Read Jarai Yap 2 Bible Online

Yap 2 - Jarai bible

Yap 2

¹Yahweh pơtă kơ Môseh hăng A̱rôn tui anai,

²“Tơdang ƀing Israel dŏ jưh, ƀing gơñu khŏm pơdơ̆ng đĭ hơdôm sang khăn gơñu jum dar Sang Khăn Pơjơnum samơ̆ ataih ƀiă mơ̆ng anŭn; laih anŭn rĭm čô đah rơkơi akŏ sang khŏm dŏ tui hăng khul hla gru sang anŏ ñu pô yơh.”

³Ƀơi gah ngŏ̱, anăp nao pơ yang hrơi ƀlĕ, ƀing grup anih jưh djuai Yudah či pơdơ̆ng đĭ hơdôm sang khăn tui hăng hla gru gơñu. Pô khua ƀing Yudah jing Nahsôn ană đah rơkơi Amminadab.

⁴Mrô yap ƀing dưi jing tơhan amăng grup ñu hơmâo tơjuhpluh-pă̱-rơbâo năm-rơtuh[15] čô.

⁵Djuai Issakhar či dŏ jưh tŏ tui ƀing gơñu anŭn yơh. Pô khua ƀing djuai Issakhar jing Nethanêl ană đah rơkơi Zuar.

⁶Mrô yap ƀing dưi jing tơhan amăng grup ñu hơmâo rơmapluh-pă̱-rơbâo pă̱-rơtuh[16] čô.

⁷Djuai Zebulun či dŏ jưh tŏ tui anŭn yơh. Pô khua ƀing djuai Zebulun jing Eliab ană đah rơkơi Helôn.

⁸Mrô yap ƀing dưi jing tơhan amăng grup ñu hơmâo rơmapluh-tơjuh-rơbâo pă̱-rơtuh[17] čô.

⁹Abih bang ƀing anŭn dŏ jưh tŏ tui amăng anih jưh djuai Yudah, tui hluai hăng hơdôm grup gơñu, mrô yap ƀing dưi jing tơhan amăng klâo grup anŭn hơmâo sa-rơtuh sapănpluh-năm-rơbâo pă̱-rơtuh[18] čô. Ƀing gơñu yơh či rơbat nao hlâo tơdang ƀing Israel rơbat nao.

¹⁰Ƀơi gah thu̱ng, ƀing grup anih jưh djuai Reuben či dŏ jưh tui hăng hla gru gơñu pô. Pô khua ƀing djuai Reuben jing Elizur ană đah rơkơi Sedeur.

¹¹Mrô yap ƀing dưi jing tơhan amăng grup ñu hơmâo pă̱pluh-năm-rơbâo rơma-rơtuh[19] čô.

¹²Djuai Simeôn či dŏ jưh tŏ tui ƀing gơñu anŭn yơh. Pô khua ƀing djuai Simeôn jing Selumiel ană đah rơkơi Zurisađai.

¹³Mrô yap ƀing dưi jing tơhan amăng grup ñu hơmâo rơmapluh-duapăn-rơbâo klâo-rơtuh[20] čô.

¹⁴Djuai Gad či dŏ jưh tŏ tui anŭn yơh. Pô khua ƀing djuai Gad jing Eliasap ană đah rơkơi Deuel.

¹⁵Mrô yap ƀing dưi jing tơhan amăng grup ñu hơmâo pă̱pluh-rơma-rơbâo năm-rơtuh rơmapluh[21] čô.

¹⁶Abih bang ƀing anŭn dŏ jưh tŏ tui anih jưh djuai Reuben, tui hluai hăng hơdôm grup gơñu, mrô yap ƀing dưi jing tơhan amăng klâo grup anai hơmâo sa-rơtuh rơmapluh-sa-rơbâo pă̱-rơtuh rơmapluh[22] čô. Ƀing gơñu yơh či rơbat nao tal dua tơdang ƀing Israel rơbat nao.

¹⁷Giŏng anŭn, ƀing Lêwi či čơkŭng Sang Khăn Pơjơnum laih anŭn či tơbiă nao tŏng krah ƀing Israel. Abih bang djuai Israel ăt či tơbiă nao hrup hăng ƀing gơñu pơdơ̆ng đĭ anih jưh gơñu mơ̆n, rĭm čô đuaĭ tui anih jưh ñu pô ăt tui hăng hla gru ñu pô yơh.

