Read Jarai Mathiơ 24 Bible Online

Mathiơ 24 - Jarai bible

Mathiơ 24

¹Yêsu tơbiă đuaĭ hĭ mơ̆ng Sang Yang Ơi Adai laih anŭn tơdang Ñu hlak rơbat nao, ƀing ding kơna Ñu rai jĕ ră ruai kơčrâo kơ Ñu kơ hơdôm anih wăl tơdron hiam klă Sang Yang anŭn.

²Yêsu laĭ glaĭ, “Ơ, ƀing gih ƀuh abih bang anih Sang Yang anŭn jing hiam yơh. Samơ̆ Kâo laĭ kơ ƀing gih sĭt biă mă, tơdơi adih ƀing rŏh ayăt či pơrai hĭ tơl ƀu či hơmâo ôh sa boh pơtâo anai dŏ ƀơi ngŏ boh pơtâo pơkŏn; rĭm boh pơtâo ƀing rŏh ayăt či pơglưh pơčah hĭ abih bang yơh.”

³Tơdơi kơ anŭn ƀiă, tơdang Yêsu hlak dŏ be̱r ƀơi bŏl čư̆ Ôliwơ, ƀing ding kơna rai hơjăn pơ Yêsu hăng tơña tui anai, “Rơkâo kơ Ih ruai brơi kơ ƀing gơmơi thâo bĕ: Hơbĭn tơlơi răm rai anŭn či truh lĕ? Laih anŭn hơget či jing gru kơnăl laĭ pơthâo kơ hrơi Ih či trŭn rai laih anŭn kơ hrơi đŭt lŏn tơnah lĕ?”

⁴Yêsu laĭ glaĭ tui anai, “Răng bĕ, anăm brơi kơ arăng pơƀlŏr hĭ ƀing gih ôh.

⁵Kâo laĭ tui anŭn yuakơ či hơmâo lu mơnuih pơƀlŏr mă amăng anăn Kâo hăng laĭ tui anai, ‘Kâo yơh jing Pô Messiah!’ Tui anŭn, ƀing gơñu či pơƀlŏr hĭ lu mơnuih biă mă yơh.

⁶Ƀing gih či hơmư̆ dơnai pơblah pơ anih jĕ laih anŭn tơlơi hing hyu kơ tơlơi pơblah mơ̆ng anih ataih, samơ̆ ƀing gih anăm huĭ bra̱l ôh. Hơdôm tơlơi anŭn khŏm či truh yơh, samơ̆ tơlơi anŭn ƀu pơrơđah kơ hrơi đŭt lŏn tơnah či truh mơtam ôh.

⁷Kơnung djuai anai či tơgŭ pơkơdơ̆ng glaĭ hăng kơnung djuai pơkŏn laih anŭn lŏn čar anai či tơgŭ pơkơdơ̆ng glaĭ hăng lŏn čar adih yơh. Amăng abih bang lŏn tơnah ăt či hơmâo tơlơi ư̆ rơpa laih anŭn tơlơi pơpư̆ pơgơi lŏn tơnah mơ̆n.

⁸Samơ̆ abih bang tơlơi truh anŭn jing blung hlâo kơ tơlơi gleh tơnap đôč hrup hăng đah kơmơi čơdơ̆ng phŭn ruă nuă kơ tơlơi tơkeng ană ñu yơh.

⁹“Giŏng anŭn, ƀing rŏh ayăt gih či mă jao hĭ đơđa amăng ƀing gih kiăng kơ arăng ngă sat pơtơnap laih anŭn či pơdjai lui hĭ đơđa. Ƀing mơnuih lu mơ̆ng djŏp djang lŏn čar či pơrơmut kơ ƀing gih yơh yuakơ ƀing gih đuaĭ tui Kâo.[259]

¹⁰Ăt či hơmâo lu mơnuih hơngah lui hĭ tơlơi đaŏ gơñu ƀơi mông anŭn laih anŭn ƀing gơñu či pơblư̆ hĭ tơdruă hăng pơrơmut kơ tơdruă yơh.

