Read Jarai Yap 31 Bible Online

Yap 31 - Jarai bible

Yap 31

¹Yahweh pơhiăp dơ̆ng hăng Môseh tui anai,

²“Pơkơhma̱l bĕ ƀing Midyan yuakơ ƀing Israel. Tơdơi kơ anŭn, ih či djai laih anŭn ih či wơ̆t glaĭ hrŏm hăng ƀing ơi adon ih yơh.”

³Tui anŭn, Môseh laĭ hăng ƀing ană plei, “Prap pre bĕ ƀing tơhan ƀing gih kiăng nao blah pơkơdơ̆ng glaĭ hăng ƀing Midyan kiăng kơ pơkơhma̱l hĭ ƀing gơñu yuakơ ƀing gơñu hơmâo ngă soh pơkơdơ̆ng glaĭ laih hăng Yahweh.

⁴Pơkiaŏ nao bĕ pơ tơdron blah sa-rơbâo[146] čô tơhan mơ̆ng rĭm kơnung djuai Israel.”

⁵Tui anŭn, hơmâo pluh-dua-rơbâo[147] čô tơhan prap pre kiăng kơ pơblah, jing sa-rơbâo[148] čô mơ̆ng rĭm kơnung djuai Israel yơh.

⁶Môseh pơkiaŏ tơhan anai nao pơblah, sa-rơbâo[149] čô anŭn mơ̆ng rĭm kơnung djuai, wơ̆t hăng khua ngă yang Phinehas ană đah rơkơi khua ngă yang prŏng hloh Eleazar mơ̆n, jing pô djă̱ ba hăng ñu hơdôm gơnam rơgoh hiam mơ̆ng sang yang laih anŭn khul tơdiăp kiăng ngă tơlơi laĭ pơthâo.

⁷Ƀing gơñu blah pơkơdơ̆ng glaĭ hăng ƀing Midyan kar hăng Yahweh pơđar laih kơ Môseh laih anŭn pơdjai hĭ rĭm čô đah rơkơi pơprŏng.

⁸Amăng ƀing djai anŭn hơmâo abih bang rơma čô pơtao ƀing Midyan, anŭn jing: Ƀing Ewi, Rekem, Zur, Hur laih anŭn Reba. Ƀing gơñu ăt pơdjai hĭ Balaam ană đah rơkơi Beôr hăng đao mơ̆n.

⁹Ƀing Israel mă mơnă ƀing đah kơmơi Midyan pơprŏng laih anŭn ƀing čơđai, laih anŭn sua mă abih tơpul rơmô, triu, bơbe laih anŭn dram gơnam.

¹⁰Ƀing gơñu čuh hĭ abih bang plei pơnăng jing anih ƀing Midyan hơmâo hơdip, wơ̆t hăng abih bang anih jưh gơñu mơ̆n.

¹¹Ƀing gơñu mă abih bang dram gơnam sua mă wơ̆t hăng mơnuih laih anŭn hlô mơnơ̆ng,

¹²laih anŭn ba glaĭ ƀing mơnă, hơdôm dram gơnam sua mă anai kơ Môseh hăng Eleazar khua ngă yang prŏng hloh laih anŭn kơ ƀing ană plei ƀơi tơdron dap Môab jĕ krong Yurdan klă̱ anăp hăng plei Yerêhô.

¹³Môseh, Eleazar khua ngă yang prŏng hloh laih anŭn abih bang ƀing djă̱ akŏ ană plei nao čơkă ƀing gơñu gah rơngiao kơ anih jưh.

¹⁴Samơ̆ Môseh hil biă mă hăng ƀing khua tơhan wơ̆t glaĭ mơ̆ng tơdron blah, jing khua tơhan kơ tơpul rơbâo laih anŭn khua tơhan kơ tơpul rơtuh.

¹⁵Môseh tơña kơ ƀing gơñu tui anai, “Yua hơget ƀing gih brơi kơ abih bang ƀing đah kơmơi dŏ hơdip lĕ?

¹⁶Ƀing gơñu yơh jing ƀing đuaĭ tui hơdră Balaam pơ čư̆ Pheôr laih anŭn kiăng ba pơđuaĭ hĭ ƀing Israel mơ̆ng Yahweh. Yuakơ ƀing gơñu yơh, tơlơi kli̱n pơrai hĭ ƀing ană plei Yahweh.[150]

¹⁷Ră anai pơdjai hĭ bĕ abih bang ƀing ană đah rơkơi. Laih anŭn pơdjai hĭ bĕ rĭm čô đah kơmơi hơmâo dŏ hrŏm laih hăng đah rơkơi,

¹⁸samơ̆ ƀing gih dưi djă̱ pioh kơ gih pô rĭm čô đah kơmơi aka dŏ hrŏm hăng đah rơkơi ôh.

