Read Jarai Pơrơtưh 10 Bible Online

Pơrơtưh 10 - Jarai bible

Pơrơtưh 10

¹Anai yơh jing khul tơlơi pơrơtưh Solomôn: Ană đah rơkơi rơgơi pơmơak kơ ama ñu, samơ̆ ană đah rơkơi mlŭk pơrơngot hĭ amĭ ñu.

²Hơdôm mŭk dram tŭ mă mơ̆ng tơlơi pleč ƀlŏr, ƀu hơmâo tơlơi tŭ yua ôh, samơ̆ tơlơi hơdip tơpă hơnơ̆ng pơklaih hĭ mơ̆ng tơlơi djai.

³Yahweh ƀu brơi kơ mơnuih tơpă hơnơ̆ng ư̆ rơpa ôh samơ̆ Ñu pơgăn hĭ tơlơi hưp mơhao rơkâo ƀơ̆ng mơnuih sat ƀai.

⁴Tơngan alah ngă brơi kơ mơnuih jing ƀun rin, samơ̆ tơngan triăng brơi kơ mơnuih jing pơdrŏng săh yơh.

⁵Ană đah rơkơi pă pơƀut glaĭ boh čroh amăng bơyan pha̱ng, ñu anŭn jing rơgơi, samơ̆ ană đah rơkơi pă pĭt tơdang amăng bơyan hơpuă jing pô pơmlâo hĭ amĭ ama ñu yơh.

⁶Mơnuih tơpă hơnơ̆ng troă khul tơlơi bơni hiam ƀơi akŏ ñu, samơ̆ mơnuih sat ƀai tŭ mă tơlơi ƀrưh mơhiăh ƀơi amăng bah ñu yơh.

⁷Tơlơi djă̱ hơdơr kơ mơnuih tơpă hơnơ̆ng djai laih či jing tơlơi bơni hiam, samơ̆ anăn mơnuih sat ƀai djai laih či jing rơngiă hĭ thĕng yơh.

⁸Mơnuih rơgơi amăng pran jua, gưt tui khul tơlơi pơđar, samơ̆ mơnuih pơhiăp tơlơi wĕ wŏ hăng tơƀông ñu, mă tŭ tơlơi răm rai yơh.

⁹Mơnuih hơmâo kơnuih tơpă sĭt, rơbat rơnŭk rơnua, samơ̆ mơnuih đuaĭ tui jơlan wĕ wŏ, arăng či hơduah ƀuh tơlơi pleč ƀlŏr ñu yơh.

¹⁰Hlơi pô kơhơñĕt mơta kiăng ngă mơneč sat ƀai, ñu anŭn ba rai tơlơi rơngot hơning kơ arăng, samơ̆ mơnuih pơhiăp tơlơi wĕ wŏ hăng tơƀông ñu, či mă tŭ tơlơi răm rai yơh.

¹¹Amăng bah mơnuih tơpă hơnơ̆ng jing phŭn ia tơlơi hơdip, samơ̆ mơnuih sat ƀai tŭ mă tơlơi ƀrưh mơhiăh ƀơi amăng bah ñu yơh.

¹²Tơlơi pơrơmut ba rai nanao tơlơi pơkăh pơpha, samơ̆ tơlơi khăp pơrơgao hĭ abih bang tơlơi pơsoh yơh.

¹³Tơlơi rơgơi tơbiă rai mơ̆ng tơƀông bah mơnuih thâo rơđah, samơ̆ arăng pioh gai hơnuăt kiăng kơ taih rŏng hlơi pô kơƀah tơlơi kơsem răng yơh.

¹⁴Mơnuih rơgơi pơkom pioh tơlơi thâo pơmĭn, samơ̆ amăng bah mơnuih mlŭk pơtơbiă rai tơlơi răm rai yơh.

¹⁵Mŭk dram ƀing mơnuih pơdrŏng jing kơđông kơjăp kơ ƀing gơñu, samơ̆ tơlơi kơƀah kiăng ƀing ƀun rin jing tơlơi răm rai kơ ƀing gơñu yơh.

¹⁶Nua apăh ƀing mơnuih tơpă hơnơ̆ng jing tơlơi hơdip rơnŭk rơno̱m, samơ̆ prăk bruă ƀing sat ƀai jing tơlơi pơkơhma̱l yơh.