¹¹Hơmâo lu ƀing pô pơala ƀlŏr či pơƀuh rai kiăng kơ pơƀlŏr hĭ lu mơnuih.

¹²Tơlơi sat ƀai yơh či pơlar hyu lu jai yơh; tui anŭn lu mơnuih či lui hĭ tơlơi khăp kiăng kơ Ơi Adai laih anŭn kơ mơnuih pơkŏn yơh.

¹³Samơ̆ hlơi pô gir run tơl truh hrơi đŭt lŏn tơnah, ñu anŭn či klaih yơh.[260]

¹⁴Giŏng anŭn, Tơlơi Pơthâo Hiam kơ mơnuih mơnam dưi jing ană plei Dêh Čar Ơi Adai arăng či hyu pơtô pơblang pơ djŏp djang lŏn tơnah kiăng kơ abih bang mơnuih mơnam dưi hơmư̆ Tơlơi Pơthâo Hiam anŭn; hlak anŭn rơnŭk đŭt lŏn tơnah či truh yơh.”

¹⁵Yêsu pơtô dơ̆ng tui anai, “Ƀing gih či ƀuh ‘gơnam hơƀak drak[261] pơjing rai tơlơi grĭ grañ’ či dŏ amăng anih rơgoh hiam Sang Yang. Tơlơi truh anŭn pô pơala Daniêl hơmâo laĭ lui hlâo laih.” Hlơi pô đŏk tơlơi laĭ lui hlâo anŭn, brơi kơ ñu anŭn thâo hluh bĕ.[262]

¹⁶Tơdang hơmâo tơlơi truh tui anŭn, hlơi pô dŏ amăng kwar Yudea, brơi kơ ñu đuaĭ kơdŏp bĕ pơ čư̆ čan.

¹⁷Hlơi pô dŏ pơdơi gah rơngiao sang, anăm mŭt mă tơbiă ôh dram gơnam ñu amăng sang hlâo kơ ñu đuaĭ kơdŏp.[263]

¹⁸Hlơi pô dŏ pơ amăng đang hơma, anăm wơ̆t glaĭ mă ao jao ñu ôh hlâo kơ ñu đuaĭ kơdŏp.

¹⁹Amăng hơdôm hrơi anŭn či hơmâo tơlơi tơnap tap biă mă yơh kơ ƀing đah kơmơi dŏ pi kian laih anŭn kơ ƀing đah kơmơi dŏ brơi ană mĕm.

²⁰Iâu laĭ kơ Ơi Adai bĕ, kiăng kơ ƀing gih ƀu đuaĭ kơdŏp djơ̆ amăng bơyan puih ƀôdah amăng hrơi Saƀat ôh.

²¹Kâo laĭ tui anŭn yuakơ čơdơ̆ng mơ̆ng hrơi Ơi Adai hrih pơjing kơ lŏn tơnah hlŏng truh kơ ră anai aka ƀu hơmâo djơ̆ ôh hrup hăng tơlơi gleh tơnap prŏng prin biă mă anŭn. Laih anŭn dơ̆ng, ăt ƀu či hơmâo lơi tơdơi kơ anai.[264]

²²Samơ̆ Ơi Adai hơmâo pơtrŭn hĭ laih hơdôm hrơi gleh tơnap anŭn; tơdah Ñu aka ƀu ngă ôh kơ tơlơi anŭn, sĭt ƀu či hơmâo hlơi pô ôh dŏ so̱t. Ơi Adai pơtrŭn hĭ laih hơdôm hrơi anŭn yuakơ Ñu pap kơ ƀing mơnuih Ñu hơmâo ruah mă laih yơh.

²³“Amăng hrơi mông anŭn tơdah hlơi pô laĭ hăng ƀing gih, ‘Anai nê, anai jing Pô Messiah,’ ƀôdah ‘Adih dih, Ñu pơ anŭn,’ sĭt anăm đaŏ kơ tơlơi anŭn ôh.

