Read Jarai Mikhah 3 Bible Online

Mikhah 3 - Jarai bible

Mikhah 3

¹Giŏng anŭn, kâo laĭ, Hơmư̆ bĕ, Ơ ƀing gih jing ƀing khua wai lăng sang anŏ Yakôb ăh, jing ƀing git gai sang anŏ Israel hơi! Djơ̆ biă mă ñu, ƀing gih yơh khŏm pơmĭn ƀlơ̆ng kiăng kơ ngă tơpă hơnơ̆ng.

²Samơ̆ ƀing gih pơrơmut kơ tơlơi hiam laih anŭn khăp kơ tơlơi sat ƀai. Ƀing gih, hrup hăng pô tơčŏh añăm yơh, hek lui klĭ ană plei Kâo laih anŭn tơluăh hĭ čơđeh asar mơ̆ng khul tơlang ƀing gơ̆.

³Ƀing gih, hrup hăng hlô glai yơh, ƀơ̆ng hĭ čơđeh asar ană plei Kâo. Ƀing gih lo̱k hĭ klĭ ƀing gơ̆, pơjŏh hĭ khul tơlang ƀing gơ̆ jing hĭ lu črăn, laih anŭn tơčŏh hĭ ƀing gơ̆ hrup hăng tơčŏh añăm kiăng kơ hơna.

⁴Hrơi anŭn hlak truh tañ tơdang ƀing gih či iâu đĭ pơ Yahweh, samơ̆ Ñu ƀu či laĭ glaĭ kơ ƀing gih ôh. Ñu ƀu či hơmư̆ kơ tơlơi iâu laĭ ƀing gih ôh, yuakơ ƀing gih hơmâo ngă laih tơlơi sat ƀai.

⁵Ƀing pô pơala ƀlŏr plŏm ƀlŏr kơ ƀing ană plei Kâo jing ƀing ƀuăn Yahweh či brơi tơlơi rơnŭk rơno̱m kơ hlơi pô apăh gơñu, samơ̆ pơhuĭ hăng tơlơi blah wang kơ hlơi pô ƀu apăh ôh gơñu. Tui anŭn, Yahweh pơhiăp kơ ƀing pô pơala anŭn tui anai,

⁶“Ơ ƀing pô pơala, hrơi ƀing gih jĕ či rơgao hĭ laih; ƀing gih hrup hăng yang hrơi jĕ či lê̆ laih. Ƀing gih ƀu či hơmâo tơlơi pơƀuh lui hlâo dơ̆ng tah, ƀing gih kŏn dưi laĭ lui hlâo hơget tơlơi lơi, yuakơ ƀing gih dui ba ƀing ană plei Kâo jrôk jơlan laih.”

⁷Ƀing hlơi pô laĭ lui hlâo kơ tơlơi hơdip pơanăp či mlâo yơh yuakơ ƀing gơñu ƀu dưi pơhiăp ôh boh hiăp Ơi Adai. Abih bang ƀing gơñu či mlâo mlañ yơh yuakơ Ơi Adai ƀu laĭ glaĭ ôh kơ ƀing gơñu.

⁸Samơ̆ bơ kơ kâo, Yahweh pơbă kâo hăng Yang Bơngăt laih anŭn tơlơi dưi mơyang Ñu, laih anŭn pha brơi kơ kâo thâo hluh tơlơi tơpă hơnơ̆ng, laih anŭn khĭn pơhaih kơ ƀing Israel khul tơlơi soh sat gơñu.

⁹Hơmư̆ kâo bĕ, Ơ ƀing khua ba akŏ ƀing Israel hơi, ƀing gih pơrơmut tơlơi tơpă hơnơ̆ng laih anŭn pơblư̆ hĭ tơlơi djơ̆ găl jing hĭ wĕ wŏ.

¹⁰Ƀing gih hlak ma̱n pơdơ̆ng đĭ plei prŏng Yerusalaim, jing plei Ziôn, ƀơi sa boh atur jing atur ƀu tơpă hơnơ̆ng laih anŭn pơdjai mơnuih yơh.

¹¹Ƀing khua wai lăng plei git gai yuakơ kiăng mă gơnam plŏm ƀlŏr, ƀing khua ngă yang plei pơblang Tơlơi Juăt yuakơ kiăng kơ arăng apăh, laih anŭn ƀing pô pơala plei sĭ tơlơi pơƀuh gơñu hăng prăk. Abih bang ƀing gơñu le̱ng kơ pơhaih Yahweh dŏ hăng ƀing gơñu soh sel. Ƀing gơñu pơhaih tui anai, “Ƀu či hơmâo tơlơi tơnap tap ôh rai ƀơi ƀing ta yuakơ Yahweh dŏ hăng ƀing ta.”

¹²Hơnŭn yơh, yuakơ ƀing gih yơh, Ơ ƀing khua wai lăng ƀing Israel hơi, arăng či jŭ pla Ziôn hrup hăng đang hơma, plei prŏng Yerusalaim či jing hĭ ƀu̱r boh pơtâo glưh pơčah, laih anŭn bŏl čư̆[2] sang yang anŭn či jing hĭ glai glo[3] glĭp glăp yơh.[4]