Read Jarai Yôêl 1 Bible Online

Yôêl 1 - Jarai bible

Yôêl 1

¹Anai jing boh hiăp Yahweh brơi kơ Yôêl ană đah rơkơi Pethuêl.

²Ơ ƀing kŏng tha, hơmư̆ kơ tơlơi anai bĕ! Hơmư̆ bĕ, Ơ abih bang mơnuih amăng anih lŏn Yudah anai. Hơmâo mơ̆ tơlơi truh hrup hăng anai amăng rơnŭk gih ƀôdah amăng rơnŭk ƀing ơi adon gih?

³Ră ruai bĕ kơ ană bă gih, laih anŭn brơi bĕ ƀing ană bă gih ruai glaĭ kơ ƀing ană bă gơñu, laih anŭn ƀing ană bă gơñu ră ruai kơ rơnŭk tơdơi kơ gơñu dơ̆ng.

⁴Hơget gơnam tăm kơtop tơpul pioh glaĭ khul kơtop prŏng ƀơ̆ng hĭ; hơget gơnam tăm khul kơtop prŏng pioh glaĭ khul kơtop kơplŏng ƀơ̆ng hĭ; hơget gơnam tăm khul kơtop kơplŏng pioh glaĭ khul kơtop pơkŏn dơ̆ng ƀơ̆ng hĭ.

⁵Mơdưh bĕ, Ơ ƀing gih jing ƀing măt tơpai, hăng hia bĕ! Pơkrao bĕ yuakơ tơpai boh kơƀâo phrâo, yuakơ khul kơtop hơmâo hơñăk[1] đuaĭ hĭ laih mơ̆ng tơƀông gih.

⁶Sa lŏn čar hơmâo blah juă hĭ laih anih lŏn Kâo, gơñu kơtang laih anŭn lu biă mă; lŏn čar anŭn hơmâo tơgơi hrup hăng tơgơi rơmung dŭl, khul griăng[2] ñu hrup hăng griăng rơmung dŭl ania.[3]

⁷Ñu hơmâo pơrai hĭ khul boh kơƀâo Kâo laih anŭn pơrai hĭ khul kơyâo hra Kâo. Ñu hơmâo tơluăh lo̱k hĭ khul hơmok kơyâo anŭn laih anŭn glŏm hĭ, lui hĭ khul than kơyâo jing hĭ kô̱̆.

⁸Kơŭ kơuăn bĕ hrup hăng sa čô dra hơči̱h amăng ao tâo[4] rơngot hơning yuakơ pô khăp ñu amăng thŭn hlak ai rơngiă rơngiăm.

⁹Gơnam pơyơr pơdai laih anŭn gơnam pơyơr mơñum ƀu hơmâo dơ̆ng tah amăng sang Yahweh. Ƀing khua ngă yang rơngot hơning, jing ƀing mă bruă ƀơi anăp Yahweh.

¹⁰Khul đang hơma răm rai, hơma tơnah thu krô; pơdai hơmâo răm rai laih, ia boh kơƀâo thu krô, ia rơmuă kơƀah hĭ laih.

¹¹Kơŭ kơuăn bĕ, Ơ ƀing gih jing ƀing mă bruă hơma; pơkrao bĕ, Ơ ƀing gih jing ƀing pla boh kơƀâo; kơŭ kơuăn bĕ kơ pơdai kơtor laih anŭn pơdai kơtur, yuakơ đang hơma anŭn răm rai laih ƀu thâo pĕ hơpuă tah.

¹²Khul hrĕ boh kơƀâo jing hĭ gliu krô laih anŭn kơyâo hra jing hĭ gliu tơdu; kơyâo pumƀre, kơyâo đung kri laih anŭn kơyâo pôm, abih bang kơyâo amăng đang hơma jing hĭ thu krô. Sĭt yơh tơlơi mơak mơnuih mơnam đuaĭ hĭ thĕng laih.

¹³Čut hơô mă bĕ ao tâo, Ơ ƀing khua ngă yang, hăng čŏk bĕ! pơkrao bĕ, Ơ ƀing gih jing ƀing mă bruă ƀơi anăp kơnưl ngă yang. Mŭt rai bĕ, đŏm bĕ mlam hăng ao tâo, Ơ ƀing gih jing ƀing mă bruă ƀơi anăp Ơi Adai kâo; yuakơ gơnam pơyơr pơdai laih anŭn gơnam pơyơr mơñum kơƀah hĭ laih amăng sang yang Ơi Adai gih.

¹⁴Pơhaih bĕ sa tơlơi kŏm ƀơ̆ng huă rơgoh hiam; iâu pơƀut bĕ sa tơlơi pơjơnum rơgoh hiam. Iâu rai bĕ ƀing kŏng tha laih anŭn abih bang ƀing hlơi pô hơdip amăng anih lŏn anai kiăng kơ nao pơ sang Yahweh Ơi Adai gih, laih anŭn iâu kwưh bĕ kơ Yahweh.

¹⁵Anai nê, răm ƀăm yơh kơ hrơi anŭn! Yuakơ hrơi Yahweh jĕ laih; hrơi anŭn či rai hrup hăng tơlơi răm rai mơ̆ng Pô Dưi Kơtang yơh.[5]

¹⁶Ƀu djơ̆ ôh hă khul kơtop hơmâo mă pơđuaĭ laih gơnam ƀơ̆ng mơ̆ng anăp mơta ta, wơ̆t hăng tơlơi hơ̆k kơdơ̆k mơak mơai mơ̆ng sang Ơi Adai ta?

¹⁷Khul pơjĕh brŭ djai hĭ gah yŭ khul tơkol lŏn. Khul pưk jing hĭ răm rai, khul atông hơmâo pơčah răm hĭ laih, yuakơ pơdai ƀu hơmâo ôh.

¹⁸Tơpul rơmô ur pơkrao biă mă! Tơpul hlô mơnơ̆ng rong anet rŭng răng yuakơ gơñu ƀu hơmâo đang rơ̆k ôh; wơ̆t hăng tơpul triu ăt tơnap tap mơ̆n.

¹⁹Kơ Ih yơh, Ơ Yahweh, kâo iâu kwưh, yuakơ apui hơmâo hơr ƀơ̆ng hĭ laih khul đang rơ̆k mơda, laih anŭn jơlah apui hơmâo čuh hơr hĭ laih abih bang kơyâo pơtâo amăng đang hơma.

²⁰Wơ̆t hăng hlô mơnơ̆ng glai ăt iâu kwưh kơ Ih mơ̆n; khul hơnŏh ia hơmâo kho̱t hĭ laih laih anŭn apui hơmâo hơr ƀơ̆ng hĭ laih khul đang rơ̆k mơda.