Read Jarai Mathiơ 23 Bible Online

Mathiơ 23 - Jarai bible

Mathiơ 23

¹Tơdơi kơ anŭn, Yêsu pơhiăp hăng ƀing mơnuih lu laih anŭn hăng ƀing ding kơna Ñu tui anai,

²“Ƀing nai pơtô Tơlơi Juăt laih anŭn ƀing Pharisai le̱ng kơ ƀing hơmâo tơlơi dưi pơblang Tơlơi Juăt Môseh soh sel.

³Tui anŭn, ƀing gih khŏm ngă tui bĕ hơget tơlơi ƀing gơñu pơtô kơ ƀing gih; samơ̆ kơđai glaĭ, anăm ngă tui ôh bruă mơnuă ƀing gơñu ngă, yuakơ ƀing gơñu ƀu ngă tui hơdôm tơlơi ƀing gơñu pơtô ôh.

⁴Ƀing gơñu pơgŏ̱ ƀing arăng gưt tui lu tơlơi phiăn tơnap, hrup hăng tơlơi kơtraŏ ƀing gơñu tơƀăk ƀơi bra arăng; bơ kơ gơñu pô, ƀing gơñu ƀu či yơr tơngan djru glăm brơi tơlơi kơtraŏ ƀing gơ̆ ôh.

⁵“Hơget bruă ƀing gơñu ngă, ƀing gơñu kơnơ̆ng kiăng kơ mơnuih ƀuh đôč. Tui anŭn, prŏng prin đơi yơh kŭm klĭ ƀing gơñu ngă akă ƀơi athơi ƀơi hơpăl tơngan gơñu kiăng kơ čih hơdôm Tơlơi Juăt pioh amăng kŭm anŭn! Laih anŭn dơ̆ng, glông glĭn đơi yơh rơñuai groa ao ƀing gơñu ngă pơtrŭn kiăng kơ pơrơđah tơlơi tŏng ten gơñu![246]

⁶Ƀing gơñu khăp dŏ be̱r ƀơi anih dŏ pơpŭ pơyom amăng anih ƀơ̆ng huă laih anŭn khăp dŏ be̱r ƀơi anih dŏ yom pơphan amăng sang pơjơnum.

⁷Ƀing gơñu khăp arăng pơhiăp kơkuh kơ ƀing gơñu amăng anih sĭ mơnia laih anŭn mơak kơ arăng pơhiăp pơpŭ kơ ƀing gơñu ‘Nai Pơtô!’

⁸“Samơ̆ bơ kơ ƀing gih, ƀing gih anăm tŭ arăng pơhiăp pơpŭ kơ ƀing gih ‘Nai Pơtô’ ôh, yuakơ ƀing gih kơnơ̆ng hơmâo sa čô Nai Pơtô đôč laih anŭn abih bang ƀing gih le̱ng kơ jing ayŏng adơi pơdơ̆ pơđơ̱r soh sel.

⁹Ƀing gih ăt anăm pơhiăp pơpŭ ‘Ama’ ôh kơ hlơi pô amăng lŏn tơnah anai, yuakơ ƀing gih kơnơ̆ng hơmâo sa čô Ama đôč, jing Pô dŏ amăng adai adih yơh.

¹⁰Ƀing gih ăt anăm tŭ kơ arăng pơhiăp pơpŭ kơ ƀing gih ‘Nai Pơblang’ lơi, yuakơ ƀing gih kơnơ̆ng hơmâo sa čô Nai Pơblang đôč, anŭn jing Messiah yơh.

¹¹Hlơi pô arăng yap yom pơphan hloh amăng ƀing gih, ñu anŭn khŏm jing hĭ ding kơna kơ ƀing gih yơh.[247]

¹²Hlơi pô pơdun đĭ ñu pô, ñu anŭn či tŭ pơluă gŭ yơh; laih anŭn hlơi pô luă gŭ ñu pô, ñu anŭn či tŭ pơdun đĭ yơh.”[248]

¹³Yêsu pơhiăp dơ̆ng tui anai, “Răm ƀăm yơh kơ ƀing gih, Ơ ƀing nai pơtô Tơlơi Juăt laih anŭn ƀing Pharisai! Ƀing gih jing ƀing pơƀlŏr! Ƀing gih hơmâo pơgăn hĭ laih ƀing mơnuih mơnam dưi jing ană plei Ơi Adai; samơ̆ gih pô hơngah ƀu kiăng kơ dưi jing ană plei anŭn ôh, laih anŭn dơ̆ng, ƀing gih ăt pơgăn hĭ ƀing mơnuih kiăng kơ dưi jing ƀing ană plei anŭn mơ̆n.”

