Read Jarai Adoh Bơni Hơơč 91 Bible Online

Adoh Bơni Hơơč 91 - Jarai bible

Adoh Bơni Hơơč 91

¹Hlơi pô nao dŏ amăng anih hơgŏm Pô Glông Hloh, pô anŭn či dŏ gah yŭ tơu tơlơi pơgang Pô Dưi Kơtang kar hăng gah yŭ tơu čăng yơh.

²Kâo či laĭ hăng Yahweh tui anai, “Ih yơh jing anih dŏ kơđap laih anŭn anih kơđông kơjăp kơ kâo. Ih yơh jing Ơi Adai kâo; amăng Ih yơh kâo đaŏ kơnang.”

³Samơ̆ kơ ană plei Ơi Adai kâo laĭ tui anai: Sĭt yơh Ơi Adai či răk wai ih rơnŭk rơnua mơ̆ng abih bang čơđo̱ng arăng ƀač, laih anŭn mơ̆ng abih bang tơlơi kli̱n khe̱ng djai brŭ yơh.

⁴Ñu či go̱m hĭ ih hăng blâo čăng Ñu kar hăng čim go̱m hĭ ană ñu; gah yŭ čăng Ñu yơh ih či hơduah ƀuh anih dŏ kơđap; tơlơi tŏng ten Ñu yơh či răng pơgang brơi kơ ih kar hăng khiơl.

⁵Ih anăm huĭ ôh tơlơi ƀing yang sat pơhuĭ pơhyưt tơdang mlam, laih anŭn anăm bra̱l lơi ƀrŏm kơsung blah blĭp blăp tơdang hrơi.

⁶Ih anăm huĭ ôh khul tơlơi kli̱n khe̱ng truh rai amăng krah mlam, laih anŭn anăm bra̱l lơi khul tơlơi răm rai pơdjai hĭ amăng yang hrơi dơ̆ng.

⁷Sa-rơbâo čô či rơbuh djai jĕ ƀơi djeo ih, sa-rơbăn čô či rơbuh djai ƀơi jum dar ih, samơ̆ tơlơi răm rai anŭn ƀu či djơ̆ kơ ih ôh.

⁸Tơdah Ih lăng hăng mơta ih pô ih či ƀuh yơh tơlơi Ơi Adai pơkơhma̱l hĭ ƀing sat ƀai.

⁹Ih hơmâo pơjing laih Pô Glông Hloh jing anih ih dŏ kơđap, laih anŭn Yahweh, jing Pô răng pơgang ih,

¹⁰tui anŭn, ƀu hơmâo tơlơi răm ruă hơget ôh či truh pơ ih, kŏn hơmâo tơlơi ƀrưh ƀai lơi či rai jĕ pơ anih ih dŏ.

¹¹Ơi Adai yơh či pơđar ƀing ling jang hiam Ñu wai lăng ih kiăng pơgang ih amăng abih jơlan ih nao.[128]

¹²Ƀing gơñu či gring djru brơi kơ ih hăng tơngan gơñu, kiăng kơ tơkai ih ƀu či tơhneč djơ̆ ôh boh pơtâo.[129]

¹³Ih či juă trom ƀơi khul rơmung dŭl kheñ đet laih anŭn ƀơi khul ala tơpơ̆ng, jing khul hlô pơkơdơ̆ng glaĭ hăng ih kiăng kơ pơdjai hĭ ih yơh.[130]

¹⁴Yahweh laĭ tui anai, “Kâo či pơklaih hĭ hlơi pô khăp kơ kâo, laih anŭn pơgang brơi kơ hlơi pô thâo krăn anăn Kâo yơh.

¹⁵Tơdang ñu iâu laĭ pơ Kâo, Kâo či laĭ glaĭ kơ ñu yơh; tơdang ñu dŏ amăng tơlơi rŭng răng, Kâo či dŏ hrŏm hăng ñu yơh. Kâo či pơrơngai hĭ ñu laih anŭn pơpŭ pơyom ñu yơh.

¹⁶Kâo či pơhrăp hĭ ñu hăng tơlơi hơdip sui, laih anŭn či pơklaih hĭ ñu yơh.”