Read Jarai Yap 1 Bible Online

Yap 1 - Jarai bible

Yap 1

¹Ƀơi hrơi tal sa blan tal dua, Yahweh pơhiăp hăng Môseh amăng Sang Khăn Pơjơnum amăng Tơdron Ha̱r Sinai tơdơi kơ ƀing Israel tơbiă mơ̆ng čar Êjip. Ñu laĭ tui anai,[1]

²“Yap bĕ abih bang akŏ mơnuih ƀing Israel tui hăng hơdôm djuai laih anŭn sang anŏ gơñu. Čih bĕ anăn rĭm čô đah rơkơi,

³Ih laih anŭn A̱rôn, tui hăng tơpul grup gơñu abih bang ƀing đah rơkơi amăng Israel čơdơ̆ng mơ̆ng duapluh thŭn pơ ngŏ jing ƀing dưi nao pơblah.

⁴Sa čô đah rơkơi mơ̆ng rĭm kơnung djuai jing akŏ kơ sang anŏ ñu pô yơh či djru ih.

⁵Anai jing hơdôm anăn ƀing đah rơkơi jing ƀing djru ƀing gih: mơ̆ng djuai Reuben jing Elizur ană đah rơkơi Sedeur;

⁶mơ̆ng djuai Simeôn jing Selumiel ană đah rơkơi Zurisađai;

⁷mơ̆ng djuai Yudah jing Nahsôn ană đah rơkơi Amminadab;

⁸mơ̆ng djuai Issakhar jing Nethanêl ană đah rơkơi Zuar;

⁹mơ̆ng djuai Zebulun jing Eliab ană đah rơkơi Helôn;

¹⁰mơ̆ng djuai Ephraim, ană đah rơkơi Yôsêp, jing Elisama ană đah rơkơi Ammihud; mơ̆ng djuai Manasseh, ană đah rơkơi Yôsêp, jing Gamaliel ană đah rơkơi Phedahzur;

¹¹mơ̆ng djuai Benyamin jing Abidan ană đah rơkơi Gideôni;

¹²mơ̆ng djuai Dan jing Ahiezer ană đah rơkơi Ammisađai;

¹³mơ̆ng djuai Aser jing Phagiel ană đah rơkơi Okhran;

¹⁴mơ̆ng djuai Gad jing Eliasap ană đah rơkơi Deuel;

¹⁵mơ̆ng Naptali jing Ahira ană đah rơkơi Ênan.”

¹⁶Anai yơh jing ƀing đah rơkơi ƀing ană plei ruah laih, jing ƀing khua kơ kơnung djuai ơi adon gơñu. Ƀing gơñu ăt jing akŏ kơ ƀing djuai Israel mơ̆n.

¹⁷Môseh hăng A̱rôn mă ba ƀing mơnuih jing ƀing anăn gơñu hơmâo ruah laih gah ngŏ anŭn,

¹⁸laih anŭn ƀing gơñu iâu pơƀut glaĭ abih bang ană plei ƀơi hrơi anŭn mơtam, jing hrơi tal sa amăng blan tal dua. Ƀing ană plei pơrơđah ƀing ơi adon gơñu tui hăng hơdôm djuai, tui khul sang anŏ gơñu laih anŭn čih anăn rĭm čô đah rơkơi čơdơ̆ng mơ̆ng duapluh thŭn pơ ngŏ,

¹⁹kar hăng Yahweh pơđar laih kơ Môseh. Tui anŭn yơh, Môseh yap ƀing Israel amăng Tơdron Ha̱r Sinai:

²⁰Mơ̆ng ƀing djuai Reuben jing ană kơčoa đah rơkơi Israel: Abih bang ƀing đah rơkơi mơ̆ng duapluh thŭn pơ ngŏ jing ƀing dưi nao pơblah, arăng čih anăn rĭm čô ƀing gơñu tui hluai hăng ƀing djuai laih anŭn ƀing sang anŏ gơñu.

²¹Mrô yap mơ̆ng djuai Reuben hơmâo pă̱pluh-năm-rơbâo rơma-rơtuh[2] čô.

²²Mơ̆ng ƀing djuai Simeôn: Abih bang ƀing đah rơkơi mơ̆ng duapluh thŭn pơ ngŏ jing ƀing dưi nao pơblah, arăng čih anăn rĭm čô ƀing gơñu tui hluai hăng ƀing djuai laih anŭn ƀing sang anŏ gơñu.

