Read Jarai Yap 28 Bible Online

Yap 28 - Jarai bible

Yap 28

¹Yahweh pơhiăp hăng Môseh,

²“Brơi bĕ tơlơi pơđar anai kơ ƀing Israel laih anŭn laĭ kơ ƀing gơñu tui anai, ‘Ƀing gih khŏm pơyơr gơnam ƀơ̆ng kơ Kâo ƀơi hrơi mông hơmâo pơkơčah laih hơdôm gơnam pơyơr kơ Kâo hăng apui, jing sa mơnâo ƀâo mơngưi pơmơak kơ Kâo.’

³“Pơhiăp bĕ hăng ƀing gơñu tui anai, ‘Anai yơh jing gơnam pơyơr čuh ƀing gih či pơyơr đĭ kơ Yahweh juăt hơmâo rĭm hrơi: Dua drơi ană triu hơmâo sa thŭn hăng ƀu hơmâo rơnam rơka ôh.

⁴Prap pre bĕ sa drơi ană triu amăng mơguah laih anŭn sa drơi kơ hơhuñ klăm,

⁵hrŏm hăng sa gơnam pơyơr pơdai jing sa črăn amăng pluh ephah tơpŭng ƀlĭ lŭk hăng sa črăn amăng pă̱ hin ia rơmuă djet mơ̆ng boh ôliwơ.

⁶Anai jing gơnam pơyơr čuh juăt hơmâo, pơjing laih ƀơi čư̆ Sinai jing sa mơnâo ƀâo mơngưi pơmơak, pơkra hăng apui kơ Yahweh.

⁷Hrŏm hăng rĭm ană triu anŭn, prap pre bĕ gơnam pơyơr mơñum jing sa črăn amăng pă̱ hin gơnam mơñum ia tơpai boh kơƀâo. Tuh tơbiă bĕ gơnam pơyơr mơñum kơ Yahweh ƀơi anih rơgoh hiam.

⁸Prap pre bĕ ană triu tal dua ƀơi sêng klăm hrŏm hăng gơnam pơyơr pơdai laih anŭn gơnam pơyơr mơñum hrup hăng gơnam pơyơr ih prap pre laih kơ mơguah. Anai ăt jing sa gơnam pơyơr čuh mơ̆n, jing sa mơnâo ƀâo mơngưi pơmơak kơ Yahweh yơh.

⁹“ ‘Ƀơi hrơi Saƀat, pơkra bĕ sa gơnam pơyơr hăng dua drơi ană triu hơmâo sa thŭn ƀu hơmâo rơnam rơka ôh, hrŏm hăng gơnam pơyơr mơñum laih anŭn gơnam pơyơr pơdai jing dua črăn amăng pluh ephah tơpŭng ƀlĭ lŭk hăng ia rơmuă ôliwơ.

¹⁰Anai jing gơnam pơyơr čuh kơ rĭm hrơi Saƀat, wơ̆t hăng gơnam pơyơr čuh juăt hơmâo rĭm hrơi hrŏm hăng gơnam pơyơr mơñum mơ̆n.

¹¹“ ‘Ƀơi hrơi tal sa amăng rĭm blan, pơyơr thim bĕ kơ Yahweh sa gơnam pơyơr čuh jing dua drơi rơmô tơno hadơi, sa drơi triu tơno laih anŭn tơjuh drơi ană triu tơno hơmâo sa thŭn, abih bang gơnam anai khŏm ƀu hơmâo rơnam rơka ôh.

¹²Pơyơr bĕ hrŏm hăng rĭm rơmô anŭn sa gơnam pơyơr pơdai jing klâo črăn amăng pluh ephah tơpŭng ƀlĭ lŭk hăng ia rơmuă; pơyơr bĕ hrŏm hăng triu tơno anŭn sa gơnam pơyơr pơdai dua črăn amăng pluh ephah tơpŭng ƀlĭ lŭk hăng ia rơmuă;

¹³laih anŭn pơyơr bĕ hrŏm hăng rĭm ană triu anŭn sa gơnam pơyơr pơdai jing sa črăn amăng pluh ephah tơpŭng ƀlĭ lŭk hăng ia rơmuă. Anai yơh jing sa gơnam pơyơr čuh, jing sa mơnâo ƀâo mơngưi čuh pơmơak kơ Yahweh.

¹⁴Hrŏm hăng rĭm rơmô tơno anŭn, ăt khŏm hơmâo mơ̆n sa gơnam pơyơr mơñum jing sămkrah hin ia boh kơƀâo; hrŏm hăng triu tơno anŭn brơi hơmâo sa črăn amăng klâo hin; laih anŭn hrŏm hăng rĭm ană triu anŭn brơi hơmâo sa črăn amăng pă̱ hin. Anai yơh jing gơnam pơyơr čuh rĭm blan pơkra ƀơi rĭm akŏ blan amăng sa thŭn.

