Read Jarai Yap 3 Bible Online

Yap 3 - Jarai bible

Yap 3

¹Anai jing tơlơi yap kơ sang anŏ A̱rôn laih anŭn sang anŏ Môseh ƀơi mông Yahweh pơhiăp hăng Môseh ƀơi Čư̆ Sinai.

²Khul anăn ƀing ană đah rơkơi A̱rôn: Nadab jing ană kơčoa, Abihu, Eleazar laih anŭn Ithamar.[32]

³Anŭn yơh jing khul anăn ƀing ană đah rơkơi A̱rôn, jing ƀing khua ngă yang Môseh trôč ia ƀâo mơngưi laih anŭn iâu laĭ pơkô̆ laih kiăng kơ mă bruă jing ƀing khua ngă yang.

⁴Samơ̆ Nadab laih anŭn Abihu rơbuh djai hĭ ƀơi anăp Yahweh tơdang ƀing gơñu pơkra sa gơnam pơyơr hăng apui ƀu rơgoh hiam ôh ƀơi anăp Yahweh amăng Tơdron Ha̱r Sinai. Ƀing gơñu ƀu hơmâo ƀing ană đah rơkơi ôh; tui anŭn kơnơ̆ng Eleazar laih anŭn Ithamar đôč yơh mă bruă jing ƀing khua ngă yang amăng rơnŭk ama gơñu A̱rôn dŏ hơdip.[33]

⁵Yahweh pơhiăp hăng Môseh tui anai,

⁶“Ba rai bĕ djuai Lêwi hăng jao hĭ ƀing gơñu kơ A̱rôn kiăng kơ djru gơ̆.

⁷Ƀing gơñu či mă bruă pơala kơ gơ̆ laih anŭn kơ abih bang ană plei ƀơi Sang Khăn Pơjơnum kiăng kơ mă bruă amăng Sang Yang Hăng Khăn anŭn yơh.

⁸Ƀing gơñu khŏm răk wai abih bang gơnam amăng Sang Khăn Pơjơnum laih anŭn ngă bruă amăng Sang Yang Hăng Khăn yơh kiăng kơ pơgiŏng hĭ hơdôm bruă grơ̆ng glăm ƀing Israel.

⁹Jao bĕ ƀing Lêwi kơ A̱rôn laih anŭn kơ ƀing ană đah rơkơi ñu; ƀing gơñu jing ƀing Israel jing ƀing khŏm brơi hlo̱m kơ A̱rôn laih.

¹⁰Jao bĕ kơ A̱rôn laih anŭn kơ ƀing ană đah rơkơi ñu kiăng kơ mă bruă khua ngă yang; hlơi pô pơkŏn rai jĕ pơ anih anŭn, arăng či pơdjai hĭ pô anŭn yơh.”

¹¹Yahweh ăt laĭ kơ Môseh,

¹²“Kâo hơmâo ruah mă laih ƀing Lêwi mơ̆ng ƀing Israel jing pơala kơ abih ƀing ană kơčoa đah rơkơi amăng ƀing Israel. Ƀing Lêwi jing ƀing lŏm kơ Kâo yơh,

¹³yuakơ abih bang ană kơčoa đah rơkơi jing lŏm kơ Kâo. Tơdang Kâo pơrai hĭ abih bang ƀing ană kơčoa đah rơkơi amăng čar Êjip, Kâo ruah pioh laih kơ Kâo pô rĭm ană kơčoa amăng ƀing Israel, mơnuih ƀôdah hlô mơnơ̆ng. Ƀing gơñu jing lŏm kơ Kâo yơh. Kâo yơh jing Yahweh.”[34]

¹⁴Yahweh pơhiăp hăng Môseh dơ̆ng amăng Tơdron Ha̱r Sinai tui anai,

¹⁵“Yap bĕ ƀing Lêwi tui hăng ƀing sang anŏ laih anŭn ƀing djuai gơñu. Yap bĕ rĭm đah rơkơi čơdơ̆ng mơ̆ng sa blan pơ ngŏ.”

¹⁶Tui anŭn, Môseh yap ƀing gơñu kar hăng tơlơi pơhiăp Yahweh pơđar laih kơ ñu.