²³Mrô yap mơ̆ng djuai Simeôn hơmâo rơmapluh-duapăn-rơbâo klâo-rơtuh[3] čô.

²⁴Mơ̆ng ƀing djuai Gad: Abih bang ƀing đah rơkơi mơ̆ng duapluh thŭn pơ ngŏ jing ƀing dưi nao pơblah, arăng čih anăn rĭm čô ƀing gơñu tui hluai hăng ƀing djuai laih anŭn ƀing sang anŏ gơñu.

²⁵Mrô yap mơ̆ng djuai Gad hơmâo pă̱pluh-rơma-rơbâo năm-rơtuh rơmapluh[4] čô.

²⁶Mơ̆ng ƀing djuai Yudah: Abih bang ƀing đah rơkơi mơ̆ng duapluh thŭn pơ ngŏ jing ƀing dưi nao pơblah, arăng čih anăn rĭm čô ƀing gơñu tui hluai hăng ƀing djuai laih anŭn ƀing sang anŏ gơñu.

²⁷Mrô yap mơ̆ng djuai Yudah hơmâo tơjuhpluh-pă̱-rơbâo năm-rơtuh[5] čô.

²⁸Mơ̆ng ƀing djuai Issakhar: Abih bang ƀing đah rơkơi mơ̆ng duapluh thŭn pơ ngŏ jing ƀing dưi nao pơblah, arăng čih anăn rĭm čô ƀing gơñu tui hluai hăng ƀing djuai laih anŭn ƀing sang anŏ gơñu.

²⁹Mrô yap mơ̆ng djuai Issakhar hơmâo rơmapluh-pă̱-rơbâo pă̱-rơtuh[6] čô.

³⁰Mơ̆ng ƀing djuai Zebulun: Abih bang ƀing đah rơkơi mơ̆ng duapluh thŭn pơ ngŏ jing ƀing dưi nao pơblah, arăng čih anăn rĭm čô ƀing gơñu tui hluai hăng ƀing djuai laih anŭn ƀing sang anŏ gơñu.

³¹Mrô yap mơ̆ng djuai Zebulun hơmâo rơmapluh-tơjuh-rơbâo pă̱-rơtuh[7] čô.

³²Mơ̆ng ƀing ană đah rơkơi Yôsêp: Mơ̆ng ƀing djuai Ephraim: Abih bang ƀing đah rơkơi mơ̆ng duapluh thŭn pơ ngŏ jing ƀing dưi nao pơblah, arăng čih anăn rĭm čô ƀing gơñu tui hluai hăng ƀing djuai laih anŭn ƀing sang anŏ gơñu.

³³Mrô yap mơ̆ng djuai Ephraim hơmâo pă̱pluh-rơbâo rơma-rơtuh[8] čô.

³⁴Mơ̆ng ƀing djuai Manasseh: Abih bang ƀing đah rơkơi mơ̆ng duapluh thŭn pơ ngŏ jing ƀing dưi nao pơblah, arăng čih anăn rĭm čô ƀing gơñu tui hluai hăng ƀing djuai laih anŭn ƀing sang anŏ gơñu.

³⁵Mrô yap mơ̆ng djuai Manasseh hơmâo klâopluh-dua-rơbâo dua-rơtuh[9] čô.

³⁶Mơ̆ng ƀing djuai Benyamin: Abih bang ƀing đah rơkơi mơ̆ng duapluh thŭn pơ ngŏ jing ƀing dưi nao pơblah, arăng čih anăn rĭm čô ƀing gơñu tui hluai hăng ƀing djuai laih anŭn ƀing sang anŏ gơñu.

³⁷Mrô yap mơ̆ng djuai Benyamin hơmâo klâopluh-rơma-rơbâo pă̱-rơtuh[10] čô.

³⁸Mơ̆ng ƀing djuai Dan: Abih bang ƀing đah rơkơi mơ̆ng duapluh thŭn pơ ngŏ jing ƀing dưi nao pơblah, arăng čih anăn rĭm čô ƀing gơñu tui hluai hăng ƀing djuai laih anŭn ƀing sang anŏ gơñu.