¹⁹“Abih bang ƀing gih jing ƀing hơmâo pơdjai hlơi pô ƀôdah tĕk djơ̆ atâo djai, gih hrŏm hăng ƀing mơnă đah kơmơi gih khŏm dŏ gah rơngiao kơ anih jưh amăng tơjuh hrơi. Ƀơi hrơi tal klâo laih anŭn tal tơjuh, ƀing gih khŏm pơrơgoh hĭ gih pô laih anŭn ƀing mơnă gih anŭn mơ̆n.

²⁰Pơrơgoh hĭ bĕ rĭm ao buh wơ̆t hăng rĭm gơnam arăng pơkra hăng klĭ, blâo bơbe ƀôdah kơyâo mơ̆n.”

²¹Giŏng anŭn, Eleazar khua ngă yang prŏng hloh pơhiăp hăng ƀing tơhan jing ƀing nao amăng tơdron blah tui anai, “Anai yơh jing tơlơi phiăn Yahweh brơi laih kơ Môseh:

²²Mah, amrăk, ko̱ng, pơsơi, tin, lê̱k,[151]

²³laih anŭn hơget gơnam pơkŏn dơ̆ng apui ƀu dưi ƀơ̆ng ôh, gih khŏm brơi gơnam anŭn găn mơ̆ng apui, tui anŭn gơnam anŭn či jing rơgoh yơh. Ƀing gih ăt khŏm pơrơgoh hĭ gơnam anŭn hăng ia pơrơgoh mơ̆n. Samơ̆ gơnam hơget apui dưi ƀơ̆ng, gih khŏm pơrơgoh gơnam anŭn kơnơ̆ng hăng ia pơrơgoh đôč.

²⁴Ƀơi hrơi tal tơjuh, bŏh bĕ khul ao gih laih anŭn ƀing gih či jing rơgoh. Giŏng anŭn, ƀing gih dưi mŭt amăng anih jưh yơh.”

²⁵Yahweh pơhiăp dơ̆ng hăng Môseh tui anai,

²⁶“Ih hăng Eleazar khua ngă yang prŏng hloh laih anŭn ƀing khua djă̱ akŏ ană plei či khŏm yap abih bang mơnuih hăng hlô mơnơ̆ng anŭn ƀing gih hơmâo mă laih.

²⁷Pơpha bĕ hơdôm gơnam anŭn tŏng krah laih anŭn ngă tui anai: Sămkrah gơnam kơ ƀing tơhan jing ƀing nao blah laih anŭn sămkrah jing gơnam dŏ glaĭ anŭn lŏm kơ ƀing ană plei yơh.

²⁸Mơ̆ng ƀing tơhan jing ƀing nao blah anŭn, pioh bĕ sa črăn pơyơr mơ̆ng rĭm rơma-rơtuh[152] ƀing mơnuih, tơpul rơmô, aseh glai, triu ƀôdah bơbe kiăng pơyơr kơ Yahweh.

²⁹Mă bĕ črăn pơyơr anai mơ̆ng sămkrah črăn pha brơi ƀing tơhan anŭn hăng brơi kơ Eleazar khua ngă yang prŏng hloh jing črăn kơ Yahweh anŭn.

³⁰Mơ̆ng sămkrah črăn kơ ƀing Israel, ruah mă bĕ sa črăn mơ̆ng rĭm rơmapluh amăng: Mơnuih, rơmô, aseh, triu, bơbe ƀôdah hlô mơnơ̆ng pơkŏn dơ̆ng. Brơi bĕ gơnam anai kơ ƀing Lêwi, jing ƀing grơ̆ng glăm kơ bruă răk wai sang yang Yahweh hăng khăn.”

³¹Tui anŭn, Môseh hăng Eleazar khua ngă yang prŏng hloh ngă tui abih tơlơi Yahweh pơtă laih kơ Môseh.

³²Dram gơnam dŏ glaĭ jing gơnam ƀing tơhan sua mă jing năm-rơtuh tơjuh-rơtuh rơmapluh-rơbâo[153] drơi triu;

³³tơjuhpluh-dua-rơbâo[154] drơi rơmô;

³⁴nămpluh-sa-rơbâo[155] drơi aseh glai;

³⁵laih anŭn klâopluh-dua-rơbâo[156] čô đah kơmơi aka dŏ hrŏm hăng đah rơkơi ôh.

