Read Jarai Pơrơtưh 12 Bible Online

Pơrơtưh 12 - Jarai bible

Pơrơtưh 12

¹Hlơi pô khăp kơ tơlơi pơkhư̆ pơhrăm, ñu anŭn khăp kơ tơlơi thâo pơmĭn yơh, samơ̆ hlơi pô pơrơmut kơ tơlơi ƀuăh pơtô, ñu anŭn jing mlŭk mơgu yơh.

²Yahweh rơiêŭ mơak hăng mơnuih hiam klă, samơ̆ Ñu klă̱ kơđi kơ mơnuih ngă mơneč sat.

³Mơnuih mơnam ngă sat ƀai ƀu dưi dŏ kơjăp amăng lŏn đang ôh, samơ̆ mơnuih tơpă hơnơ̆ng ƀu hơmâo hơget gĕt ôh dưi buč hĭ.

⁴Sa čô bơnai hơmâo kơnuih hiam klă jing guang đoăn yom kơ rơkơi ñu, samơ̆ sa čô bơnai pơmlâo rơkơi ñu jing kar hăng tơlơi brŭ răm amăng khul tơlang gơ̆ yơh.

⁵Khul hơdră ƀing tơpă hơnơ̆ng jing djơ̆ tơpă, samơ̆ tơlơi djru pơmĭn mơ̆ng mơnuih sat ƀai jing plŏm ƀlŏr.

⁶Hơdră boh hiăp mơnuih sat ƀai jing tơlơi dŏ krăp kiăng kơ ngă tuh drah arăng, samơ̆ tơlơi pơhiăp mơnuih jing tơlơi tơpă pơklaih hĭ arăng.

⁷Sĭt ƀing sat ƀai či glưh rai ƀu hơmâo ană tơčô ôh, samơ̆ sang anŏ mơnuih tơpă hơnơ̆ng ăt dŏ kơjăp nanao.

⁸Arăng bơni hơơč kơ sa čô tui hăng tơlơi rơgơi ñu hơmâo, samơ̆ ƀing mơnuih hơmâo jua pơmĭn pleč plư, arăng djik djak yơh.

⁹Hiam hloh jing sa čô mơnuih đôč đač laih anŭn kơnơ̆ng hơmâo sa čô ding kơna đôč hloh kơ mơnuih ngă mă kiăng jing sa čô yom pơphan samơ̆ kơƀah hĭ gơnam ƀơ̆ng.

¹⁰Mơnuih tơpă hơnơ̆ng ƀlơ̆ng răng wai brơi kơ hlô mơnơ̆ng rong ñu, samơ̆ khul tơlơi bruă hiam klă hloh mơnuih sat ƀai ngă kơ hlô mơnơ̆ng ñu jing kơnơ̆ng tơlơi kheñ đet yơh.

¹¹Hlơi pô jik jăh čŏh pla amăng lŏn đang ñu pô, či hơmâo gơnam ƀơ̆ng bă blai yơh, samơ̆ hlơi pô đuaĭ tui hơdôm tơlơi bruă đôč đač, kơƀah hĭ tơlơi pơmĭn yơh.

¹²Mơnuih ƀrưh ƀai amoaih kluh gơnam sua mă ƀing mơnuih sat yơh, samơ̆ akha mơnuih tơpă hơnơ̆ng čă prŏng tui hăng hơmâo boh čroh.

¹³Mơnuih sat ƀai lê̆ djơ̆ hĭ amăng čơđo̱ng tơlơi pơhiăp soh ñu pô, samơ̆ mơnuih tơpă hơnơ̆ng klaih hĭ mơ̆ng tơlơi rŭng răng yơh.

¹⁴Mơ̆ng boh čroh tơƀông bah ñu jing boh hiăp rơgơi yơh, mơnuih dưi hơmâo bă hăng khul tơlơi hiam klă, laih anŭn yua mơ̆ng bruă tơngan ñu anŭn yơh, ñu anŭn ăt dưi mă gơnam hiam mơ̆n.

¹⁵Mơnuih mlŭk pơmĭn jơlan ñu pô jing djơ̆, samơ̆ mơnuih rơgơi hơmư̆ tui hơdôm tơlơi djru pơmĭn rơgơi.

¹⁶Mơnuih mlŭk pơrơđah tơlơi hil ñu ƀơi mông anŭn mơtam, samơ̆ mơnuih răng pơñen pơrơgao hĭ tơlơi djik mưč.

¹⁷Mơnuih ngă gơ̆ng jơlan djơ̆ pơhiăp kơnơ̆ng tơlơi tơpă sĭt yơh, samơ̆ pô ngă gơ̆ng jơlan soh pơhiăp kơnơ̆ng tơlơi ƀlŏr đôč.

¹⁸Khul boh hiăp mơhiăh klâŏ hluh nanao kar hăng sa ƀĕ đao, samơ̆ jơlah mơnuih rơgơi pơtơbiă rai boh hiăp pơsuaih.

¹⁹Boh hiăp tơpă sĭt mơ̆ng tơƀông dŏ hlŏng lar, samơ̆ tơlơi pơhiăp pleč ƀlŏr mơ̆ng jơlah dŏ kơnơ̆ng ƀiă mơnĭt mông đôč.

²⁰Tơlơi pơblư̆ pơƀlŏr pơbă hĭ jua pơmĭn ƀing ngă mơneč sat ƀai, samơ̆ tơlơi hơ̆k mơak yơh pơbă hĭ ƀing hlơi pô hơduah sem tơlơi rơnŭk rơno̱m hăng tơdruă.

²¹Ƀu hơmâo tơlơi răm sat ôh lê̆ ƀơi mơnuih tơpă hơnơ̆ng, samơ̆ mơnuih sat ƀai kơnơ̆ng hơmâo tơlơi rŭng răng đôč yơh.

²²Yahweh hơƀak drak kơ ƀing hơmâo tơƀông bah pơhiăp ƀlŏr, samơ̆ Ñu mơak hăng ƀing hơdip hơdơ̆ng tơpă sĭt.

²³Mơnuih răng pơñen pơpha brơi tơlơi thâo pơmĭn ñu djơ̆ hơnơ̆ng, samơ̆ hlơi pô hơmâo pran jua mlŭk juăt pơđu̱ng asăp mlŭk mơgu.

²⁴Ƀing hơmâo tơngan triăng či jing hĭ pô git gai arăng, samơ̆ ƀing hơmâo tơngan alah či jing hĭ hlŭn arăng yơh.

²⁵Tơlơi ƀlơ̆ng kluh mơ̆ng pran jua mơnuih jing kar hăng gơnam kơtraŏ pơkơtraŏ trŭn ñu, samơ̆ boh hiăp pơtrŭt pơđu̱r kơ arăng ngă brơi kơ ñu klao mơak.

²⁶Mơnuih tơpă hơnơ̆ng pha brơi tơlơi djru pơmĭn kơ ƀing re̱ng gah ñu, samơ̆ hơdră jơlan mơnuih sat ƀai ba ƀing gơ̆ nao hĭ jrôk jơlan yơh.

²⁷Mơnuih thô alah[28] ƀu lua kiăng kơ hơmâo añăm hăng pơhang ŏm ôh, samơ̆ mơnuih triăng dưi hơmâo gơnam ƀơ̆ng yom pơphan yơh.

²⁸Hlơi pô đuaĭ tui jơlan tơpă hơnơ̆ng hơmâo tơlơi hơdip; sĭt amăng jơlan anŭn ƀu hơmâo tơlơi djai ôh.