Read Jarai Adoh Bơni Hơơč 93 Bible Online

Adoh Bơni Hơơč 93 - Jarai bible

Adoh Bơni Hơơč 93

¹Yahweh yơh jing pơtao git gai. Yahweh yơh pơhrôp tơlơi kơdrưh kơang laih anŭn buh hơô hăng tơlơi kơtang mơyang. Lŏn tơnah anai Ñu pơdơ̆ng đĭ kơjăp djơ̆ anih laih anŭn ƀu hơmâo hơget gĕt ôh dưi pơđuaĭ hĭ.

²Ơ Yahweh hơi, tơlơi git gai Ih ƀơi grê pơtao Ih hơmâo dŏ kơjăp laih čơdơ̆ng mơ̆ng rơnŭk đưm adih, laih anŭn Ih hơmâo hlâo kơ hrơi mông čơdơ̆ng hơmâo yơh.

³Khul ia rơsĭ hơmâo pơyơ̆ng đĭ laih, Ơ Yahweh ăh; khul ia rơsĭ hơmâo pơyơ̆ng đĭ laih jua pơhiăp gơñu; khul ia rơsĭ hơmâo pơyơ̆ng đĭ laih dơnai jơlah ia păh pung gơñu.

⁴Ih yơh, Ơ Yahweh ăh, jing prŏng glông hloh amăng adai adih, prŏng kơtang hloh kơ ia rơsĭ pơgrao kơtang, kơtang mơyang hloh kơ khul jơlah ia rơsĭ yơh.

⁵Hơdôm tơlơi pơtă pơtăn Ih jing kơjăp hlŏng lar yơh, Ơ Yahweh ăh, laih anŭn sĭt tơlơi rơgoh hiam Ih pơhrôp Sang Yang Ih yơh nanao laih anŭn hlŏng lar.