¹⁸Ƀơi gah yŭ̱, ƀing grup anih jưh djuai Ephraim či dŏ jưh tui hăng hla gru gơñu pô. Pô khua ƀing djuai Ephraim jing Elisama ană đah rơkơi Ammihud.

¹⁹Mrô yap ƀing dưi jing tơhan amăng grup ñu hơmâo pă̱pluh-rơbâo rơma-rơtuh[23] čô.

²⁰Djuai Manasseh či dŏ jưh tŏ tui ƀing gơñu anŭn yơh. Pô khua ƀing djuai Manasseh jing Gamaliel ană đah rơkơi Phedahzur.

²¹Mrô yap ƀing dưi jing tơhan amăng grup ñu hơmâo klâopluh-dua-rơbâo dua-rơtuh[24] čô.

²²Djuai Benyamin či dŏ jưh tŏ tui anŭn yơh. Pô khua ƀing djuai Benyamin jing Abidan ană đah rơkơi Gideôni.

²³Mrô yap ƀing dưi jing tơhan amăng grup ñu hơmâo klâopluh-rơma-rơbâo pă̱-rơtuh[25] čô.

²⁴Abih bang ƀing anŭn dŏ jưh amăng anih jưh djuai Ephraim, tui hluai hăng hơdôm grup gơñu, mrô yap ƀing dưi jing tơhan amăng klâo grup anai hơmâo sa-rơtuh sapăn-rơbâo sa-rơtuh[26] čô. Ƀing gơñu yơh či tơbiă nao tal klâo tơdang ƀing Israel tơbiă nao.

²⁵Ƀơi gah dư̱r, ƀing grup anih jưh djuai Dan yơh či dŏ jưh tui hăng hla gru gơñu pô. Pô khua ƀing djuai Dan jing Ahiezer ană đah rơkơi Ammisađai.

²⁶Mrô yap ƀing dưi jing tơhan amăng grup ñu hơmâo nămpluh-dua-rơbâo tơjuh-rơtuh[27] čô.

²⁷Djuai Aser či dŏ jưh tŏ tui ƀing gơñu yơh. Pô khua ƀing djuai Aser jing Phagiel ană đah rơkơi Okhran.

²⁸Mrô yap ƀing dưi jing tơhan amăng grup ñu hơmâo pă̱pluh-sa-rơbâo rơma-rơtuh[28] čô.

²⁹Djuai Naptali či dŏ jưh tŏ tui ƀing gơñu anŭn yơh. Pô khua ƀing mơnuih djuai Naptali jing Ahira ană đah rơkơi Ênan.

³⁰Mrô yap ƀing dưi jing tơhan amăng grup ñu hơmâo rơmapluh-klâo-rơbâo pă̱-rơtuh[29] čô.

³¹Abih bang ƀing anŭn dŏ jưh amăng anih jưh djuai Dan, mrô yap ƀing dưi jing tơhan amăng klâo grup anai hơmâo sa-rơtuh rơmapluh-tơjuh-rơbâo năm-rơtuh[30] čô. Ƀing gơñu či tơbiă nao hơnăl tuč tui hăng hla gru gơñu pô yơh.

³²Anai yơh jing ƀing Israel, yap tui hăng ƀing sang anŏ gơñu. Abih bang ƀing dưi jing tơhan dŏ amăng anih jưh tui hăng hơdôm grup gơñu, mrô yap abih bang ƀing gơñu hơmâo năm-rơtuh klâo-rơbâo rơma-rơtuh rơmapluh[31] čô.

³³Samơ̆ kơ ƀing Lêwi, arăng ƀu yap hrŏm hăng ƀing Israel pơkŏn ôh, tui hăng Yahweh hơmâo pơđar laih kơ Môseh.

³⁴Tui anŭn, ƀing Israel ngă tui rĭm tơlơi Yahweh pơđar laih kơ Môseh; anŭn yơh jing hơdră jơlan ƀing gơñu dŏ jưh gah yŭ khul hla gru gơñu pô; anŭn yơh jing jơlan ƀing gơñu rơbat nao, rĭm čô tui hluai hăng kơnung djuai sang anŏ ñu yơh.