Read Jarai Adoh Bơni Hơơč 82 Bible Online

Adoh Bơni Hơơč 82 - Jarai bible

Adoh Bơni Hơơč 82

¹Tơlơi bơni hơơč Asap adoh. Ơi Adai git gai tơlơi pơjơnum amăng adai adih; Ñu phat kơđi tŏng krah amăng ƀing ling jang grơ̆ng glăm brơi khul lŏn čar tui anai,

²“Ƀing gih anăm phat kơđi tơlơi ƀu tơpă hiam dơ̆ng tah; laih anŭn ƀing gih anăm phat kơđi glông be̱r hiam brơi kơ ƀing sat ƀai dơ̆ng tah!

³Pơgang brơi bĕ kơđi tơpă hiam kơ ƀing mơnuih arăng kơtư̆ juă laih anŭn kơ ƀing ană tơhrit tơhruai, laih anŭn ngă tơlơi djơ̆ găl bĕ kơ ƀing kơƀah kơƀap laih anŭn kơ ƀing ƀu hơmâo mơnuih djru.

⁴Pơklaih hĭ bĕ ƀing mơnuih arăng kơtư̆ juă hăng ƀing kơƀah kơƀap; pơklaih hĭ bĕ ƀing gơñu mơ̆ng tơngan tơlơi dưi ƀing mơnuih sat ƀai.

⁵“Mlŭk mơgu biă mă yơh ƀing gih anai! Ƀing gih ƀu thâo phe pho hơget gĕt ôh! Ƀing gih rơbat amăng tơlơi kơnăm mơmŏt tơlơi soh; tui anŭn tơlơi tơpă hiam rơngiă hĭ thĕng laih mơ̆ng djŏp djang lŏn tơnah anai.

⁶Kâo laĭ kơ ƀing gơñu tui anai, ‘Ƀing gih jing ƀing ling jang, Kâo hrih pơjing abih bang ƀing gih jing ƀing ană Pô Glông Hloh.’[116]

⁷Samơ̆ ƀing gih či djai hĭ kar hăng mơnuih mơnam; tơlơi hơdip ƀing gih či đŭt kar hăng abih bang ƀing khua ba akŏ ƀơi lŏn tơnah mơ̆n.”

⁸Tơgŭ bĕ, Ơ Ơi Adai ăh, git gai wai lăng bĕ lŏn tơnah, abih bang ƀing lŏn čar jing lŏm kơ Ih yơh.