Read Jarai Adoh Hiam 8 Bible Online

Adoh Hiam 8 - Jarai bible

Adoh Hiam 8

¹Kâo kwưh kiăng biă mă yơh tơdah ih jing hăng kâo hrup hăng sa ayŏng adơi, jing pô mĕm laih tơsâo amĭ kâo! Giŏng anŭn, tơdah kâo hơduah ƀuh ih gah rơngiao ƀơi jơlan, kâo či čum kơkuh kơ ih yơh, laih anŭn ƀu hơmâo hlơi pô djik djak kơ kâo ôh.

²Kâo či dui ba ih nao pơ sang amĭ kâo, jing nao pơ pô hơmâo pơtô laih kâo. Kâo či brơi kơ ih mơñum ia boh kơƀâo jơma̱n hiam hloh, laih anŭn ia mơmĭh mơ̆ng khul boh pumƀre kâo yơh.

³Hơpăl tơngan gah ieo ñu dŏ ƀơi gah yŭ akŏ kâo laih anŭn hơpăl tơngan gah hơnuă ñu kuar mă kâo.

⁴Ơ ƀing ană dra Yerusalaim hơi, kâo pơđu̱r kơ ƀing gih tui anai: Anăm pơtơgŭ ƀôdah râo mơdưh ôh tơlơi khăp tơl truh mông tơlơi khăp anŭn amoaih kiăng yơh.

⁵Hlơi jing pô đĭ rai mơ̆ng tơdron ha̱r anŭn laih anŭn ăh kơnang ƀơi pô ñu khăp lĕ? Gah yŭ phŭn kơyâo pôm anŭn yơh kâo râo mơdưh ih; pơ anih anŭn yơh amĭ ih pi kian kơ ih, pơ anih anŭn yơh amĭ ih tơkeng rai kơ ih.

⁶Pioh bĕ kâo jing kar hăng gru krư̆ kơđŏm amăng pran jua ih, jing kar hăng gru krư̆ kơđŏm ƀơi hơpăl tơngan ih; yuakơ tơlơi khăp jing kơtang hrup hăng tơlơi djai mơ̆n, laih anŭn tơlơi ga̱r jing kar hăng anih pơsat djă̱ pơkơ̆ng hĭ mơnuih nanao yơh. Tơlơi khăp anŭn jă̱ kar hăng jơlah apui hlia, jing hrup hăng sa jơlah apui prŏng kơtang yơh.

⁷Ia lu ƀu dưi pơthăm[13] hĭ tơlơi khăp ôh; khul ia krong kŏn dưi đung pơđuaĭ hĭ ñu lơi. Tơdah hlơi pô mă abih bang mŭk dram[14] sang ñu kiăng blơi mă tơlơi khăp, sĭt pô đah kơmơi či djik djak hĭ kơ tơlơi khăp anŭn biă mă yơh.

⁸Ƀing gơmơi hơmâo sa čô adơi dra, laih anŭn khul tơsâo ñu aka čă rai prŏng ôh. Hơget tơlơi ƀing gơmơi či ngă brơi kơ adơi gơmơi anŭn amăng hrơi arăng tơña kơ ñu lĕ?

⁹Tơdah ñu jing hrup hăng pơnăng plei, ƀing gơmơi či pơdơ̆ng đĭ khul sang kơtŭm amrăk ƀơi pơnăng plei anŭn yơh. Tơdah ñu jing kar hăng bah amăng, ƀing gơmơi či pŏng go̱m hĭ bah amăng anŭn hăng hơdôm hơnăl kơyâo sar yơh.

¹⁰Kâo jing kar hăng pơnăng, laih anŭn dua gah tơsâo kâo jing kar hăng khul sang kơtŭm. Tui anŭn, kâo hơmâo hơduah ƀuh laih tơlơi mơak ƀơi anăp mơta ñu, jing pô ba rai tơlơi rơnŭk rơno̱m kơ kâo.

¹¹Solomôn hơmâo đang boh kơƀâo amăng anih Baal-Hamôn; ñu jao đang anŭn kơ ƀing răk wai đang. Rĭm mơnuih wai anŭn khŏm ba rai boh čroh ñu sa-rơbâo sekel amrăk kơ nua yom ñu yơh.

¹²Samơ̆ đang boh kơƀâo kâo jing gơnam kâo yơh kiăng kơ brơi; Ơ Solomôn hơi, sa-rơbâo[15] sekel amrăk jing brơi kơ ih yơh, laih anŭn dua-rơtuh[16] kơ ƀing hlơi pô răk wai brơi boh čroh anŭn.

¹³Ơ pô dŏ amăng đang hrŏm hăng ƀing gơyut kâo hlak dŏ hơmư̆, brơi kâo hơmư̆ jua pơhiăp ih bĕ!

¹⁴Rai tañ bĕ, Ơ pô kâo khăp hơi, laih anŭn jing kar hăng sa drơi kơtŏng bĕ ƀôdah jing kar hăng sa drơi rơsa tơno dăm dŏ ƀơi khul čư̆ jrao ƀâo mơngưi.