¹⁷Anai jing khul anăn ƀing ană đah rơkơi Lêwi: Gersôn, Kehat laih anŭn Merari.

¹⁸Anai jing khul anăn ƀing djuai Gersôn: Libni laih anŭn Simei.

¹⁹Ƀing djuai Kehat: Amram, Izhar, Hebrôn laih anŭn Uzziêl.

²⁰Ƀing djuai Merari: Mahli laih anŭn Musi. Anŭn yơh jing ƀing djuai Lêwi tui hluai hăng ƀing sang anŏ gơñu.

²¹Ƀing djuai Libni laih anŭn Simei lŏm kơ kơnung djuai Gersôn; anŭn yơh jing ƀing djuai Gersôn.

²²Mrô yap abih bang ƀing đah rơkơi čơdơ̆ng mơ̆ng sa blan pơ ngŏ hơmâo tơjuh-rơbâo rơma-rơtuh[35] čô.

²³Ƀing djuai Gersôn či dŏ jưh gah yŭ̱, jing gah rŏng kơ Sang Yang Hăng Khăn yơh.

²⁴Pô khua ƀing sang anŏ Gersôn jing Eliasap ană đah rơkơi Lael.

²⁵Ƀơi Sang Khăn Pơjơnum, ƀing Gersôn či grơ̆ng glăm bruă răk wai hơdôm gơnam go̱m sang anŭn gah rơngiao laih anŭn gah lăm, khăn păng ƀơi bah amăng anih pơjơnum,

²⁶khul khăn păng kơ wăl tơdron, khăn păng ƀơi bah amăng nao pơ wăl tơdron jum dar Sang Yang Hăng Khăn, kơnưl laih anŭn khul hrĕ akă. Ƀing gơñu ăt či grơ̆ng glăm abih gơnam kơ hơdôm bruă yua anŭn mơ̆n.

²⁷Ƀing djuai Amram, Izhar, Hebrôn laih anŭn Uzziêl lŏm kơ kơnung djuai Kehat; anŭn yơh jing ƀing djuai Kehat.

²⁸Mrô yap abih bang ƀing đah rơkơi mơ̆ng sa blan pơ ngŏ hơmâo sapăn-rơbâo năm-rơtuh[36] čô. Ƀing djuai Kehat grơ̆ng glăm bruă răk wai Anih Rơgoh Hiam.

²⁹Djuai Kehat či dŏ jưh gah thu̱ng kơ Sang Yang Hăng Khăn.

³⁰Pô khua ƀing sang anŏ djuai Kehat jing Elizaphan ană đah rơkơi Uzziêl.

³¹Ƀing gơñu grơ̆ng glăm amăng bruă čơkŭng hip tơlơi pơgop, kơƀa̱ng, apui kơđen, kơnưl, hơdôm gơnam yua amăng bruă ngă yang, amăng anih rơgoh hiam laih anŭn khăn păng ƀơi jơlan mŭt nao pơ Anih Rơgoh Hiam Hloh. Ƀing gơñu či grơ̆ng glăm abih bang hơdôm gơnam kơ hơdôm bruă yua anŭn.

³²Khua ba akŏ ƀing Lêwi jing Eleazar ană đah rơkơi khua ngă yang A̱rôn. Arăng jao ñu jing akŏ kơ ƀing grơ̆ng glăm bruă răk wai anih rơgoh hiam.

³³Ƀing djuai Mahli laih anŭn Musi jing ƀing lŏm kơ ƀing djuai Merari; anŭn yơh jing ƀing kơnung djuai Merari.

³⁴Mrô yap abih bang ƀing đah rơkơi mơ̆ng sa blan pơ ngŏ hơmâo năm-rơbâo dua-rơtuh[37] čô.

³⁵Pô khua ƀing sang anŏ ƀing djuai Merari jing Zuriel ană đah rơkơi HʼAbihail; ƀing gơñu či dŏ jưh gah dư̱r kơ Sang Yang Hăng Khăn.

