Read Jarai Yap 33 Bible Online

Yap 33 - Jarai bible

Yap 33

¹Anai yơh jing hơdôm yak rơbat amăng jơlan nao ƀing Israel tơdang Môseh hăng A̱rôn git gai ƀing gơñu tơbiă nao mơ̆ng čar Êjip, tui hăng kơnung djuai gơñu.

²Ƀơi tơlơi Yahweh pơđar, Môseh čih pioh hơdôm yak rơbat anŭn amăng jơlan nao gơñu. Anai yơh jing jơlan nao ƀing gơñu tui hăng khul yak rơbat:

³Ƀing Israel tơbiă nao mơ̆ng tring Ramesê ƀơi hrơi tal pluh-rơma amăng blan tal sa, jing ƀơi hrơi tơdơi kơ Tơlơi Găn tal blung hlâo. Ƀing gơñu tơbiă nao hăng tơlơi khĭn ƀơi anăp abih bang ƀing Êjip dŏ lăng,

⁴hlak ƀing gơ̆ dơ̱r abih bang ană kơčoa gơñu, jing ƀing ană Yahweh hơmâo pơrai hĭ laih amăng mlam hlâo; tơdang Yahweh pơrai ƀing gơñu, Ñu hơmâo ba rai laih tơlơi phat kơđi ƀơi ƀing yang gơñu.

⁵Ƀing Israel tơbiă mơ̆ng tring Ramesê laih anŭn jưh ƀơi anih Sukkôt.

⁶Ƀing gơñu tơbiă mơ̆ng anih Sukkôt laih anŭn jưh ƀơi anih Êtham, ƀơi guai tơdron ha̱r.

⁷Ƀing gơñu tơbiă mơ̆ng anih Êtham, wơ̆t glaĭ anăp nao pơ anih Phi-Hahirôt, jing anih gah ngŏ̱ kơ Baal-Zephôn, laih anŭn ƀing gơñu jưh ƀơi jĕ plei Migdôl.

⁸Ƀing gơñu tơbiă mơ̆ng anih Phi-Hahirôt laih anŭn găn ia rơsĭ mŭt amăng tơdron ha̱r, laih anŭn tơdang ƀing gơñu rơbat hơmâo klâo hrơi laih amăng anih tơdron ha̱r Êtham, ƀing gơñu truh ƀơi anih Marah laih anŭn dŏ jưh pơ anŭn.

⁹Ƀing gơñu tơbiă mơ̆ng anih Marah hăng nao pơ anih Êlim, jing anih hơmâo pluh-dua phŭn ia bluh laih anŭn tơjuhpluh phŭn kơyâo đung kri, laih anŭn ƀing gơñu dŏ jưh ƀơi anih anŭn.

¹⁰Ƀing gơñu tơbiă mơ̆ng anih Êlim laih anŭn jưh jĕ ƀơi Rơsĭ Mriah.

¹¹Ƀing gơñu tơbiă mơ̆ng anih Rơsĭ Mriah laih anŭn jưh ƀơi anih amăng Tơdron Ha̱r Sin.

¹²Ƀing gơñu tơbiă mơ̆ng anih tơdron ha̱r Sin laih anŭn jưh ƀơi anih Dopkah.

¹³Ƀing gơñu tơbiă mơ̆ng anih Dopkah laih anŭn jưh ƀơi anih Alus.

¹⁴Ƀing gơñu tơbiă mơ̆ng anih Alus laih anŭn jưh ƀơi anih Rephidim, jing anih ƀu hơmâo ia kơ ƀing ană plei kiăng mơñum ôh.

¹⁵Ƀing gơñu tơbiă mơ̆ng anih Rephidim laih anŭn jưh ƀơi anih amăng Tơdron Ha̱r Sinai.

¹⁶Ƀing gơñu tơbiă mơ̆ng anih Tơdron Ha̱r Sinai laih anŭn jưh ƀơi anih Kibrôt-Hattaawah.

