Read Jarai Amôs 2 Bible Online

Amôs 2 - Jarai bible

Amôs 2

¹Anai yơh jing tơlơi Yahweh laĭ: “Ƀing Môab ngă soh nanao, yuakơ anŭn yơh, sĭt Kâo či pơkơhma̱l hĭ ƀing gơñu yơh, yuakơ ñu ƀu pơpŭ ôh hăng čuh hĭ khul tơlang pơtao ƀing Edôm jing hĭ hơbâo laih;[8]

²tui anŭn Kâo či mơit rai apui amăng anih lŏn Môab, tui anŭn apui či ƀơ̆ng hĭ khul kơđông kơtang plei pơnăng Keriyôt. Môab či djai amăng tơlơi ngañ bañ prŏng tŏng krah khul tơlơi ur dreo pơblah laih anŭn dơnai tơdiăp ayŭp yơh.

³Kâo či pơrai hĭ khua git gai tŏng krah anih lŏn anŭn, hăng pơdjai hĭ abih bang ƀing khua moa hrŏm hăng khua git gai anŭn pơ anih anŭn mơ̆n,” anŭn yơh jing tơlơi Yahweh pơhiăp.

⁴Anai yơh jing tơlơi Yahweh laĭ: “Ƀing Yudah ngă soh nanao, yuakơ anŭn yơh, sĭt Kâo či pơkơhma̱l hĭ ƀing gơñu yơh, yuakơ gơñu hơmâo hơngah hĭ laih tơlơi juăt Kâo, laih anŭn ƀu hơmâo djă̱ pioh khul tơlơi pơtă pơtăn Kâo ôh, samơ̆ khul tơlơi ƀlŏr gơñu hơmâo ba gơñu jrôk jơlan, khul tơlơi ƀlŏr anŭn yơh ƀing ơi adon gơñu hơmâo kiaŏ tui laih.

⁵Tui anŭn, Kâo či mơit apui ƀơi anih lŏn ƀing Yudah laih anŭn apui či ƀơ̆ng hĭ khul kơđông kơtang plei Yerusalaim.”

⁶Anai yơh jing tơlơi Yahweh laĭ: “Ƀing Israel ngă soh nanao, yuakơ anŭn yơh, sĭt Kâo či pơkơhma̱l hĭ ƀing gơñu yơh, yuakơ gơñu sĭ hĭ mơnuih tơpă hơnơ̆ng kơ amrăk,[9] laih anŭn mơnuih kơƀah kơƀap kơ sa pe̱r tơkhŏ sanđal.

⁷Gơñu kơtư̆ juă ƀing ƀun rin kar hăng juă ƀơi akŏ ƀing gơ̆ ƀơi ngŏ ƀruih lŏn tơnah laih anŭn hơngah hĭ tơlơi tơpă kơ ƀing mơnuih arăng kơtư̆ juă. Ama hăng ană đah rơkơi nao dŏ hrŏm sa čô đah kơmơi hlŭn, tui anŭn yơh pơgrĭ hĭ anăn rơgoh hiam Kâo.

⁸Gơñu đih jĕ rĭm boh kơnưl ƀơi khul ao hơmâo djă̱ kơnăl laih ƀuăn kiăng kơ brơi glaĭ; amăng sang yang lŏm kơ yang gơñu gơñu mơñum hĭ tơpai boh kơƀâo jing gơnam gơñu đŭ wă.

⁹“Samơ̆ Kâo pơrai laih mơnuih Amôr ƀơi anăp gơñu, wơ̆t tơdah ƀing mơnuih anŭn prŏng glông hrup hăng khul kơyâo sar, laih anŭn kơtang hrup hăng khul kơyâo sen. Kâo pơrai laih boh čroh[10] ñu gah ngŏ adih laih anŭn khul akha ñu gah yŭ anai.[11]

¹⁰“Kâo ăt ba tơbiă laih ƀing gih mơ̆ng čar Êjip, laih anŭn Kâo dui ba ƀing gih pă̱pluh thŭn amăng tơdron ha̱r, kiăng kơ brơi ƀing gih anih lŏn ƀing Amôr.

¹¹Kâo ăt ruah mă ƀing pô pơala tŏng krah ƀing ană đah rơkơi gih laih anŭn ƀing Nazir mơ̆ng ƀing hlak ai gih. Tơlơi anŭn ƀu djơ̆ ôh hă, Ơ ƀing ană plei Israel?” Anŭn yơh jing tơlơi Yahweh pơhaih.[12]

¹²“Samơ̆ ƀing gih ngă brơi kơ ƀing Nazir mơñum tơpai boh kơƀâo, laih anŭn pơkơđiăng kơ ƀing pô pơala ƀu dưi laĭ lui hlâo ôh.

¹³“Anai nê, Kâo či pơsăn hĭ ƀing gih amăng anih gih yơh, kar hăng sa boh rơdêh trŭt kơtraŏ pơsăn hĭ gah yŭ ñu tơdang arăng dap mŭt bă pơdai.

¹⁴Mơnuih hơmăr samơ̆ ñu ƀu dưi đuaĭ kơdŏp ôh, ƀing mơnuih kơtang samơ̆ gơñu ƀu anăm ngă hơget tơlơi ôh, laih anŭn tơhan kơtang ăt kŏn dưi pơklaih tơlơi hơdip ñu pô lơi.

¹⁵mơnuih djă̱ hraŏ samơ̆ ƀu dưi dŏ kơjăp ôh, ƀing tơhan đuaĭ hơmăr ƀu dưi đuaĭ tơklaih hĭ ôh, laih anŭn mơnuih tơhan đĭ aseh kŏn dưi pơklaih tơlơi hơdip ñu pô lơi.

¹⁶Wơ̆t tơdah ƀing tơhan khĭn kơtang biă mă ăt či glŏm lui hĭ gơnam blah ñu hăng đuaĭ kơdŏp mơ̆n ƀơi hrơi anŭn.” Anŭn yơh jing tơlơi Yahweh pơhiăp.