Read Jarai Pơrơtưh 3 Bible Online

Pơrơtưh 3 - Jarai bible

Pơrơtưh 3

¹Ơ dăm, anăm wơr bĭt hĭ tơlơi kâo pơtô laĭ ôh, samơ̆ djă̱ pioh bĕ khul tơlơi kâo pơđar amăng jua pơmĭn ih,

²yuakơ tơdah ih tui gưt hơdôm tơlơi anŭn, ih či hơmâo tơlơi hơdip sui biă mă laih anŭn tơlơi rơnŭk rơno̱m.

³Anăm lui hĭ ôh tơlơi ih khăp kơ Ơi Adai laih anŭn tơlơi ih dŏ tŏng ten hăng Ñu nanao! Kiăng pơhơdơr kơ ih akă băk bĕ hơdôm tơlơi anŭn kar hăng băk añŭ ƀơi tơkuai ih, laih anŭn djă̱ pioh bĕ kar hăng čih amăng pran jua ih.

⁴Tui anŭn, Ơi Adai laih anŭn mơnuih yơh či mơak hăng ih laih anŭn yap kơnăl ih jing hiam klă.[10]

⁵Đaŏ kơnang bĕ amăng Yahweh hăng abih pran jua ih laih anŭn anăm kơnang ƀơi tơlơi thâo hluh ih pô ôh;

⁶amăng abih bang jơlan ih nao, thâo đaŏ kơnang bĕ kơ Ñu kiăng kơ dui ba ih, tui anŭn Ñu či ngă brơi kơ khul jơlan ih tơpă brăng yơh.

⁷Anăm jing rơgơi hăng mơta ih pô ôh, samơ̆ huĭ pơpŭ bĕ kơ Yahweh laih anŭn kơdŭn đuaĭ ataih hĭ bĕ mơ̆ng tơlơi sat ƀai.[11]

⁸Tơdah ih ngă tui anŭn drơi jan ih či jing hiam rơjăng laih anŭn tơlang ih či kơtang kơjăp yơh.

⁹Pơpŭ bĕ kơ Yahweh hăng mŭk dram[12] ih hơmâo laih anŭn hăng khul boh čroh blung hlâo mơ̆ng abih bang gơnam tăm ih;

¹⁰tui anŭn khul atông ih či hơmâo bă blai, laih anŭn khul kơthŭng čeh ih či blai hăng ia boh kơƀâo phrâo yơh.

¹¹Ơ dăm hơi, anăm djik djak ôh kơ tơlơi Yahweh pơkhư̆ pơhrăm, anăm tah hơtai ôh kơ tơlơi Ñu ƀuăh pơtô,[13]

¹²yuakơ Yahweh ƀuăh pơtô hlơi pô Ñu khăp, kar hăng sa čô ama pơkhư̆ pơhrăm ană đah rơkơi ñu ƀu-eng yơh.[14]

¹³Mơyŭn hiam yơh kơ hlơi pô hơduah ƀuh boh hiăp rơgơi, jing mơnuih hơmâo mă tŭ tơlơi thâo hluh,

¹⁴yuakơ boh hiăp rơgơi anŭn jing tŭ yua hloh kơ amrăk laih anŭn pơtơbiă rai tơlơi hiam hloh kơ mah yơh.

¹⁵Boh hiăp rơgơi anŭn jing yom hloh kơ abih bang boh pơtâo yom biă mă yơh; ƀu hơmâo tơlơi amoaih kiăng pă ôh dưi pơhơmu hăng boh hiăp rơgơi anŭn.

¹⁶Hăng tơngan gah hơnuă ñu, ñu pơyơr tơlơi hơdip sui, laih anŭn hăng tơngan gah ieo ñu, ñu brơi gơnam pơdrŏng săh laih anŭn tơlơi pơpŭ pơyom.

¹⁷Ñu či dui ba ih rơbat amăng khul jơlan mơak mơai, laih anŭn brơi kơ ih rơbat rơnŭk rơno̱m amăng abih bang khul jơlan ñu.