¹⁷Ƀing gơñu tơbiă mơ̆ng anih Kibrôt-Hattaawah laih anŭn jưh ƀơi anih Hazerôt.

¹⁸Ƀing gơñu tơbiă mơ̆ng anih Hazerôt laih anŭn jưh ƀơi anih Ritmah.

¹⁹Ƀing gơñu tơbiă mơ̆ng anih Ritmah laih anŭn jưh ƀơi anih Rimmôn-Perez.

²⁰Ƀing gơñu tơbiă mơ̆ng anih Rimmôn-Perez laih anŭn jưh ƀơi anih Libnah.

²¹Ƀing gơñu tơbiă mơ̆ng anih Libnah laih anŭn jưh ƀơi anih Rissah.

²²Ƀing gơñu tơbiă mơ̆ng anih Rissah laih anŭn jưh ƀơi anih Kehelathah.

²³Ƀing gơñu tơbiă mơ̆ng anih Kehelathah laih anŭn jưh ƀơi anih čư̆ Sepher.

²⁴Ƀing gơñu tơbiă mơ̆ng anih čư̆ Sepher laih anŭn jưh ƀơi anih Haradah.

²⁵Ƀing gơñu tơbiă mơ̆ng anih Haradah laih anŭn jưh ƀơi anih Makhelôt.

²⁶Ƀing gơñu tơbiă mơ̆ng anih Makhelôt laih anŭn jưh ƀơi anih Thahat.

²⁷Ƀing gơñu tơbiă mơ̆ng anih Thahat laih anŭn jưh ƀơi anih Terah.

²⁸Ƀing gơñu tơbiă mơ̆ng anih Terah laih anŭn jưh ƀơi anih Mitkah.

²⁹Ƀing gơñu tơbiă mơ̆ng anih Mitkah laih anŭn jưh ƀơi anih Hasmônah.

³⁰Ƀing gơñu tơbiă mơ̆ng anih Hasmônah laih anŭn jưh ƀơi anih Môserôt.

³¹Ƀing gơñu tơbiă mơ̆ng anih Môserôt laih anŭn jưh ƀơi anih Benê-Yaakan.

³²Ƀing gơñu tơbiă mơ̆ng anih Benê-Yaakan laih anŭn jưh ƀơi anih Hôr-Haggidgad.

³³Ƀing gơñu tơbiă mơ̆ng anih Hôr-Haggidgad laih anŭn jưh ƀơi anih Yotbathah.

³⁴Ƀing gơñu tơbiă mơ̆ng anih Yotbathah laih anŭn jưh ƀơi anih trŏp Abrônah.

³⁵Ƀing gơñu tơbiă mơ̆ng anih trŏp Abrônah laih anŭn jưh ƀơi anih Êziôn Geber.

³⁶Ƀing gơñu tơbiă mơ̆ng anih Êziôn Geber laih anŭn jưh ƀơi anih Khades, amăng Tơdron Ha̱r Zin.

³⁷Ƀing gơñu tơbiă mơ̆ng anih Khades laih anŭn jưh ƀơi anih čư̆ Hôr, ƀơi guai čar Edôm.

³⁸Tơdang ƀing gơñu dŏ pơ anih anŭn, A̱rôn khua ngă yang prŏng hloh đĭ nao pơ čư̆ Hôr tui hăng tơlơi Yahweh pơđar yơh, laih anŭn ñu djai ƀơi hrơi tal sa blan tal rơma amăng thŭn tal pă̱pluh tơdơi kơ ƀing Israel tơbiă mơ̆ng čar Êjip.[170]

³⁹Tơdang ñu djai ƀơi čư̆ Hôr anŭn, A̱rôn hơmâo sa-rơtuh duapluh-klâo[171] thŭn.

⁴⁰Hlak anai pơtao Arad jing mơnuih Kanaan, jing pô hơdip amăng anih Negewơ anih lŏn Kanaan anai, hơmư̆ ƀing Israel hlak rai.[172]

⁴¹Ƀing Israel tơbiă mơ̆ng anih čư̆ Hôr laih anŭn jưh ƀơi anih Zalmônah.

