Read Jarai Adoh Bơni Hơơč 99 Bible Online

Adoh Bơni Hơơč 99 - Jarai bible

Adoh Bơni Hơơč 99

¹Yahweh yơh jing Pô git gai, tui anŭn brơi kơ ƀing lŏn čar huĭ tơtư̆ bĕ; Ñu dŏ ƀơi grê pơtao Ñu kơplăh wăh dua boh rup čerub tui anŭn brơi kơ lŏn tơnah pơpư̆ pơgơi bĕ.[139]

²Yahweh amăng plei Yerusalaim[140] jing Pô prŏng kơtang biă mă yơh; Ñu jing Pơtao prŏng glông hloh git gai abih bang ƀing lŏn čar yơh.

³Tui anŭn, brơi kơ ƀing gơñu bơni hơơč bĕ kơ anăn prŏng prin Ñu, jing anăn ngă brơi kơ mơnuih mơnam pơpư̆ pơgơi; Ñu yơh jing rơgoh hiam!

⁴Ơ Pơtao dưi kơtang hơi, Ih khăp tơlơi djơ̆ tơpă; Ih hơmâo pơkơjăp laih tơlơi djơ̆ găl amăng ƀing gơmơi jing ană tơčô Yakôb; Ih hơmâo kơčrâo brơi laih kơ ƀing gơmơi ngă tơlơi tơpă hơnơ̆ng laih anŭn tơlơi djơ̆ tơpă.

⁵Brơi kơ ƀing ta pơdun đĭ bĕ Yahweh Ơi Adai ta, laih anŭn bon kơkuh pơpŭ bĕ ƀơi tơkai Ñu! Ñu yơh jing rơgoh hiam!

⁶Môseh hăng A̱rôn jing dua čô amăng ƀing khua ngă yang Ñu; Samuêl yơh jing sa čô amăng ƀing iâu đĭ ƀơi anăn Ñu; klâo ƀing gơñu kwưh rơkâo kơ Yahweh pơala brơi kơ ƀing ană plei Ñu laih anŭn Ñu laĭ glaĭ kơ ƀing gơ̆ yơh.

⁷Ñu pơhiăp laih hăng ƀing gơ̆ mơ̆ng gơ̆ng kơthul; ƀing gơñu tui gưt hơdôm tơlơi pơtă pơtăn hăng tơlơi phiăn Yahweh brơi kơ ƀing gơ̆.[141]

⁸Ơ Yahweh Ơi Adai gơmơi hơi, Ih hơmâo laĭ glaĭ laih kơ ƀing ană plei Ih anŭn; wơ̆t tơdah Ih pơkơhma̱l hĭ laih ƀing gơñu yuakơ khul tơlơi soh sat gơñu, samơ̆ Ih hơmâo pơrơđah laih kơ ƀing gơñu thâo Ih jing Ơi Adai thâo pap brơi.

⁹Pơdun đĭ bĕ Yahweh Ơi Adai ta, laih anŭn kơkuh pơpŭ bĕ ƀơi Ziôn jing bŏl čư̆ rơgoh hiam Ñu, yuakơ Yahweh Ơi Adai ta jing rơgoh hiam.