Read Jarai Pơrơtưh 2 Bible Online

Pơrơtưh 2 - Jarai bible

Pơrơtưh 2

¹Ơ dăm, hơmư̆ bĕ khul boh hiăp kâo laih anŭn pơkom pioh hĭ bĕ khul tơlơi pơđar kâo amăng jua pơmĭn ih.

²Nger tơngia ih bĕ nao kơ boh hiăp rơgơi laih anŭn brơi kơ pran jua ih gir thâo hluh kơ tơlơi pơhiăp anŭn.

³Iâu rai bĕ kơ tơlơi thâo rơđah laih anŭn iâu kraih bĕ kơ tơlơi thâo hluh.

⁴Hơduah sem bĕ kơ tơlơi anŭn kar hăng hơduah amrăk[8] jing hyu hơduah ñu kar hăng hơduah mŭk yom hơgŏm.

⁵Tui anŭn, ih či thâo hluh tơlơi huĭ pơpŭ kơ Yahweh laih anŭn hơduah ƀuh tơlơi thâo pơmĭn Ơi Adai yơh.

⁶Yahweh yơh jing Pô pha brơi tơlơi rơgơi, sĭt mơ̆ng amăng bah Ñu yơh tơlơi thâo pơmĭn laih anŭn tơlơi thâo hluh tơbiă rai.

⁷Ñu pioh tơlơi thâo rơđah kơ mơnuih tơpă hơnơ̆ng, Ñu jing sa boh khiơl pơgang kơ hlơi pô đuaĭ tui tơlơi tơpă hiam.

⁸Ñu răk wai brơi tơlo̱ng[9] mơnuih djơ̆ tơpă laih anŭn răng pơgang brơi jơlan ƀing dŏ tŏng ten hăng Ñu.

⁹Tơdah ih hơmư̆ kâo, ih či thâo hluh yơh hơget tơlơi jing djơ̆ laih anŭn tơpă hiam laih anŭn djơ̆ găl. Amăng rĭm anih hơdip ih či thâo krăn hơget hơdră jơlan jing hiam yơh.

¹⁰Ih či thâo tơlơi ngă anŭn yuakơ tơlơi rơgơi či git gai jua pơmĭn ih, laih anŭn tơlơi thâo pơmĭn či pơmơak kơ jua bơngăt ih yơh.

¹¹Tơlơi kơsem răng ăt či pơgang brơi kơ ih, laih anŭn tơlơi thâo hluh či gak wai brơi kơ ih mơ̆n.

¹²Boh hiăp rơgơi či pơklaih hĭ ih mơ̆ng tơlơi đuaĭ tui khul jơlan ƀing mơnuih sat ƀai, jing mơ̆ng tơlơi ngă tui ƀing mơnuih pơhiăp tơlơi pleč ƀlŏr.

¹³Ƀing gơñu đuaĭ ataih hĭ mơ̆ng khul jơlan tơpă kiăng kơ rơbat tui khul jơlan kơnăm mơmŏt.

¹⁴Ƀing gơñu mơak tơdang ƀing gơñu ngă soh laih anŭn hơ̆k mơak tơdang ƀing gơñu pleč ƀlŏr sat ƀai.

¹⁵Ƀing gơñu đuaĭ tui khul jơlan rơbat wĕ wŏ, laih anŭn jrôk jơlan mơ̆ng khul jơlan tơpă hơnơ̆ng.

¹⁶Boh hiăp rơgơi anŭn yơh či pơklaih hĭ ih mơ̆ng đah kơmơi pyu pơde, jing mơ̆ng tơlơi pơhiăp pơhưč plư đah bơnai tă tăn.

¹⁷Ñu pơwơr hĭ tơlơi pơgop ñu ƀuăn laih ƀơi anăp Ơi Adai laih anŭn ƀu dŏ tŏng ten hăng rơkơi ñu jing pô pơdŏ hăng ñu čơdơ̆ng mơ̆ng thŭn hlak ai.

¹⁸Tơdah ih đuaĭ tui jơlan nao truh pơ sang ñu sĭt ih či trŭn nao pơ anih ƀing djai yơh.

¹⁹Hlơi pô nao pơ ñu ƀu dưi wơ̆t glaĭ ôh, laih anŭn kŏn rơbat nao amăng jơlan tơlơi hơdip lơi.

²⁰Kơđai glaĭ, ih khŏm rơbat ƀơi khul jơlan mơnuih hiam klă jing khŏm nao tui nanao khul tơlo̱ng mơnuih tơpă hơnơ̆ng.

²¹Mơnuih tơpă hiam či hơdip amăng anih lŏn yơh, sĭt mơnuih ƀu ngă soh yơh ăt či dŏ nanao amăng anih lŏn anŭn.

²²Samơ̆ mơnuih sat ƀai Yahweh či puh pơđuaĭ hĭ ñu mơ̆ng anih lŏn anŭn, sĭt mơnuih ƀu tŏng ten Yahweh či buč glŏm hĭ mơ̆ng anih anŭn yơh.