Read Jarai Adoh Hiam 2 Bible Online

Adoh Hiam 2 - Jarai bible

Adoh Hiam 2

¹Kâo jing boh bơnga dơnung Sarôn, laih anŭn jing sa boh bơnga pông yang amăng dơnung.

²Kar hăng sa boh bơnga pông yang amăng tŏng krah khul rơ̆k drơi hrup hăng anŭn mơ̆n gơyut khăp kâo amăng tŏng krah ƀing đah kơmơi.

³Hrup hăng sa ƀĕ kơyâo pôm amăng tŏng krah khul kơyâo glai kar hăng anŭn mơ̆n pô kâo khăp amăng tŏng krah ƀing tơdăm. Kâo mơak dŏ be̱r gah yŭ tơui ñu laih anŭn boh čroh[4] ñu jing mơmĭh hiam kơ kâo ƀơ̆ng yơh.

⁴Ñu ba kâo mŭt amăng anih phet ƀơ̆ng huă, laih anŭn hla gru ñu ƀơi gah ngŏ kâo jing tơlơi khăp yơh.

⁵Pơkơtang bĕ kâo hăng ƀañ boh kơƀâo krô, pơphrâo bĕ kâo hăng khul boh pôm, yuakơ kâo jing tơdu rơmơ̆n hăng tơlơi khăp yơh.

⁶Hơpăl tơngan gah ieo ñu gah yŭ akŏ kâo, laih anŭn hơpăl tơngan gah hơnuă ñu kuar mă kâo.

⁷Ơ ƀing ană đah kơmơi Yerusalaim hơi, kâo pơđu̱r kơ ƀing gih ƀuăn rơ̆ng yua mơ̆ng khul kơtŏng laih anŭn rơsa ania tơdron đang yơh tui anai: Anăm pơtơgŭ ƀôdah râo mơdưh ôh tơlơi khăp tơl truh mông tơlơi khăp anŭn amoaih kiăng yơh.

⁸Hơmư̆ bĕ! Adih pô kâo khăp! Ñu rai laih anai, kơplŏng găn hĭ khul čư̆, kơdăt rơgao hĭ khul bŏl čư̆.[5]

⁹Pô kâo khăp jing kar hăng sa drơi kơtŏng ƀôdah sa drơi rơsa tơno dăm.[6] Lăng adih! Ñu dŏ dơ̆ng pơ adih gah rŏng pơnăng gơmơi, hlak lăng gle̱ng mơ̆ng khul amăng phă̱, laih anŭn čơmư nao mơ̆ng driah rưng amăng phă̱.

¹⁰Pô kâo khăp pơhiăp hăng kâo tui anai, “Tơgŭ bĕ, Ơ gơyut khăp kâo hơi, Ơ pô hiam rô̆ hơi, rai hrŏm hăng kâo bĕ.

¹¹Anai nê! Bơyan puih rơgao hĭ laih, laih anŭn hơjan ăt hơmâo kho̱ng hĭ laih mơ̆n.

¹²Khul bơnga bluh rai ƀơi lŏn tơnah; bơyan adoh hơmâo truh laih, dơnai čim pơrơgŏm mơñi arăng hơmư̆ laih amăng anih lŏn ta.

¹³Kơyâo hra pơtơbiă rai boh tơsă hơnuăl[7] ñu; khul bơnga boh kơƀâo pơlar mơnâo ƀâo mơngưi gơñu. Tơgŭ rai bĕ, Ơ gơyut khăp kâo hơi; Ơ pô hiam rô̆ hơi, rai hrŏm hăng kâo bĕ.”

¹⁴Čim pơrơgŏm kâo dŏ amăng hơ̆ng dơ̆ng boh pơtâo, amăng khul anih kơdŏp hơet ƀơi akiăng čư̆, pơrơđah kơ kâo bĕ ƀô̆ mơta ih, brơi bĕ kâo hơmư̆ jua pơhiăp ih; yuakơ jua pơhiăp ih jing mơmĭh, laih anŭn ƀô̆ mơta ih jing rô̆ hiam.

¹⁵Mă brơi kơ ƀing gơmơi khul mơja bĕ, jing khul mơja anet pơrăm hĭ khul đang boh kơƀâo anŭn, yuakơ khul đang boh kơƀâo gơmơi hlak čơnŭh tơbiă bơnga.

¹⁶Pô kâo khăp jing lŏm kơ kâo laih anŭn kâo lŏm kơ ñu; ñu wai tơpul ñu tŏng krah khul bơnga pông yang.

¹⁷Tơl hrơi sêng brêng mơguah truh rai, laih anŭn tơlơi tơui kơnăm rơgao hĭ, Ơ pô kâo khăp hơi, glaĭ bĕ, laih anŭn jing bĕ kar hăng sa drơi kơtŏng ƀôdah sa drơi rơsa tơno dăm ƀơi khul bŏl čư̆ Bether.