³⁶Arăng ruah ƀing djuai Merari kơ bruă răk wai khul kơyâo khô̱ng Sang Yang Hăng Khăn, kơyâo hlô̱ng, khul tơmĕh, khul jơ̆ng atur, abih bang gơnam yua sang khăn anŭn. Ƀing gơñu či grơ̆ng glăm rĭm mơta tơlơi kơ bruă yua anŭn yơh,

³⁷wơ̆t hăng khul tơmĕh jum dar wăl tơdron laih anŭn khul jơ̆ng atur, khul gai grŏ̱ sang khăn anŭn wơ̆t hăng khul hrĕ akă mơ̆n.

³⁸Môseh, A̱rôn laih anŭn ƀing ană đah rơkơi A̱rôn či dŏ jưh gah ngŏ̱ kơ Sang Yang Hăng Khăn anŭn, anăp nao pơ gah yang hrơi ƀlĕ, jing gah anăp kơ Sang Khăn Pơjơnum yơh. Ƀing gơñu grơ̆ng glăm bruă răk wai Anih Rơgoh Hiam pơala kơ ƀing Israel. Hlơi pô pơkŏn rai jĕ pơ anih anŭn, arăng či pơdjai hĭ pô anŭn yơh.

³⁹Tui hăng Yahweh pơđar kơ Môseh hăng A̱rôn, arăng yap abih bang ƀing Lêwi tui hluai ƀing djuai gơñu wơ̆t hăng rĭm ană đah rơkơi mơ̆ng sa blan pơ ngŏ hơmâo duapluh-dua-rơbâo[38] čô.

⁴⁰Yahweh pơhiăp hăng Môseh, “Yap bĕ abih bang ƀing ană kơčoa đah rơkơi Israel jing ƀing čơdơ̆ng mơ̆ng sa blan pơ ngŏ laih anŭn čih pioh bĕ hơdôm anăn gơñu.

⁴¹Kâo yơh jing Yahweh, tui anŭn mă brơi bĕ kơ Kâo ƀing đah rơkơi Lêwi pơala kơ abih bang ƀing ană kơčoa đah rơkơi Israel, laih anŭn hơdôm hlô mơnơ̆ng rong ƀing Lêwi pơala kơ abih bang ană blung hlâo hlô mơnơ̆ng rong ƀing Israel.”

⁴²Tui anŭn, Môseh yap abih bang ană kơčoa ƀing Israel tui hăng Yahweh pơđar laih kơ ñu.

⁴³Mrô yap abih bang ƀing ană kơčoa đah rơkơi mơ̆ng sa blan pơ ngŏ, čih tui hăng anăn, hơmâo duapluh-dua-rơbâo dua-rơtuh tơjuhpluh-klâo[39] čô.

⁴⁴Yahweh ăt pơhiăp hăng Môseh tui anai,

⁴⁵“Mă bĕ ƀing đah rơkơi Lêwi pơala kơ abih bang ƀing ană kơčoa đah rơkơi Israel, laih anŭn hlô mơnơ̆ng rong ƀing Lêwi pơala kơ hlô mơnơ̆ng rong Israel. Ƀing Lêwi anai jing lŏm kơ Kâo yuakơ Kâo yơh jing Yahweh.

⁴⁶Kiăng song mă dua-rơtuh tơjuhpluh-klâo[40] čô ƀing ană kơčoa Israel jing mrô lu hloh kơ mrô ƀing Lêwi,

⁴⁷mă bĕ rơma sekel kơ rĭm čô, tui hluai hăng sekel sang yang jing gơnam pơkơtraŏ truh kơ duapluh gerah.

⁴⁸Jao bĕ prăk tơlơi song mă ƀing ană kơčoa ƀing Israel anŭn kơ A̱rôn laih anŭn kơ ƀing ană đah rơkơi ñu.”

⁴⁹Tui anŭn, Môseh pơƀut glaĭ abih prăk song mă anŭn mơ̆ng ƀing arăng yap rơbeh lu hloh kơ mrô ƀing Lêwi song mă laih.

⁵⁰Môseh pơƀut glaĭ prăk amrăk mơ̆ng ƀing ană kơčoa đah rơkơi Israel hăng pơkơtraŏ truh sa-rơbâo klâo-rơtuh nămpluh-rơma[41] sekel, tui hluai hăng prăk sekel sang yang.

⁵¹Môseh jao khul prăk song mă anŭn kơ A̱rôn hăng ƀing ană đah rơkơi gơ̆ tui hăng boh hiăp Yahweh pơđar laih kơ ñu.