆ng Ih kar hăng pơtao gơmơi mă tŭ laih tơlơi bơni hiam mơ̆ng Ih.

¹⁸Bơni hiam kơ Yahweh Ơi Adai, jing Ơi Adai ƀing Israel! Kơnơ̆ng hơjăn Ñu đôč yơh dưi ngă abih tơlơi bruă yom pơphan anŭn.

¹⁹Bơni hiam kơ anăn ang yang Ñu hlŏng lar! Brơi bĕ tơlơi ang yang Ñu pơbă djŏp djang amăng lŏn tơnah anai. Amen! Amen!

²⁰Anai yơh jing tơlơi hơnăl tuč kơ tơlơi Dawid iâu laĭ; ñu jing ană đah rơkơi Yisai.