Read Jarai Pơrơtưh 16 Bible Online

Pơrơtưh 16 - Jarai bible

Pơrơtưh 16

¹Yahweh brơi kơ mơnuih mơnam pơphŭn rai hơdră bruă amăng jua pơmĭn ñu, samơ̆ hơnăl tuč bah jơlah Yahweh yơh pơhiăp hơdôm bruă năng ngă.

²Abih bang khul jơlan mơnuih đuaĭ tui jing kar hăng hơči̱h yơh kơ ñu, samơ̆ Yahweh yơh kơsem lăng hơdôm tơlơi pơtrŭt pran jua mơnuih kiăng kơ ngă anŭn.

³Jao bĕ kơ Yahweh hơget bruă ih ngă, tui anŭn khul hơdră bruă ih anŭn či dưi jing hĭ yơh.

⁴Yahweh pơkra rĭm tơlơi bruă tui hăng tơlơi kơñăm Ñu pô, wơ̆t tơdah kơ mơnuih sat ƀai, Ñu khưp kiăng pơkra hrơi răm rai yơh.

⁵Yahweh hơƀak drak kơ abih bang mơnuih hơmâo pran jua pơgao ang. Brơi thâo sĭt bĕ tơlơi anai: Ƀing gơñu ƀu či rơbat nao rơngai hĭ mơ̆ng tơlơi pơkơhma̱l ôh.

⁶Kơnang mơ̆ng tơlơi khăp hăng tơlơi tŏng ten kơ Yahweh yơh Ñu či song mă mơnuih mơnam mơ̆ng tơlơi soh; laih anŭn mơ̆ng tơlơi huĭ pơpŭ kơ Yahweh yơh mơnuih mơnam đuaĭ ataih hĭ mơ̆ng tơlơi sat ƀai.

⁷Tơdang khul hơdră jơlan mơnuih pơmơak kơ Yahweh, Ñu ăt ngă kơ ƀing rŏh ayăt pô anŭn pơrơno̱m hăng gơ̆ mơ̆n.

⁸Hiam hloh hơmâo ƀiă gơnam samơ̆ tŭ mă mơ̆ng tơlơi bruă tơpă hơnơ̆ng, jing hloh kơ hơmâo prăk pơƀut lu samơ̆ tŭ mă mơ̆ng tơlơi ƀu djơ̆ tơpă.

⁹Amăng jua pơmĭn ñu yơh mơnuih mơnam pơkra hơdră jơlan ñu, samơ̆ Yahweh yơh pơkra jơlan kơ ƀing gơñu yak nao.

¹⁰Tơƀông bah pơtao pơhiăp tơlơi pơhaih pơklă, laih anŭn amăng bah ñu khŏm phat kơđi hăng boh hiăp djơ̆ găl nanao.

¹¹Yahweh hơduah kiăng kơ mơnuih mơnam yua gơnam pơkă hăng boh pơkơtraŏ tơpă; abih bang boh pơkơtraŏ pô sĭ mơnia hơmâo amăng kơdŭng anŭn khŏm djơ̆ tui hăng tơlơi Yahweh pơkra yơh.

¹²Ƀing pơtao hơƀak kơ bruă ƀing ană plei ngă sat ƀai, yuakơ tơlơi git gai wai lăng ñu hơmâo pơkô̆ pơkơjăp rai mơ̆ng tơlơi tơpă hơnơ̆ng gơñu yơh.

¹³Ƀing pơtao mơak ƀơi hơdôm tơƀông bah pơhiăp tơpă, sĭt ƀing gơñu rơiêŭ mơak hăng hlơi pô pơhiăp tơlơi sĭt.

¹⁴Tơlơi pơtao hil nač jing kar hăng pô ding kơna ñu pơkiaŏ nao pơdjai hĭ arăng yơh, samơ̆ mơnuih rơgơi či gir pơhrŏ hĭ tơlơi anŭn.

¹⁵Tơlơi ƀô̆ mơta pơtao klao mơak, kiăng laĭ anŭn jing phŭn kơ tơlơi hơdip, sĭt tơlơi mơak ñu hrup hăng kơthul hơjan pha brơi tơlơi hơdip phrâo amăng bơyan bơnga yơh.

¹⁶Hiam hloh yơh kiăng kơ hơmâo tơlơi rơgơi hloh kơ hơmâo mah, laih anŭn kiăng kơ ruah tơlơi thâo hluh jing hiam hloh kơ ruah amrăk!