¹⁵Rơngiao kơ gơnam pơyơr čuh juăt hơmâo rĭm hrơi hrŏm hăng gơnam pơyơr mơñum, ăt khŏm pơyơr bĕ sa drơi bơbe tơno kơ Yahweh jing sa gơnam pơyơr tơlơi soh djơ̆.

¹⁶“ ‘Ƀơi hrơi tal pluh-pă̱ blan tal sa yơh, djă̱ hơdơr bĕ hrơi Tơlơi Găn kiăng kơ pơpŭ pơyom kơ Yahweh.[140]

¹⁷Ƀơi hrơi tal pluh-rơma blan anai čơdơ̆ng pơkra bĕ tơlơi phet; ƀơ̆ng bĕ ƀañ tơpŭng ƀu hơmâo tơpơi amăng tơjuh hrơi.[141]

¹⁸Ƀơi hrơi tal sa amăng tơjuh hrơi phet, djă̱ pioh bĕ sa tơlơi pơjơnum rơgoh hiam laih anŭn anăm mă bruă juăt mă rĭm hrơi ôh.

¹⁹Ƀơi hrơi anŭn, pơyơr bĕ kơ Yahweh sa gơnam pơyơr čuh, jing dua drơi rơmô tơno hadơi, sa drơi triu tơno laih anŭn tơjuh drơi ană triu tơno hơmâo sa thŭn, abih bang hlô anai ƀu hơmâo rơnam rơka ôh.

²⁰Hrŏm hăng rĭm rơmô anŭn mơ̆n, prap pre bĕ sa gơnam pơyơr pơdai hăng klâo črăn amăng pluh ephah tơpŭng ƀlĭ lŭk hăng ia rơmuă; hrŏm hăng triu tơno anŭn, jing dua črăn amăng pluh;

²¹laih anŭn hrŏm hăng rĭm ană triu anŭn jing sa črăn amăng pluh.

²²Wơ̆t hăng gơnam pơyơr anŭn, prap pre bĕ sa drơi bơbe tơno kơ gơnam pơyơr tơlơi soh djơ̆ kiăng pơkra tơlơi pap brơi kơ ƀing gih.

²³Prap pre bĕ gơnam pơyơr thim mŭt anai kơ gơnam pơyơr čuh juăt hơmâo amăng mơguah.

²⁴Amăng hơdră anai yơh prap pre bĕ gơnam ƀơ̆ng kơ gơnam pơyơr pơkra hăng apui rĭm hrơi amăng abih tơjuh hrơi phet anŭn jing sa mơnâo ƀâo mơngưi pơmơak kơ Yahweh; ăt khŏm prap pre thim mŭt kơ gơnam pơyơr čuh hăng gơnam pơyơr mơñum juăt hơmâo mơ̆n.

²⁵Ƀơi hrơi tal tơjuh djă̱ pioh bĕ sa tơlơi pơjơnum rơgoh hiam laih anŭn anăm mă bruă juăt mă ôh.

²⁶“ ‘Ƀơi hrơi khul boh čroh tal blung hlâo, tơdang ƀing gih pơyơr kơ Yahweh sa gơnam pơyơr pơdai hlâo hla̱ng phrâo tơdang amăng tơlơi Phet Khul Hrơi Kŏm, djă̱ pioh bĕ sa tơlơi pơjơnum rơgoh hiam laih anŭn anăm mă bruă juăt mă ôh.[142]

²⁷Pơyơr đĭ bĕ sa gơnam pơyơr čuh jing sa mơnâo ƀâo mơngưi pơmơak kơ Yahweh. Gơnam pơyơr anai jing dua drơi rơmô tơno hadơi, sa drơi triu tơno laih anŭn tơjuh drơi ană triu tơno hơmâo sa thŭn.

²⁸Hrŏm hăng rĭm rơmô anŭn, pơyơr bĕ sa gơnam pơyơr pơdai jing klâo črăn amăng pluh ephah tơpŭng ƀlĭ lŭk hăng ia rơmuă ôliwơ; hrŏm hăng rĭm triu tơno anŭn, jing dua črăn amăng pluh;

²⁹laih anŭn hrŏm hăng rĭm tơjuh drơi ană triu anŭn jing sa črăn amăng pluh yơh.

³⁰Ăt pơyơr bĕ sa drơi bơbe tơno kiăng pơkra tơlơi pap brơi kơ ƀing gih.

³¹Prap pre bĕ hơdôm gơnam pơyơr anai hrŏm hăng hơdôm gơnam pơyơr mơñum mơ̆n, jing gơnam thim mŭt kơ gơnam pơyơr čuh hăng gơnam pơyơr pơdai juăt hơmâo anŭn. Khŏm thâo bĕ, hơdôm hlô mơnơ̆ng anŭn anăm hơmâo rơnam rơka ôh.