Read Jarai Adoh Bơni Hơơč 73 Bible Online

Adoh Bơni Hơơč 73 - Jarai bible

Adoh Bơni Hơơč 73

¹Tơlơi bơni hơơč Asap adoh. Sĭt yơh Ơi Adai jing hiam klă hăng ƀing Israel; Ñu jing hiam klă kơ ƀing hlơi pô hơmâo pran jua jơngeh agaih.

²Samơ̆ bơ kơ kâo, kâo jĕ či rơngiă hĭ tơlơi kơjăp hơđơ̆ng laih anŭn tơlơi đaŏ kơnang kâo kar hăng tơkai kâo tơbơr rơbuh hĭ yơh,

³yuakơ kâo pơiăng hăng ƀing mơnuih pơgao ang yơh tơdang kâo ƀuh tơlơi ƀing gơñu jơna̱p mơak wơ̆t tơdah ƀing gơñu jing sat ƀai.

⁴Ƀing sat ƀai anŭn ƀu ruă nuă ôh; ƀing gơñu kơtang laih anŭn hiam drơi jan.

⁵Ƀing gơñu ƀu hơmâo ôh tơlơi tơnap tap kar hăng arăng juăt hơmâo; ƀing gơñu kŏn hơmâo tơlơi rŭng răng hrup hăng mơnuih pơkŏn lơi.

⁶Tui anŭn, ƀing gơñu băk tơlơi pơgao ang gơñu kar hăng băk añŭ ƀơi tơkuai laih anŭn buh hơô tơlơi ƀrưh mơhiăh gơñu kar hăng buh sa blah ao phyung kiăng kơ arăng dưi ƀuh.

⁷Pran jua kơpĭl gơñu pơčeh rai tơlơi sat ƀai, laih anŭn jua pơmĭn khăng gơñu bŏ hrŏ hăng bruă sat ƀai.

⁸Ƀing gơñu klao djik laih anŭn pơhiăp khul tơlơi jŭ̱ sat kơ ƀing arăng; ƀing gơñu prap pre hơdră kiăng kơtư̆ juă ƀing arăng hăng tơlơi pơgao ang.

⁹Amăng bah gơñu pơhiăp mơhiăh kơ Ơi Adai pơ adai adih laih anŭn jơlah gơñu pơư pơang gơñu pô ƀơi lŏn tơnah anai.

¹⁰Hơnŭn yơh, wơ̆t hăng ƀing ană plei Ơi Adai mơ̆n wir nao pơ ƀing gơñu laih anŭn hơmư̆ tui hơget tơlơi ƀing gơñu pơhiăp kar hăng ƀing mơhao ia mơñum ia yơh.

¹¹Ƀing sat ƀai anŭn laĭ tui anai, “Ơi Adai ƀu dưi thâo krăn ôh, Pô Glông Hloh anŭn ƀu či hơduah ƀuh ôh.”

¹²Hrup hăng anŭn yơh ƀing mơnuih sat ƀai jing. Ƀing gơñu ƀu hơmâo tơlơi ƀlơ̆ng bơngơ̆t ôh samơ̆ ăt nanao mă thim mŭk dram dơ̆ng.

¹³Tui anŭn, tơlơi kâo hơmâo răk wai laih pran jua kâo pô agaih laih anŭn ƀu ngă soh ôh, laih anŭn kâo răk pioh tơngan kâo ƀu ngă soh ôh; tơlơi anŭn kơnơ̆ng jing hĭ đôč đač đôč hă?

¹⁴Ơi Adai brơi kơ kâo ruă nuă nanao amăng rĭm hrơi; laih anŭn Ñu ăt pơkơhma̱l hĭ laih kâo mơ̆n amăng rĭm mơguah.

¹⁵Tơdah kâo pô hơmâo pơhiăp laih kơ tơlơi Ơi Adai ƀu dưi thâo krăn ôh, sĭt kâo ƀu tŏng ten hăng ƀing ană plei Ñu ôh.

¹⁶Kâo gir kiăng thâo hluh abih bang tơlơi truh tơnap anŭn, samơ̆ tơlơi anŭn jing tơnap đơi kơ kâo thâo hluh,

¹⁷tơl kâo mŭt nao amăng Sang Yang Ơi Adai. Giŏng anŭn, kâo thâo hluh yơh hơget tơlơi či truh kơ ƀing sat ƀai pơanăp.

¹⁸Ơ Ơi Adai ăh, sĭt Ih či pioh ƀing gơñu ƀơi jơlan tơbơr laih anŭn plĕ ƀing gơñu lê̆ amăng tơlơi răm rai yơh!

¹⁹Ƀing gơñu či răm rai hĭ tañ mơtam, laih anŭn trŭn nao pơ anih pơsat hăng tơlơi đŭt huĭ sat biă mă yơh!

²⁰Ơ Khua Yang hơi, tơdang Ih pô tơgŭ đĭ kiăng kơ rai djru kâo ƀing sat ƀai anŭn či rơngiă hĭ thĕng mơ̆ng tơlơi pơmĭn Ih yơh; ƀing gơñu či jing kar hăng tơlơi rơpơi sat rơngiă hĭ tơdang mơdưh mơguah yơh;

²¹Hlak tơlơi jua pơmĭn kâo jing hĭ ruă phĭ̱ laih anŭn pran jua kâo tơnap rŭng,

²²kâo ƀu thâo hluh Ih ôh; ƀơi anăp Ih jing hĭ mlŭk mơgu kar hăng sa drơi hlô mơnơ̆ng.

²³Wơ̆t tơdah tui anŭn kâo ăt dŏ jĕ hăng Ih nanao mơ̆n laih anŭn Ih pơpŭ kơ kâo yơh tơdang Ih djă̱ ƀơi tơngan hơnuă kâo.

²⁴Ih dui ba kâo hăng tơlơi Ih djru pơmĭn, laih anŭn tơl hơnăl tuč Ih či tŭ mă kâo hăng tơlơi pơpŭ pơyom.

²⁵Amăng adai adih, rơngiao kơ Ih hlơi pô pơkŏn kâo hơmâo kiăng kơ djru kơ kâo dơ̆ng lĕ? Yuakơ kâo hơmâo Ih laih, kâo ƀu kiăng hơmâo hơget tơlơi pơkŏn dơ̆ng tah ƀơi lŏn tơnah anai.

²⁶Wơ̆t tơdah jua pơmĭn kâo laih anŭn drơi jan kâo năng ai či tơdu tui, Ơi Adai yơh jing tơlơi kơtang kơ pran jua kâo nanao kar hăng pơtâo prŏng; laih anŭn Ñu yơh jing abih bang tơlơi kâo kơƀah kiăng hlŏng lar.

²⁷Ơ Ơi Adai ăh, ƀing hlơi pô đuaĭ ataih hĭ mơ̆ng Ih, sĭt ƀing gơñu či răm rai hĭ yơh; Ih pơrai hĭ abih bang ƀing hlơi pô ƀu dŏ tŏng ten hăng Ih.

²⁸Samơ̆ bơ kơ kâo, yom pơphan biă mă yơh kâo dưi dŏ jĕ Ih, Ơ Ơi Adai ăh, kâo rai pơ Ih kiăng kơ Ih Pô pơgang kâo, Ơ Khua Yang Yahweh hơi, kâo či pơhaih abih bang tơlơi Ih hơmâo ngă laih.