¹⁸Ñu jing sa phŭn kơyâo pha brơi tơlơi hơdip sui kơ ƀing hlơi pô ƀơ̆ng boh čroh ñu, laih anŭn ƀing hlơi djă̱ kơjăp ƀơi ñu či hơmâo tơlơi mơak mơai yơh.

¹⁹Hăng boh hiăp rơgơi yơh, Yahweh hrih pơjing rai lŏn tơnah anai, hăng tơlơi thâo hluh yơh Ñu pơdơ̆ng đĭ adai adih djơ̆ amăng anih gơñu pô.

²⁰Hăng tơlơi thâo pơmĭn yơh Ñu pơkăh pơpha hĭ khul ia dơlăm, laih anŭn brơi kơthul ƀlĕ tơdjŏh rai ia hơjan.

²¹Ơ dăm, djă̱ pioh bĕ tơlơi thâo rơđah laih anŭn tơlơi kơsem răng, anăm brơi hơdôm tơlơi anŭn tơplĕh đuaĭ hĭ ôh mơ̆ng anăp mơta ih.

²²Tui anŭn, gơñu či jing phŭn tơlơi hơdip sui kơ ih, laih anŭn jing kar hăng sa gơnam pơhrôp kơ tơkuai ih yơh.[15]

²³Ih ăt či rơbat nao ƀơi jơlan rơnŭk rơnua mơ̆n, sĭt plă̱ tơkai ih ƀu či teč tơhơneč ôh.

²⁴tơdang ih đih, ih ƀu či huĭ ôh; tơdang ih đih pĭt, ih či pĭt jơma̱n yơh.

²⁵Anăm huĭ ôh kơ tơlơi răm rai truh tơl blĭp blăp kar hăng tơlơi răm rơngiă truh ƀơi mơnuih sat ƀai,

²⁶yuakơ Yahweh či rơbat hrŏm ih kiăng kơ pơkơjăp ih laih anŭn či răk wai plă̱ tơkai ih ƀu juă djơ̆ čơđo̱ng ôh.

²⁷Anăm pơkơ̆ng hĭ ôh tơlơi hiam klă mơ̆ng hlơi pô kơƀah kiăng, tơdang ih dưi djru kơ pô anŭn.

²⁸Tơdang ih hơmâo laih hăng ih gơnam mơnuih re̱ng gah ih kơƀah kiăng, anăm pơtă kơ ñu tui anai ôh, “Rai hrơi pơgi hŏ, kâo či pha brơi kơ ih gơnam anŭn.”

²⁹Anăm pơkra mơneč sat pơkơdơ̆ng glaĭ hăng pô re̱ng gah ih ôh, jing pô hơdip rơnŭk rơno̱m jĕ giăm hăng ih.

³⁰Anăm pơhiăp brŏk kơ hlơi pô ƀu hơmâo tơhơnal tơlơi ôh, jing tơdang gơ̆ ƀu hơmâo pơruă hĭ ih ôh.

³¹Anăm pơiăng[16] hăng mơnuih ƀrưh mơhiăh ôh laih anŭn kŏn ngă tui khul jơlan ñu lơi,

³²yuakơ Yahweh hơƀak drak[17] kơ mơnuih ƀrưh ƀai samơ̆ Ñu brơi kơ mơnuih tơpă hơnơ̆ng jing gơyut gơyâo Ñu.

³³Yahweh hơtŏm păh kơ sang anŏ mơnuih sat ƀai, samơ̆ Ñu bơni hiam kơ sang anŏ mơnuih tơpă hơnơ̆ng.

³⁴Ñu djik djak kơ ƀing mơnuih pơgao ang djik djak samơ̆ Ñu pap khăp kơ ƀing luă gŭ.[18]

³⁵Mơnuih rơgơi či mă tŭ tơlơi pơpŭ pơyom, samơ̆ ƀing kơmlư či tŭ mă tơlơi mlâo mlañ yơh.