Read Jarai Čŏk Hia 5 Bible Online

Čŏk Hia 5 - Jarai bible

Čŏk Hia 5

¹Ơ Yahweh hơi, rơkâo kơ Ih anăm wơr bĭt hĭ ôh hơdôm tơlơi hơmâo truh laih kơ ƀing gơmơi. Lăng ƀơi ƀing gơmơi bĕ, laih anŭn ƀuh tơlơi mlâo gơmơi.

²Ƀing tuai hơmâo mă hĭ laih anih lŏn gơmơi; ƀing tuai yơh dŏ hơdip amăng khul sang gơmơi.

³Ƀing ama gơmơi rŏh ayăt hơmâo pơdjai hĭ laih, laih anŭn ră anai ƀing amĭ gơmơi jing hĭ ƀing đah kơmơi kơmai.

⁴Ƀing gơmơi khŏm kla kơ ia ƀing gơmơi mơñum; ƀing gơmơi khŏm blơi mă djŭh ƀing gơmơi kiăng kơ apui.

⁵Arăng pơgŏ̱ ƀing gơmơi tơnap hrup hăng khul aseh glai ƀôdah khul aseh samô yơh, ƀing gơmơi gleh, samơ̆ arăng ƀu brơi kơ ƀing gơmơi pơdơi ôh.

⁶Kiăng kơ hơmâo djŏp gơnam ƀơ̆ng dưi dŏ hơdip, ƀing gơmơi nao rơkâo da̱n pơ ƀing Êjip laih anŭn pơ ƀing Assiria yơh.

⁷Ƀing ơi adon gơmơi ngă soh, samơ̆ ră anai ƀing gơñu rơngiă hĭ laih, laih anŭn ƀing gơmơi hlak tŭ gleh tơnap yuakơ khul tơlơi soh gơñu.

⁸Ƀing khua git gai gơmơi jing ƀing ƀu hloh kơ ƀing hlŭn ôh, laih anŭn ƀu hơmâo hlơi pô ôh dưi pơklaih hĭ ƀing gơmơi mơ̆ng tơlơi dưi gơñu.

⁹Ƀing pơdjai mơnuih ur pơgrao gah rơngiao kơ plei; ƀing gơmơi pơsăn hĭ tơlơi hơdip gơmơi yơh tơdang ƀing gơmơi tơbiă nao hơduah gơnam ƀơ̆ng.

¹⁰Tơlơi ư̆ rơpa hơmâo ngă kơ ƀing gơmơi duăm hĭr hăr tơl klĭ gơmơi pơiă hlơr hrup hăng aki̱n apui yơh.

¹¹Arăng gŏ̱ hĭ ƀing bơnai gơmơi amăng plei Ziôn; amăng rĭm plei pla Yudah arăng pơgŏ̱ hĭ ƀing ană dra hơči̱h gơmơi kiăng kơ đih hrŏm.

¹²Arăng mă pơđuaĭ hĭ ƀing khua djă̱ akŏ gơmơi laih anŭn yol pơdjai hĭ; laih anŭn ƀu pơpŭ ôh kơ ƀing kŏng tha gơmơi.

¹³Arăng pơgŏ̱ ƀing hlak ai tơdăm gơmơi kiăng kơ kuă braih hrup hăng ƀing hlŭn; jing ƀing čơđai đah rơkơi rơbat sêng grêng gah yŭ khul kơyâo kơtraŏ yơh.

¹⁴Ƀing tha rơma ƀu dŏ be̱r ƀơi amăng ja̱ng plei dơ̆ng tah, laih anŭn ƀing hlak ai kŏn kơčĕ rai tơlơi ayŭ lơi.

¹⁵Ƀing gơmơi ƀu hơmâo tơlơi hơ̆k mơak dơ̆ng tah; ƀing gơmơi hơmâo tơlơi rơngot hơning pơala kơ tơlơi suang hơ̆k mơak.

¹⁶Ƀu hơmâo hơget dơ̆ng tah kơ ƀing gơmơi kiăng kơ pơang. Ƀing gơmơi ngă soh laih, laih anŭn ră anai ƀing arăng hlak pơrai hĭ ƀing gơmơi.

¹⁷Ƀing gơmơi ruă biă mă amăng jua bơngăt gơmơi, laih anŭn tơnap ƀuh yơh mơ̆ng ia mơta gơmơi,

¹⁸yuakơ Čư̆ Ziôn[5] dŏ hiăl măl hông hang, laih anŭn khul asâo glai ur hyu amăng anih răm rai anŭn.

¹⁹Samơ̆ Ih yơh, Ơ Yahweh ăh, jing pơtao hlŏng lar laih anŭn či git gai truh kơ rơnŭk hơnăl tuč.

²⁰Yua hơget Ih hơmâo lui raih hĭ ƀing gơmơi sui biă mă lĕ? Ih ƀu či hơdơr kơ ƀing gơmơi dơ̆ng tah hă?

²¹Ba glaĭ ƀing gơmơi pơ Ih bĕ, Ơ Yahweh ăh! Ba glaĭ ƀing gơmơi bĕ! Rŭ̱ pơdơ̆ng đĭ bĕ tơlơi ang yang đưm đă gơmơi.

²²Ƀôdah hiư̆m ngă, Ih hơmâo hơngah lui hĭ ƀing gơmơi hlŏng lar laih hă? Ih hil kơ ƀing gơmơi tơl ƀu hơmâo guai pơkă ôh hă?