¹⁴“Răm ƀăm yơh kơ ƀing gih, Ơ ƀing nai pơtô Tơlơi Juăt laih anŭn ƀing Pharisai! Ƀing gih jing ƀing pơƀlŏr! Ƀing gih kơtư̆ juă ƀing đah kơmơi kơmai kiăng mă hĭ sang kŏng ngăn ƀing gơ̆, samơ̆ kơđai glaĭ ƀing gih ăt jing ƀing ngă mă iâu laĭ sui sĭn mơ̆n kiăng kơ pơang. Hơnŭn yơh, ƀing gih či tŭ tơlơi pơkơhma̱l prŏng biă mă yơh.”[249]

¹⁵“Răm ƀăm yơh kơ ƀing gih, Ơ ƀing nai pơtô Tơlơi Juăt laih anŭn ƀing Pharisai! Ƀing gih jing ƀing pơƀlŏr! Ƀing gih đuaĭ hyu găn rơsĭ đĭ kơdư kiăng iâu mơthưr kơnơ̆ng sa čô mơnuih đôč kiăng kơ đuaĭ tui tơlơi đaŏ gih; samơ̆ tơdang gơ̆ jing mơnuih đaŏ laih, ƀing gih pơjing gơ̆ jing hĭ mơnuih lăp nao kơ war apui gui kơtraŏ dua wơ̆t lu hloh kơ gih pô.”[250]

¹⁶“Răm ƀăm kơ ƀing gih, Ơ ƀing mơnuih ba jơlan bum mơta ăh! Ƀing gih pơtô tui anai, ‘Tơdah hlơi pô ƀuăn rơ̆ng hăng Sang Yang, tơlơi ñu ƀuăn anŭn huaĭ đo̱m ôh; samơ̆ tơdah hlơi pô ƀuăn rơ̆ng hăng gơnam mŏng ja̱m mah amăng Sang Yang anŭn, tơlơi ñu ƀuăn anŭn či đo̱m yơh.’

¹⁷Ơ ƀing mlŭk bum mơta ăh! Gơnam pă jing yom pơphan hloh lĕ, gơnam mah anŭn ƀôdah Sang Yang ngă kơ gơnam mah anŭn jing rơgoh hiam?

¹⁸Laih anŭn ƀing gih ăt pơtô tui anai dơ̆ng, ‘Tơdah hlơi pô ƀuăn rơ̆ng hăng kơnưl ngă yang, tơlơi ñu ƀuăn huaĭ đo̱m ôh; samơ̆ hlơi pô ƀuăn rơ̆ng hăng gơnam ngă yang ƀơi ngŏ kơnưl anŭn, tơlơi ñu ƀuăn anŭn či đo̱m yơh.’

¹⁹Ơ ƀing bum mơta ăh! Gơnam pă jing yom pơphan hloh lĕ, gơnam ngă yang ƀôdah kơnưl ngă yang ngă kơ gơnam anŭn jing hĭ rơgoh hiam?

²⁰Hơnŭn yơh, hlơi pô ƀuăn rơ̆ng hăng kơnưl ngă yang, ñu anŭn ƀuăn hăng kơnưl anŭn wơ̆t hăng hơget gơnam ƀơi ngŏ kơnưl anŭn yơh.

²¹Hlơi pô ƀuăn rơ̆ng hăng Sang Yang, ñu anŭn ƀuăn rơ̆ng hăng Sang Yang wơ̆t hăng Ơi Adai jing Pô dŏ amăng Sang Yang anŭn yơh.

²²Laih anŭn dơ̆ng, hlơi pô ƀuăn rơ̆ng hăng adai adih, ñu anŭn ăt ƀuăn rơ̆ng hăng grê pơtao Ơi Adai laih anŭn hăng Pô dŏ ƀơi grê pơtao anŭn mơ̆n.”[251]

²³“Răm ƀăm yơh kơ ƀing gih, Ơ ƀing nai pơtô Tơlơi Juăt laih anŭn ƀing Pharisai ăh! Ƀing gih jing ƀing pơƀlŏr! Ƀing gih pơyơr sa črăn amăng pluh hơdôm gơnam tăm tui anai: Ač, plăng laih anŭn añăm tăm ƀâo hiam pơkŏn, samơ̆ tơlơi tơpă hơnơ̆ng laih anŭn tơlơi khăp kơ Ơi Adai jing tơlơi yom pơphan hloh ƀing gih hơngah lui hĭ. Hơdôm tơlơi anŭn yơh ƀing gih khŏm ngă laih anŭn kŏn hơngah lui hĭ lơi hơdôm tơlơi pơyơr hlâo kơ anŭn.[252]

²⁴Ơ ƀing mơnuih ba jơlan bum mơta ăh! Ƀing gih rưng mă pơđuaĭ hĭ hơdŏm yui samơ̆ lun lŏng aseh samô.

²⁵“Răm ƀăm yơh kơ ƀing gih, Ơ ƀing nai pơtô Tơlơi Juăt laih anŭn ƀing Pharisai ăh! Ƀing gih jing ƀing pơƀlŏr! Ƀing gih rao gah rơngiao kơ kơčŏk hăng ja̱m, samơ̆ gơnam ƀơ̆ng gah lăm kơ kơčŏk hăng ja̱m ƀing gih hơmâo anŭn yua mơ̆ng tơlơi klĕ sua hăng tơlơi klih gih yơh.

