Read Jarai Adoh Bơni Hơơč 88 Bible Online

Adoh Bơni Hơơč 88 - Jarai bible

Adoh Bơni Hơơč 88

¹Kơ pô gai ayŭ. Tơlơi adoh bơni hơơč ƀing ană tơčô Kôrah adoh tui hăng dơnai ayŭ kơ tơlơi “Tơlơi Ƀing Gleh Tơnap Tŭ Ruă Nuă.” Tơlơi adoh bơni hơơč Heman, kơnung djuai Ezra, adoh. Ơ Yahweh Ơi Adai, jing Pô pơklaih kâo hơi, hrơi hăng mlam kâo iâu kwưh ƀơi anăp Ih.

²Pơđi̱ng tơngia hơmư̆ bĕ tơlơi kâo iâu laĭ, laih anŭn pơđi̱ng hơmư̆ bĕ tơlơi kâo iâu kwưh kơ tơlơi djru!

³Hơmư̆ bĕ kâo yuakơ hơmâo lu tơlơi rŭng răng biă mă truh ƀơi pran jua kâo tơl tơlơi hơdip kâo jĕ či rơngiă hĭ yơh.

⁴Arăng ăt yap kâo hrup hăng ƀing mơnuih pơkŏn mơ̆n trŭn nao laih pơ anih ƀing djai, laih anŭn kâo jing kar hăng pô kơtang hơmâo rơngiă hĭ laih abih bang tơlơi kơtang.

⁵Arăng ăt hơmâo lui raih hĭ laih kâo hrŏm hăng ƀing mơnuih djai; kar hăng ƀing mơnuih arăng pơdjai hăng pơđih lui hĭ amăng pơsat, jing ƀing Ih hơmâo ngă amơ̱ng hĭ laih abih bang yơh, jing ƀing mơnuih tơngan Ih ƀu răk wai dơ̆ng tah.

⁶Ih yơh hơmâo plĕ hĭ laih kâo mŭt amăng hlung dơlăm anih ƀing djai, amăng hlung dơlăm kơnăm mơmŏt biă mă anŭn.

⁷Tơlơi hil đet Ih pơkơtraŏ ƀơi kâo, tơl Ih pơphač hĭ kâo kar hăng gah yŭ jua ia rơsĭ yơh.

⁸Ih hơmâo ngă laih kơ ƀing gơyut kâo lui raih hĭ kâo; Ih hơmâo pơjing laih kâo jing hĭ mơnuih hơƀak drak kơ ƀing gơñu yơh. Ih krư̆ hĭ laih kâo tui anŭn kâo ƀu thâo đuaĭ tơbiă dơ̆ng tah;

⁹mơta kâo jing tơdu rơmơ̆n yơh yuakơ rơngot hơning. Ơ Yahweh ăh, rĭm hrơi kâo iâu kwưh đĭ kơ Ih laih anŭn yơr đĭ tơngan kâo kơ Ih amăng mông iâu laĭ!

¹⁰Ih ngă tơlơi mơsêh mơyang kơ ƀing djai hă? Ƀing gơñu tơgŭ đĭ bơni hơơč kơ Ih mơ̆?

¹¹Ƀing djai dưi pơhaih tơlơi khăp hiam klă Ih amăng pơsat laih anŭn tơlơi tŏng ten Ih amăng anih răm rai anŭn mơ̆?

¹²Ƀing djai dưi ƀuh tơlơi mơsêh mơyang Ih amăng anih kơnăm mơmŏt ƀôdah bruă hiam klă Ih amăng anih lŏn Ih ngă amơ̱ng anŭn mơ̆?

¹³Samơ̆, Ơ Yahweh hơi, kâo iâu kwưh Ih kơ tơlơi djru; rĭm mơguah kâo iâu laĭ pơ Ih.

¹⁴Ơ Yahweh ăh, yua hơget Ih hrah lui hĭ kâo lĕ? Yua hơget Ih pơdŏp hĭ ƀô̆ mơta Ih mơ̆ng kâo lĕ?

¹⁵Wơ̆t tơdah čơdơ̆ng mơ̆ng kâo dŏ čơđai, kâo hơmâo tŭ duăm ruă laih jĕ kơ tơlơi djai, laih anŭn kâo gleh tơnap mơ̆ng tơlơi pơhuĭ pơbra̱l Ih tơl kâo tah hơtai hĭ yơh.

¹⁶Tơlơi ƀrŭk hil Ih yơh pơphač hĭ kâo; laih anŭn tơlơi pơhuĭ pơbra̱l Ih yơh pơrăm hĭ kâo.

¹⁷Amăng abih hrơi hơdôm tơlơi tơnap tap anŭn yơh wang dar kâo kar hăng ia li̱ng, laih anŭn lip hĭ kâo hlo̱m ƀo̱m.

¹⁸Ih hơmâo ngă laih wơ̆t tơdah ƀing gơyut gơyâo hăng sang anŏ kâo ăt hrah lui hĭ kâo mơ̆n, laih anŭn kơnơ̆ng tơlơi kơnăm mơmŏt đôč yơh jing giăng mah kâo.