Read Jarai Adoh Bơni Hơơč 90 Bible Online

Adoh Bơni Hơơč 90 - Jarai bible

Adoh Bơni Hơơč 90

¹Tơlơi Môseh, ding kơna Ơi Adai, iâu laĭ Ơ Khua Yang hơi, Ih yơh jing kar hăng sang kơ ƀing gơmơi dŏ amăng abih bang rơnŭk.

²Hlâo kơ Ih hrih pơjing khul bŏl čư̆ ƀôdah pơjing rai kơyâo pơtâo mơnơ̆ng mơnuă, Ih yơh jing Ơi Adai hlŏng lar ƀu hơmâo phŭn rơjŭng ôh.

³Ih hơmâo pơjing rai laih mơnuih mơnam mơ̆ng ƀruih lŏn đưm hlâo adih laih anŭn brơi kơ gơ̆ wơ̆t glaĭ pơ ƀruih lŏn hăng laĭ tui anai, “Wơ̆t glaĭ bĕ pơ ƀruih lŏn, Ơ ƀing mơnuih mơnam.”

⁴Sa-rơbâo thŭn ƀơi anăp Ih jing kar hăng sa hrơi đôč; hơdôm thŭn anŭn jing kar hăng hrơi tơ̆m brơi phrâo rơgao đôč yơh, ƀôdah jing be̱r kar hăng kuăl mông pĭt amăng mlam yơh.[127]

⁵Ih ba pơđuaĭ hĭ ƀing gơmơi kar hăng amăng ia li̱ng; tơlơi hơdip ƀing gơmơi ƀu dŏ sui hloh kơ tơlơi rơpơi ôh. Ƀing gơmơi jing kar hăng khul rơ̆k čăt đĭ amăng mơguah;

⁶amăng mơguah anŭn, rơ̆k anŭn prŏng đĭ laih anŭn čơnŭh tơbiă bơnga, samơ̆ gliu krô hăng djai hĭ amăng hrơi klăm yơh.

⁷Ƀing gơmơi huĭ bra̱l yuakơ tơlơi hil đet Ih; ƀing gơmơi răm rai hĭ yua mơ̆ng tơlơi hil ƀrŭk Ih yơh.

⁸Ih dưm khul tơlơi soh gơmơi gah anăp Ih, wơ̆t tơdah khul tơlơi soh hơgŏm gơmơi, Ih ăt dưi ƀuh mơ̆n.

⁹Tơlơi hơdip gơmơi jing hĭ be̱r yơh yuakơ tơlơi hil Ih, laih anŭn rơngiă hĭ thĕng kar hăng asăp suă pran yơh.

¹⁰Kơnơ̆ng tơjuhpluh thŭn yơh jing abih thŭn ƀing gơmơi juăt hơdip, ƀôdah sui hloh kơnơ̆ng truh kơ sapănpluh thŭn dơ̆ anŭn yơh, tơdah ƀing gơmơi kơtang rơjăng; samơ̆ tơlơi sui anŭn kơnơ̆ng ba rai kơ ƀing gơmơi tơlơi tơnap tap bơngơ̆t bơngañ đôč yơh; khul thŭn anŭn tañ rơgao hĭ laih anŭn ƀing gơmơi đuaĭ hĭ thĕng kar hăng čim pŏr đuaĭ hĭ yơh.

¹¹Hlơi pô dưi pơmưn thâo abih tơlơi hil dưi kơtang Ih lĕ? Tơlơi hil đet Ih jing kri̱p yi̱p kar hăng tơlơi huĭ pơpŭ ƀing gơmơi năng hơmâo kơ Ih yơh.

¹²Tui anŭn, pơtô bĕ kơ ƀing gơmơi thâo krăn tơlơi hơdip gơmơi kơnơ̆ng jing be̱r đôč, kiăng kơ ƀing gơmơi dưi hơmâo tơlơi rơgơi Ih amăng jua pơmĭn gơmơi yơh.

¹³Ơ Yahweh hơi, wơ̆t glaĭ djru ƀing gơmơi bĕ. Hơbĭn sui dơ̆ng Ih ăt dŏ hil kơ ƀing gơmơi lĕ? Pap mơñai brơi bĕ kơ ƀing gơmơi ƀing ding kơna Ih anai!

¹⁴Pơhrăp bĕ ƀing gơmơi rĭm mơguah hăng tơlơi khăp hiam klă Ih, kiăng kơ ƀing gơmơi dưi adoh bơni hơ̆k mơak amăng abih hrơi ƀing gơmơi dŏ hơdip yơh.

¹⁵Lu hrơi laih Ih hơmâo pha brơi laih tơlơi rơngot hơning kơ ƀing gơmơi, laih anŭn lu thŭn laih ƀing gơmơi hơmâo tŭ mă laih tơlơi tơnap tap, tui anŭn pha brơi bĕ kơ ƀing gơmơi lu hrơi lu thŭn mơak mơai.

¹⁶Brơi bĕ kơ ƀing gơmơi, jing ƀing ding kơna Ih anai, dưi ƀuh glaĭ khul bruă kơtang mơyang Ih ngă; brơi bĕ kơ ƀing ană tơčô gơmơi dưi ƀuh tơlơi ang yang kơtang Ih.

¹⁷Ơ Khua Yang Ơi Adai gơmơi hơi, rơkâo tơlơi bơni hiam Ih dŏ bĕ hăng ƀing gơmơi, laih anŭn pha brơi bĕ kơ ƀing gơmơi dưi jing amăng abih bruă tơngan ƀing gơmơi ngă! Sĭt pơkơjăp brơi bĕ abih bang bruă tơngan gơmơi ngă dưi jing!