³⁹Mrô yap mơ̆ng djuai Dan hơmâo nămpluh-dua-rơbâo tơjuh-rơtuh[11] čô.

⁴⁰Mơ̆ng ƀing djuai Aser: Abih bang ƀing đah rơkơi mơ̆ng duapluh thŭn pơ ngŏ jing ƀing dưi nao pơblah, arăng čih anăn rĭm čô ƀing gơñu tui hluai hăng ƀing djuai laih anŭn ƀing sang anŏ gơñu.

⁴¹Mrô yap mơ̆ng djuai Aser hơmâo pă̱pluh-sa-rơbâo rơma-rơtuh[12] čô.

⁴²Mơ̆ng ƀing djuai Naptali: Abih bang ƀing đah rơkơi mơ̆ng duapluh thŭn pơ ngŏ jing ƀing dưi nao pơblah, arăng čih anăn rĭm čô ƀing gơñu tui hluai hăng ƀing djuai laih anŭn ƀing sang anŏ gơñu.

⁴³Mrô yap mơ̆ng djuai Naptali hơmâo rơmapluh-klâo-rơbâo pă̱-rơtuh[13] čô.

⁴⁴Anai jing ƀing đah rơkơi ƀing Israel, Môseh, A̱rôn laih anŭn pluh-dua čô khua ƀing Israel, jing rĭm čô pơala kơ sang anŏ ñu pô, hơmâo yap laih.

⁴⁵Abih bang ƀing Israel čơdơ̆ng mơ̆ng duapluh thŭn pơ ngŏ jing ƀing dưi nao pơblah, arăng yap ƀing gơñu tui hluai hăng ƀing sang anŏ gơñu.

⁴⁶Mrô yap abih bang hơmâo năm-rơtuh klâo-rơbâo rơma-rơtuh rơmapluh[14] čô.

⁴⁷Wơ̆t tơdah tui anŭn, ƀing sang anŏ djuai Lêwi, arăng ƀu yap ƀing gơñu hrŏm hăng ƀing djuai Israel pơkŏn ôh,

⁴⁸yuakơ Yahweh hơmâo pơhiăp laih hăng Môseh tui anai,

⁴⁹“Anăm yap ôh djuai Lêwi ƀôdah pơmŭt ƀing gơñu amăng mrô yap hăng ƀing Israel pơkŏn.

⁵⁰Kơđai glaĭ, jao bĕ bruă kơ ƀing Lêwi jing ƀing či răk wai sang khăn Tơlơi Gơ̆ng Jơlan hrŏm hăng abih bang hơget gơnam lŏm kơ sang khăn anŭn yơh. Tơdang ƀing gih rơbat nao, ƀing gơñu yơh či glăm ba sang khăn laih anŭn abih bang gơnam amăng anŭn; samơ̆ tơdang ƀing gih jưh, ƀing gơñu či răk wai gơnam anŭn hăng pơdơ̆ng sang khăn gơñu pô jum dar anŭn yơh.

⁵¹Tơdang hlâo kơ ƀing gih či rơbat nao dơ̆ng, ƀing Lêwi yơh či ruh hĭ sang khăn anŭn, laih anŭn tơdang ƀing gih dŏ jưh, ƀing Lêwi yơh či pơdơ̆ng đĭ sang khăn anŭn. Hlơi pô rơngiao kơ ƀing Lêwi nao jĕ pơ anih anŭn, arăng khŏm pơdjai hĭ pô anŭn yơh.

⁵²Ƀing Israel khŏm pơdơ̆ng đĭ hơdôm sang khăn gơñu tui hăng grup, rĭm čô dŏ amăng anih jưh ñu pô tui hăng hla gru ñu pô yơh.

⁵³Samơ̆ ƀing Lêwi či pơdơ̆ng hơdôm sang khăn gơñu pô jum dar sang khăn Tơlơi Gơ̆ng Jơlan, tui anŭn yơh Ơi Adai ƀu či hil kơ ƀing ană plei Israel dơ̆ng ôh. Ƀing Lêwi yơh či grơ̆ng glăm kơ bruă răk wai sang khăn Tơlơi Gơ̆ng Jơlan anŭn.”

⁵⁴Ƀing Israel ngă abih bang tơlơi anŭn kar hăng Yahweh hơmâo pơđar laih kơ Môseh.