³⁶Sămkrah gơnam pơpha kơ ƀing nao blah amăng tơdron blah jing: klâo-rơtuh klâopluh-tơjuh-rơbâo rơma-rơtuh[157] drơi triu,

³⁷gơnam pơyơr kơ Yahweh mơ̆ng gơnam anai jing năm-rơtuh tơjuhpluh-rơma[158] drơi;

³⁸klâopluh-năm-rơbâo[159] drơi rơmô, gơnam pơyơr kơ Yahweh mơ̆ng gơnam anai jing tơjuhpluh-dua drơi;

³⁹klâopluh-rơbâo rơma-rơtuh[160] drơi aseh glai, gơnam pơyơr kơ Yahweh mơ̆ng gơnam anai jing nămpluh-sa drơi;

⁴⁰pluh-năm-rơbâo[161] čô mơnuih, mơnuih pơyơr kơ Yahweh jing klâopluh-dua čô.

⁴¹Môseh jao gơnam pơyơr anai kơ Eleazar khua ngă yang prŏng hloh, jing črăn lŏm kơ Yahweh anŭn, kar hăng Yahweh hơmâo pơđar laih kơ Môseh.

⁴²Sămkrah gơnam lŏm kơ ƀing Israel, jing gơnam Môseh pơkăh hơjăn mơ̆ng ƀing tơhan,

⁴³gơnam sămkrah ƀing ană plei jing klâo-rơtuh klâopluh-tơjuh-rơbâo rơma-rơtuh[162] drơi triu,

⁴⁴klâopluh-năm-rơbâo[163] drơi rơmô,

⁴⁵klâopluh-rơbâo rơma-rơtuh[164] drơi aseh glai,

⁴⁶laih anŭn pluh-năm-rơbâo[165] čô mơnuih.

⁴⁷Mơ̆ng gơnam sămkrah ƀing Israel anŭn, Môseh ruah mă sa mơ̆ng rĭm rơmapluh čô mơnuih laih anŭn hlô mơnơ̆ng, kar hăng Yahweh pơđar laih kơ ñu, laih anŭn brơi gơnam anai kơ ƀing Lêwi, jing ƀing grơ̆ng glăm kơ bruă răk wai sang yang Yahweh hăng khăn anŭn.

⁴⁸Giŏng anŭn, ƀing khua moa kơ tơpul tơhan, jing khua git gai kơ tơpul rơbâo laih anŭn tơpul rơtuh, rai pơ Môseh,

⁴⁹laih anŭn laĭ, “Ƀing gơmơi ƀing ding kơna ih hơmâo yap laih ƀing tơhan gơmơi, laih anŭn ƀu hơmâo sa čô rơngiă ôh.

⁵⁰Tui anŭn, ƀing gơmơi hơmâo ba rai sa gơnam pơyơr kơ Yahweh hơdôm gơnam hăng mah jing gơnam rĭm čô amăng ƀing gơmơi hơmâo sua mă kar hăng kong hơpăl, kŏng tơngan, rơbưn kơđŏm, buai laih anŭn añŭ, kiăng pơkra tơlơi pap brơi kơ gơmơi pô; tui anŭn Yahweh ƀu pơrai hĭ ƀing gơmơi ôh.”

⁵¹Môseh hăng Eleazar khua ngă yang prŏng hloh mă tŭ mơ̆ng ƀing gơñu abih bang hơdôm gơnam pơhrôp hăng mah anŭn.

⁵²Abih bang mah mơ̆ng ƀing khua git gai kơ tơpul rơbâo laih anŭn mơ̆ng ƀing khua git gai kơ tơpul rơtuh, jing gơnam ƀing gơñu pơyơr đĭ kar hăng sa gơnam brơi pơyơr kơ Yahweh kơtraŏ truh kơ pluh-năm-rơbâo tơjuh-rơtuh rơmapluh[166] sekel.

⁵³Rĭm čô tơhan ăt hơmâo sua mă gơnam kơ ñu pô.

⁵⁴Môseh hăng Eleazar khua ngă yang prŏng hloh mă tŭ mah mơ̆ng ƀing khua git gai kơ tơpul rơbâo hăng rơtuh laih anŭn ba mŭt amăng Sang Khăn Pơjơnum jing gơnam djă̱ hơdơr kơ ƀing Israel ƀơi anăp Yahweh yơh.