Read Jarai Adoh Bơni Hơơč 97 Bible Online

Adoh Bơni Hơơč 97 - Jarai bible

Adoh Bơni Hơơč 97

¹Yahweh yơh jing pơtao git gai, brơi bĕ kơ abih bang mơnuih ƀơi lŏn tơnah hơ̆k mơak! Wơ̆t tơdah ƀing mơnuih dŏ amăng plao ia ataih, brơi bĕ ƀing gơñu hơ̆k kơdơ̆k!

²Kơthul laih anŭn kơnăm mơmŏt kơpa̱l wang dar Ñu; Ñu git gai wai lăng mơ̆ng grê pơtao Ñu hăng tơlơi tơpă hơnơ̆ng laih anŭn djơ̆ tơpă yơh.

³Apui nao gah anăp Ñu laih anŭn čuh pơrai hĭ ƀing rŏh ayăt jum dar Ñu.

⁴Kơmlă Ñu klă̱ rơđah adai lŏn, laih anŭn lŏn tơnah tơtư̆ tơtơ̆ng yơh kar hăng mơnuih ƀuh laih anŭn huĭ tơtư̆ yơh.

⁵Khul čư̆ čan lê̱k hĭ kar hăng hlĭn ƀơi anăp Yahweh, jing ƀơi anăp Khua Yang git gai abih bang lŏn tơnah yơh.

⁶Khul tal adai adih pơrơđah tơlơi tơpă hơnơ̆ng Ñu, laih anŭn abih bang ƀing kơnung djuai lŏn čar ƀuh tơlơi ang yang Ñu.

⁷Abih bang ƀing hlơi pô kơkuh pơpŭ kơ khul rup trah; jing ƀing pơư pơang kơ khul rup trah gơñu, či tŭ tơlơi mlâo mlañ yơh, Ơ abih bang ƀing yang rơba̱ng ăh, kơkuh pơpŭ bĕ kơ Ñu!

⁸Ơ Yahweh ăh, ƀing ană plei Yerusalaim[138] hơmư̆ laih anŭn hơ̆k mơak yơh, laih anŭn ƀing ană plei khul plei pla Yudah pơkŏn hơ̆k kơdơ̆k yơh yuakơ Ih phat kơđi ƀing kơtư̆ juă gơñu.

⁹Ơ Yahweh ăh, Ih yơh jing Pô Prŏng Glông Hloh kơ abih bang lŏn tơnah; Ih yơh jing prŏng glông hloh kơ abih bang ƀing yang rơba̱ng.

¹⁰Ơ ƀing hlơi pô khăp kơ Yahweh, brơi kơ ƀing gih pơrơmut bĕ kơ tơlơi sat ƀai, yuakơ Ñu yơh răk wai tơlơi hơdip ƀing ană plei tŏng ten Ñu, laih anŭn pơklaih hĭ ƀing gơ̆ mơ̆ng tơngan tơlơi dưi ƀing sat ƀai.

¹¹Tơlơi bơngač pơčrang ƀơi ƀing mơnuih tơpă hơnơ̆ng, laih anŭn ƀing mơnuih hơmâo pran jua djơ̆ tơpă hơ̆k mơak biă mă.

¹²Hơ̆k mơak bĕ yuakơ tơlơi bruă Yahweh hơmâo ngă laih, Ơ ƀing tơpă hơnơ̆ng hơi, laih anŭn bơni hơơč bĕ kơ anăn rơgoh hiam Ñu.