²⁶Ơ ƀing Pharisai bum mơta ăh! Blung hlâo brơi kơ ƀing gih rao bĕ gah lăm kơ kơčŏk hăng ja̱m anŭn, giŏng anŭn kăh gah rơngiao ăt či rơgoh hĭ mơ̆n.

²⁷“Răm ƀăm yơh kơ ƀing gih, Ơ ƀing nai pơtô Tơlơi Juăt hăng ƀing Pharisai ăh! Ƀing gih jing ƀing pơƀlŏr! Ƀing gih jing hrup hăng ha boh pơsat pik čur kô̱̆ gah rơngiao hiam biă mă, samơ̆ gah lăm bă hăng tơlang mơnuih djai brŭ hơƀak drak.[253]

²⁸Kar kaĭ mơ̆n, arăng lăng ƀing gih gah rơngiao jing mơnuih tơpă hơnơ̆ng, samơ̆ gah lăm gih bă hăng tơlơi pơƀlŏr soh sat yơh.

²⁹“Răm ƀăm yơh kơ ƀing gih, Ơ ƀing nai pơtô Tơlơi Juăt hăng ƀing Pharisai ăh! Ƀing gih jing ƀing pơƀlŏr! Ƀing gih pơkra pơsat hiam rô̆ kơ ƀing pô pơala laih anŭn rơmet pơhrôp glaĭ pơsat ƀing mơnuih tơpă hơnơ̆ng anŭn.

³⁰Giŏng anŭn, ƀing gih laĭ tui anai dơ̆ng, ‘Tơdah ƀing gơmơi hơdip hrŏm rơnŭk hăng ƀing ơi adon ta đưm adih, ƀing gơmơi ƀu či pơgop hrŏm hăng ƀing gơñu kiăng pơdjai hĭ ƀing pô pơala anŭn ôh.’

³¹Tơdang ƀing gih ngă tui anŭn, ƀing gih pơrơklă laih gih pô jing ană tơčô ƀing hơmâo pơdjai hĭ laih ƀing pô pơala hlâo adih.

³²Tui anŭn, ngă pơgiŏng hĭ bĕ hơdôm bruă ƀing ơi adon gih hơmâo čơdơ̆ng ngă laih mơ̆ng đưm hlâo adih.”[254]

³³Yêsu laĭ dơ̆ng tui anai, “Ơ ƀing ala, ƀing kơnung djuai ala tơpơ̆ng ăh! Hiư̆m pă ƀing gih čang rơmang kiăng kơ dưi klaih hĭ mơ̆ng tơlơi pơkơhma̱l amăng war apui lĕ?[255]

³⁴Tui anŭn yơh, Kâo či pơkiaŏ ƀing pô pơala, ƀing rơgơi laih anŭn ƀing nai pơtô jơlan Ơi Adai nao pơ ƀing gih. Đơđa amăng ƀing gơ̆ ƀing gih či pơdjai hĭ hăng tơlơi pŏng hĭ ƀing gơ̆ pơ kơyâo bơrơkal laih anŭn đơđa ƀing gih či taih ama̱ng amăng sang pơjơnum hăng kiaŏ mă mơ̆ng plei anai truh pơ plei adih.

³⁵Hơnăl tuč, tơlơi pơkơhma̱l yuakơ tơlơi pơdjai abih bang mơnuih ƀu hơmâo tơlơi soh či lê̆ ƀơi ƀing gih yơh, anŭn jing čơdơ̆ng mơ̆ng drah mơnuih tơpă hơnơ̆ng Abel hlŏng truh kơ drah Zekharias, jing ană đah rơkơi Berekyah, jing pô ƀing gih hơmâo pơdjai hĭ laih kơplăh wăh Sang Yang hăng kơnưl ngă yang.[256]

³⁶Kâo laĭ kơ ƀing gih sĭt biă mă, tơlơi pơkơhma̱l yuakơ abih bang tơlơi pơdjai mơnuih anŭn či truh ƀơi ƀing mơnuih rơnŭk anai yơh.”

³⁷Yêsu pơhiăp dơ̆ng tui anai, “Ơ ƀing Yerusalaim, Yerusalaim hơi! Ƀing gih pơdjai hĭ ƀing pô pơala laih anŭn glŏm boh pơtâo kơ ƀing Ơi Adai hơmâo pơkiaŏ rai laih pơ ƀing gih anŭn! Hơmâo lu wơ̆t laih, Kâo kiăng pơƀut glaĭ ƀing ană plei gih kar hăng mơnŭ ania kruk ană ñu kiăng kơ krup gah yŭ čăng ñu yơh, samơ̆ ƀing gih ƀu kiăng ôh!

³⁸Anai nê, Ơi Adai či pơrơngol hĭ Sang Yang gih yơh.[257]

³⁹Kâo laĭ hăng ƀing gih, čơdơ̆ng mơ̆ng ră anai, ƀing gih ƀu či ƀuh Kâo dơ̆ng tah tơl ƀing gih či laĭ, ‘Bơni hiam yơh kơ Pô rai amăng anăn tơlơi dưi Khua Yang!’ ”[258]