¹⁷Mơnuih tơpă sĭt yak rơbat amăng jơlan rơhaih ƀu nao wĕ wŏ đuaĭ tui tơlơi sat ƀai ôh; hlơi pô răng pơñen đuaĭ tui jơlan anŭn, ñu anŭn răng pơgang tơlơi hơdip ñu pô yơh.

¹⁸Mơnuih pơgao ang hlâo či răm rai yơh tơdơi, sĭt mơnuih hơmâo kơnuih pơpŭ pơdun đĭ ñu pô hlâo či lê̆ rơbuh yơh tơdơi kơ anŭn.

¹⁹Hiam hloh jing pô luă gŭ amăng jua pơmĭn laih anŭn jing sa čô amăng mơnuih arăng kơtư̆ juă, jing hiam hloh kơ tơlơi pơkăh pơpha gơnam sua mă hăng mơnuih pơgao ang anŭn.

²⁰Hlơi pô hơmư̆ tui tơlơi pơtô, ñu anŭn đĭ kơyar yơh, laih anŭn mơyŭn mơak yơh kơ hlơi pô đaŏ kơnang kơ Yahweh.

²¹Mơnuih hơmâo tơlơi rơgơi amăng jua pơmĭn ñu, arăng yap ñu jing pô thâo rơđah, laih anŭn tơlơi pơhiăp tơdu rơun brơi kơ arăng kiăng hơmư̆ tui tơlơi pơhrăm ñu yơh.

²²Tơlơi thâo hluh jing sa phŭn ia pha brơi tơlơi hơdip kơ hlơi pô hơmâo tơlơi thâo anŭn, samơ̆ tơlơi kơmlư ƀing mlŭk ba rai tơlơi pơkơhma̱l kơ gơñu pô.

²³Jua pơmĭn mơnuih rơgơi kơčrâo brơi amăng bah ñu tơdang ñu pơhiăp, laih anŭn brơi tơƀông bah ñu pơtơbiă rai tơlơi pơhrăm arăng kiăng hơmư̆ tui.

²⁴Khul tơlơi pơhiăp tơdu rơun jing hrup hăng sa boh sêng hơni, mơmĭh kơ bơngăt jua laih anŭn pơsuaih hĭ drơi jan.

²⁵Hơmâo sa jơlan ƀing mơnuih mơnam pơmĭn jing djơ̆, samơ̆ ƀơi hơnăl tuč jơlan anŭn jing hĭ truh pơ tơlơi djai yơh.

²⁶Tơlơi rơpa pô mă bruă ngă kơ ñu mă bruă; yuakơ tơlơi tơua ñu yơh pơtrŭt ñu.

²⁷Mơnuih ƀrưh mơhiăh gir hơduah tơlơi pơhiăp rơkŭt, laih anŭn tơlơi pơhiăp tơbiă rai mơ̆ng bah jơlah jing kar hăng jơlah apui hlia yơh.

²⁸Mơnuih pơkŭp pơđang ba rai tơlơi pơkăh pơpha, sĭt mơnuih pơhiăp rơkŭt pơčơlah hĭ ƀing gơyut gơyâo jĕ giăm yơh.

²⁹Mơnuih ƀrưh ƀai pơhiăp pleč ƀlŏr mơnuih re̱ng gah ñu kiăng kơ dui ba gơ̆ nao pơ jơlan wĕ wŏ.

³⁰Hlơi pô kơhơñet hăng mơta ñu, ñu ngă tui anŭn yuakơ ñu pơkra bruă pleč ƀlŏr yơh, sĭt hlơi pô pơkơ̆ng hĭ tơƀông ñu, ñu anŭn gu nao pơ tơlơi sat ƀai yơh.

³¹Ƀŭk kô̱̆ pô tha rơma jing kar hăng đoăn yom kơ ñu pô, jing gơnam bơni kơ ƀing hlơi pô hơdip tơpă hơnơ̆ng yơh.

³²Mơnuih akaih hil jing hiam hloh kơ sa čô tơhan khĭn kơtang, sĭt hlơi pô pơkhư̆ hĭ tơlơi ƀrŭk hil ñu pô jing hiam hloh kơ pô blah mă sa boh plei pơnăng yơh.

³³Mơnuih mơnam ngă čram kiăng kơ thâo tơlơi Yahweh kiăng, samơ̆ Yahweh yơh pơkhưp kiăng kơ hiư̆m čram anŭn či lê̆.