⁴²Ƀing gơñu tơbiă mơ̆ng anih Zalmônah laih anŭn jưh ƀơi anih Phunôn.

⁴³Ƀing gơñu tơbiă mơ̆ng anih Phunôn laih anŭn jưh ƀơi anih Ôbôt.

⁴⁴Ƀing gơñu tơbiă mơ̆ng anih Ôbôt laih anŭn jưh ƀơi anih Iye-Abarim, ƀơi guai čar Môab.

⁴⁵Ƀing gơñu tơbiă mơ̆ng anih Iye-Abarim laih anŭn jưh ƀơi plei pơnăng Dibôn-Gad.

⁴⁶Ƀing gơñu tơbiă mơ̆ng plei pơnăng Dibôn-Gad laih anŭn jưh ƀơi anih Almôn-Diblathaim.

⁴⁷Ƀing gơñu tơbiă mơ̆ng anih Almôn-Diblathaim laih anŭn jưh ƀơi anih čư̆ Nebô amăng tring čư̆ Abarim.

⁴⁸Ƀing gơñu tơbiă mơ̆ng anih čư̆ Abarim laih anŭn jưh ƀơi khul anih tơdron dap čar Môab jĕ krong Yurdan, klă̱ anăp hăng plei Yerêhô.

⁴⁹Ƀơi khul anih tơdron dap Môab anai yơh, ƀing gơñu dŏ jưh kơtuai krong Yurdan čơdơ̆ng mơ̆ng plei Bet-Yesimôt truh pơ anih Abel-Sittim.

⁵⁰Tơdang ƀing Israel dŏ ƀơi khul tơdron dap Môab jĕ krong Yurdan klă̱ anăp hăng plei pơnăng Yerêhô anai yơh, Yahweh pơhiăp hăng Môseh,

⁵¹“Pơhiăp bĕ hăng ƀing Israel tui anai, ‘Tơdang ƀing gih găn krong Yurdan mŭt amăng anih lŏn Kanaan,

⁵²puh pơđuaĭ hĭ bĕ abih bang ƀing mơnuih dŏ amăng anih lŏn anŭn mơ̆ng anăp gih. Pơrai hĭ bĕ abih bang khul rup trah mơ̆ng kơyâo, pơtâo, gơnam pơsơi, jing khul rup ƀing gơñu ma̱n đĭ laih anŭn pơglưh hĭ bĕ abih bang khul anih glông kơkuh yang rơba̱ng gơñu.

⁵³Mă tŭ bĕ anih lŏn anŭn hăng dŏ hơdip amăng anŭn, yuakơ Kâo hơmâo brơi laih kơ ƀing gih anih lŏn anai kiăng kơ lŏm kơ gih pô.

⁵⁴Ngă čram bĕ kiăng kơ pơpha anih lŏn anai tui hluai hăng ƀing kơnung djuai gih. Kơ grup pă prŏng ăt brơi kŏng ngăn prŏng mơ̆n, laih anŭn kơ grup pă anet ăt pha brơi kŏng ngăn anet mơ̆n. Hơget tơlơi lê̆ ƀơi ƀing gơñu hăng tơlơi ngă čram, črăn anŭn jing lŏm kơ ƀing gơñu yơh. Pơpha bĕ tui hăng kơnung djuai ơi adon gih.[173]

⁵⁵“ ‘Samơ̆ tơdah ƀing gih ƀu puh pơđuaĭ hĭ ôh ƀing mơnuih hơdip amăng anih lŏn anai, abih bang hlơi pô ƀing gih brơi dŏ glaĭ či ngă brơi kơ ƀing gih rŭng răng yơh amăng anih lŏn ƀing gih či dŏ hơdip. Ƀing gơñu či jing kar hăng ƀruih amăng mơta laih anŭn drơi ƀơi djeo gih yơh.

⁵⁶Tui anŭn, Kâo či pơrai hĭ ƀing gih hơget tơlơi Kâo pơkra kiăng pơrai hĭ ƀing gơñu yơh.’ ”