¹⁷Hlơi pô hrăm mă tơlơi pơkhư̆ pơhrăm, ñu anŭn dưi kơčrâo brơi jơlan tơlơi hơdip kơ arăng, samơ̆ hlơi pô hơngah ƀu kiăng hrăm mă tơlơi pơtơpă ôh, ñu anŭn či dui ba ƀing arăng jrôk jơlan yơh.

¹⁸Hlơi pô pơhiăp ƀlŏr hăng tơƀông ñu kiăng kơ djă̱ pơdŏp tơlơi pơrơmut, laih anŭn hlơi pô pơhiăp pơčĕr kơ arăng, ƀing gơñu anŭn jing mơnuih mlŭk yơh.

¹⁹Tơdang hlơi pô pơhiăp lu, sĭt ñu anŭn či ngă tơlơi wĕ wŏ, samơ̆ hlơi pô pơkơ̆ng hĭ jơlah ñu jing rơgơi yơh.

²⁰Jơlah mơnuih tơpă hơnơ̆ng jing yom biă mă kar hăng amrăk hiam hloh, samơ̆ pran jua mơnuih sat ƀai jing kơnơ̆ng hơmâo ƀiă nua yom đôč.

²¹Kar hăng pô wai triu, khul boh hiăp tơƀông mơnuih tơpă hơnơ̆ng răk wai lu mơnuih, samơ̆ ƀing mlŭk pơdjai hĭ gơñu pô yuakơ kơƀah hĭ tơlơi kơsem răng.

²²Tơlơi bơni hiam Yahweh brơi rai kơ mơnuih jing hĭ pơdrŏng, laih anŭn Ñu ƀu brơi tơlơi rŭng răng hrŏm hăng mŭk dram gơ̆ ôh.

²³Mơnuih mlŭk mơak biă mă amăng tơlơi hơdip hơdơ̆ng sat ƀai ñu, samơ̆ mơnuih thâo hluh hơ̆k kơdơ̆k amăng tơlơi rơgơi ñu mă tŭ laih.

²⁴Hơget tơlơi ƀing mơnuih sat ƀai huĭ hyưt, sĭt tơlơi anŭn yơh či krep truh ƀơi ƀing gơñu, samơ̆ hơget tơlơi ƀing mơnuih tơpă hơnơ̆ng amoaih kiăng, sĭt ƀing gơñu či mă tŭ yơh.

²⁵Tơdang angĭn rơbŭ hơmâo truh rai, ƀing mơnuih sat ƀai anŭn či rơngiă hĭ thĕng yơh, samơ̆ mơnuih tơpă hơnơ̆ng či dŏ kơjăp hlŏng lar.

²⁶Kar hăng tơpai mơsăm ngă tĭng tơgơi laih anŭn asăp apui ngă thu mơta, ăt tui anŭn mơ̆n kơ mơnuih alah ngă kơ pô khua pơkiaŏ ñu nao mă bruă.

²⁷Tơlơi huĭ pơpŭ kơ Yahweh či thim đĭ thŭn tơlơi hơdip sui, samơ̆ khul thŭn mơnuih sat ƀai Ñu či pơjing hĭ be̱r yơh.

²⁸Tơlơi čang tơguan mơnuih tơpă hơnơ̆ng jing tơlơi mơak, samơ̆ tơlơi čang rơmang mơnuih sat ƀai jing hĭ đôč đač yơh.

²⁹Jơlan hơdră Yahweh jing anih kơđông kơjăp kơ mơnuih tơpă hơnơ̆ng, samơ̆ hơdră jơlan anŭn jing anih huĭ hyưt kơ ƀing hlơi pô ngă tơlơi soh sat yơh.

³⁰Mơnuih tơpă hơnơ̆ng Yahweh ƀu či buč đuaĭ hĭ ôh mơ̆ng anih lŏn, samơ̆ mơnuih sat ƀai Ñu ƀu či brơi dŏ dơnơ̆ng amăng anih lŏn dơ̆ng tah.

³¹Mơ̆ng amăng bah mơnuih tơpă hơnơ̆ng pơtơbiă rai tơlơi rơgơi, samơ̆ jơlah pleč ƀlŏr mơnuih sat ƀai Yahweh či pơrơiăt hĭ yơh.

³²Tơƀông mơnuih tơpă hơnơ̆ng pơtơbiă rai hơdôm tơlơi dưi djru arăng, samơ̆ amăng bah mơnuih sat ƀai kơnơ̆ng pơtơbiă rai tơlơi plư pleč đôč yơh.