Read Jarai Adoh Bơni Hơơč 86 Bible Online

Adoh Bơni Hơơč 86 - Jarai bible

Adoh Bơni Hơơč 86

¹Tơlơi pơtao Dawid iâu laĭ. Pơđi̱ng tơngia hơmư̆ kâo bĕ, Ơ Yahweh hơi, laĭ glaĭ kơ kâo bĕ, yuakơ arăng kơtư̆ juă kâo laih anŭn kâo kiăng kơ tơlơi djru.

²Pơklaih bĕ kâo mơ̆ng tơlơi djai, yuakơ kâo dŏ tŏng ten hăng Ih; Ơ Ơi Adai kâo hơi, pơklaih hĭ bĕ kâo ding kơna Ih anai, yuakơ kâo đaŏ kơnang amăng Ih.

³Ơ Khua Yang hơi, pap mơñai kơ kâo đa, yuakơ kâo iâu laĭ kơ Ih ƀu pơdơi ôh.

⁴Brơi bĕ kơ kâo ding kơna Ih anai mơak, yuakơ hơdôm tơlơi kâo iâu laĭ đĭ nao pơ Ih yơh, Ơ Khua Yang ăh.

⁵Ih jing Pô hiam klă laih anŭn pap brơi kơ ƀing gơmơi, laih anŭn bă hăng tơlơi khăp hiam klă kơ ƀing hlơi pô iâu đĭ kơ Ih.

⁶Ơ Yahweh hơi, pơđi̱ng hơmư̆ bĕ tơlơi kâo iâu laĭ; hơmư̆ bĕ tơlơi kâo kwưh iâu kơ tơlơi pap drap.

⁷Kâo iâu kwưh Ih amăng hrơi mông kâo rŭng răng, yuakơ Ih juăt laĭ glaĭ kơ tơlơi kâo iâu laĭ.

⁸Ƀu hơmâo yang rơba̱ng pă ôh dưi mơyang hrup hăng Ih, Ơ Khua Yang ăh, laih anŭn ƀu hơmâo hlơi pô ôh dưi ngă tơlơi mơyang kar hăng Ih hơmâo ngă laih.

⁹Ih hơmâo pơjing rai laih abih bang lŏn čar, laih anŭn ƀing lŏn čar anŭn či rai bon kơkuh kơ Ih yơh; ƀing gơñu či pơư pơang anăn Ih yơh.[120]

¹⁰Ih yơh jing Pô prŏng prin dưi ngă lu tơlơi yom pơphan; kơnơ̆ng hơjăn Ih yơh jing Ơi Adai.

¹¹Ơ Yahweh hơi, pơtô bĕ kơ kâo jơlan Ih kiăng kơ kâo đuaĭ tui, kiăng kơ kâo rơbat tui tơlơi sĭt Ih yơh; pha brơi bĕ kơ kâo pran jua hlo̱m ƀo̱m, kiăng kơ kâo huĭ pơpŭ kơ anăn Ih yơh.

¹²Kâo či bơni hơơč kơ Ih hăng abih pran jua kâo, Ơ Khua Yang Ơi Adai kâo hơi, laih anŭn kâo či pơư pơang anăn Ih hlŏng lar yơh,

¹³yuakơ tơlơi khăp hiam klă Ih kơ kâo jing prŏng biă mă yơh! Ih hơmâo pơklaih hĭ laih kâo tơdang kâo jĕ či nao pơ anih ƀing djai Seôl.

¹⁴Ơ Ơi Adai hơi, ƀing mơnuih pơgao pơang hlak pơkơdơ̆ng glaĭ hăng kâo; sa grup ƀing ƀrưh mơhiăh hlak gir kiăng pơdjai hĭ kâo; ƀing gơñu jing ƀing yap kơ Ih jing Pô ƀu yom pơphan ôh.

¹⁵Samơ̆ Ih yơh, Ơ Khua Yang hơi, jing Ơi Adai thâo glưh pran jua hăng thâo khăp pap, akaih hil nač, bă hăng tơlơi khăp hiam klă laih anŭn tơlơi tŏng ten nanao.

¹⁶Wơ̆t glaĭ pơ kâo bĕ laih anŭn pap mơñai kơ kâo đa; pơkơtang brơi bĕ kâo ding kơna Ih anai, laih anŭn pơklaih kâo bĕ yuakơ kâo mă bruă tŏng ten kơ Ih kar hăng amĭ kâo hơmâo ngă laih.

¹⁷Pơdah bĕ kơ kâo gru pơsĭt kơ tơlơi hiam klă Ih, tui anŭn kiăng kơ hơdôm ƀing pơrơmut kơ kâo či mlâo hĭ tơdang ƀing gơñu thâo krăn Ih yơh, Ơ Yahweh ăh, hơmâo djru laih anŭn pơjuh alum laih kơ kâo.