Read Jarai Pơrơtưh 4 Bible Online

Pơrơtưh 4 - Jarai bible

Pơrơtưh 4

¹Ơ ƀing ană đah rơkơi kâo hơi, hơmư̆ bĕ kơ tơlơi ama pơtô laĭ, laih anŭn pơđi̱ng tơngia bĕ kiăng kơ mă tŭ tơlơi thâo hluh.

²Kâo pha brơi kơ ƀing gih tơlơi hrăm hiam, tui anŭn anăm đuaĭ ataih hĭ ôh mơ̆ng tơlơi kâo pơtô laĭ.

³Tơdang kâo jing sa čô čơđai amăng sang anŏ ama kâo, jing kơnơ̆ng sa čô ană amĭ kâo khăp hơeng.

⁴Ama kâo ăt pơtô laĭ mơ̆n kơ kâo tui anai, “Djă̱ pioh bĕ khul boh hiăp kâo hăng abih pran jua ih; răk pioh bĕ khul tơlơi kâo pơđar laih anŭn ih či hơdip tơpă hiam yơh.

⁵Mă tŭ bĕ tơlơi rơgơi, mă tŭ bĕ tơlơi thâo hluh; anăm wơr bĭt hĭ khul boh hiăp kâo ƀôdah wir đuaĭ hĭ mơ̆ng gơñu ôh.

⁶Anăm hơngah lui hĭ ôh boh hiăp rơgơi, tui anŭn ñu či pơgang brơi kơ ih yơh; khăp bĕ kơ ñu, tui anŭn ñu či gak wai brơi kơ ih yơh.

⁷Ih khŏm mă tŭ boh hiăp rơgơi yuakơ ñu jing yom pơphan glông hloh, sĭt tơlơi mă tŭ tơlơi thâo hluh jing yom pơphan hloh kơ mă tŭ dram gơnam yơh.

⁸Pơyom đĭ boh hiăp rơgơi bĕ, tui anŭn ñu či pơdun đĭ ih yơh; pơư pơang ñu bĕ tui anŭn ñu či pơpŭ kơ ih yơh.

⁹Ñu či pioh sa kuăl bơnga[19] hiam rô̆ ƀơi akŏ ih kar hăng pơyơr kơ ih sa boh đoăn guang kơdrưh kơang yơh.”

¹⁰Ơ dăm, hơmư̆ bĕ laih anŭn tui gưt bĕ hơdôm tơlơi kâo laĭ, tui anŭn khul thŭn tơlơi hơdip ih či jing hĭ lu yơh.

¹¹Kâo kơčrâo brơi kơ ih đuaĭ tui jơlan boh hiăp rơgơi, sĭt kâo dui ba ih ƀơi khul jơlan tơpă brăng.

¹²Tui anŭn, tơdang ih rơbat nao, khul yak ih ƀu hơmâo hơget tơlơi či dưi pơgăn hĭ ôh; laih anŭn tơdang ih đuaĭ tañ, ih ƀu či teč tơhơneč ôh.

¹³Djă̱ kơjăp bĕ boh hiăp rơgơi anŭn, anăm lui raih hĭ ñu ôh; djă̱ pioh bĕ ñu, yuakơ ñu yơh jing phŭn kơ tơlơi hơdip ih.

¹⁴Anăm mŭt amăng jơlan mơnuih sat ƀai ƀôdah rơbat ƀơi tơlo̱ng ƀing mơnuih ƀrưh ƀai ôh.

¹⁵Pơbĕ đuaĭ hĭ bĕ mơ̆ng jơlan anŭn, anăm mŭt amăng anŭn ôh, samơ̆ wir đuaĭ hĭ bĕ mơ̆ng anŭn laih anŭn tŏ tui rơbat nao ƀơi jơlan tơpă ih bĕ,

¹⁶yuakơ ƀing sat ƀai anŭn ƀu thâo đih pĭt ôh tơl ƀing gơñu ngă tơlơi ƀrưh ƀai amơĭ; ƀing gơñu ƀu thâo pơdơi hĭ ôh tơl ƀing gơñu ngă brơi kơ arăng tơhneč rơbuh kăh.

¹⁷Gơnam ƀơ̆ng gơñu jing tơlơi sat ƀai laih anŭn gơnam mơñum gơñu jing tơlơi ƀrưh ƀai.

¹⁸Bơ kơ mơnuih tơpă hơnơ̆ng, jơlan gơñu jing hrup hăng suai tơlơi bơngač mơguah blung hlâo, pơčrang bơngač tui tơl yang hrơi đĭ glông.

¹⁹Samơ̆ jơlan mơnuih sat ƀai jing hrup hăng tơlơi kơnăm mơmŏt kơpa̱l; ƀing gơñu ƀu thâo ƀuh ôh hơget tơlơi ngă brơi kơ ƀing gơñu tơhneč rơbuh.

²⁰Ơ dăm, pơđi̱ng tơngia bĕ kơ tơlơi kâo laĭ; hơmư̆ pơñen bĕ kơ hơdôm boh hiăp kâo.

²¹Anăm brơi hơdôm boh hiăp anŭn đuaĭ hĭ ôh mơ̆ng anăp mơta ih, samơ̆ djă̱ pioh bĕ gơñu amăng pran jua ih,

²²yuakơ gơñu pha brơi tơlơi hơdip kơ ƀing hlơi pô thâo hluh kơ gơñu, laih anŭn jing pha brơi tơlơi hơmâo pran kơ abih drơi jan mơnuih anŭn yơh.

²³Răng pơñen hăng gak wai bĕ pran jua ih, yuakơ mơ̆ng anŭn yơh, ia dơmun tơlơi hơdip rô tơbiă.

²⁴Anăm brơi kơ amăng bah ih pơhiăp ƀlŏr ôh; laih anŭn kŏn brơi lơi tơƀông ih pơhiăp plư pleč.

²⁵Brơi bĕ mơta ih lăng tơpă nao pơanăp, pơdŏ bĕ tơlơi gle̱ng lăng mơta ih klă̱ anăp ƀơi tơlơi kơñăm ih.

²⁶Pơtơhnă̱ bĕ jơlan kơ plă̱ tơkai ih laih anŭn kơnơ̆ng rơbat tui bĕ tơlo̱ng pă kơjăp rơđah đôč.

²⁷Anăm wir nao gah hơnuă ƀôdah gah ieo ôh kiăng kơ plă̱ tơkai ih ƀu wir nao rơbat tui tơlơi sat ƀai ôh.