²⁴Kâo laĭ tui anŭn yuakơ hơmâo lu ƀing Messiah ƀlŏr laih anŭn pô pơala ƀlŏr či pơƀuh rai ngă lu tơlơi gru kơnăl yom pơphan hăng bruă mơsêh mơyang, kiăng kơ pơƀlŏr hĭ abih bang mơnuih; tơdah dưi, ƀing gơñu ăt pơƀlŏr hĭ wơ̆t hăng ƀing Ơi Adai hơmâo ruah laih mơ̆n.

²⁵Kơčăng bĕ kơ hơdôm tơlơi Kâo hơmâo ruai pơthâo laih kơ ƀing gih hlâo kơ hơdôm tơlơi anŭn truh.”

²⁶“Tui anŭn, tơdah hlơi pô laĭ kơ ƀing gih tui anai, ‘Adih dih, Pô Messiah pơ tơdron ha̱r,’ anăm nao tui ôh. Tơdah hlơi pô laĭ tui anai dơ̆ng, ‘Lăng anai, Pô Messiah dŏ kơdŏp amăng sang,’ ăt anăm đaŏ tui ôh.[265]

²⁷Kâo laĭ tui anŭn yuakơ hrơi Kâo, jing Ană Mơnuih, či rai hrup hăng kơmlă jă̱ ƀlĭp ƀlăp amăng adai adih čơdơ̆ng mơ̆ng adai gah ngŏ̱ truh pơ adai yŭ̱ yơh.”

²⁸Yêsu laĭ dơ̆ng hăng tơlơi pơrơtưh tui anai, “Pơpă hơmâo drơi djai, pơ anŭn yơh khul čim grư̆ či pơƀut glaĭ.”[266]

²⁹Yêsu pơtô dơ̆ng tui anai, “Blĭp blăp tơdơi kơ hrơi gleh tơnap anŭn rơgao hĭ, “ ‘Yang hrơi či kơnăm hĭ mơtam laih anŭn yang blan ƀu či rơđah dơ̆ng tah, khul pơtŭ či lê̆ trŭn mơ̆ng adai laih anŭn Ơi Adai či ngă pơpư̆ pơgơi abih bang pul bơngač amăng adai rơngit yơh.’[267]

³⁰“Giŏng anŭn, gru kơnăl pơrơđah kơ tơlơi Ană Mơnuih hlak trŭn rai či pơƀuh rai hăng adai adih, laih anŭn abih bang kơnung djuai ƀơi lŏn tơnah anai či čŏk hia huĭ hyưt yơh tơdang ƀing gơñu ƀuh Ană Mơnuih trŭn rai ƀơi kơthul hiăng adai hăng tơlơi dưi mơyang laih anŭn tơlơi ang yang prŏng biă mă yơh.[268]

³¹Ñu či pơkiaŏ ƀing ling jang hiam Ñu ayŭp kraih tơdiăp laih anŭn nao pơ abih bang akiăng lŏn tơnah kiăng kơ iâu pơƀut glaĭ abih bang mơnuih Ơi Adai ruah laih mơ̆ng rơnuč lŏn tơnah anai truh pơ rơnuč lŏn tơnah adih yơh.”

³²Yêsu pơtô dơ̆ng tui anai, “Hơmư̆ bĕ tơlơi pơhơmutu kơ kơyâo hra anai pơtô kơ ƀing gih. Tơdang than kơyâo anŭn jing mơda hla phrâo čơnăt, ƀing gih thâo krăn bơyan phang jĕ či truh yơh.

³³Kar hăng anŭn mơ̆n, tơdang ƀing gih ƀuh abih bang tơlơi truh anŭn, brơi kơ ƀing gih thâo krăn bĕ, hrơi anŭn jĕ či truh laih, Ană Mơnuih hlak dŏ prap pre laih ƀơi bah amăng.

³⁴Kâo laĭ sĭt biă mă hăng ƀing gih, abih bang tơlơi Kâo laĭ anŭn či truh yơh hlâo kơ abih bang ƀing mơnuih hlak hơdip amăng rơnŭk ta anai či rơgao hĭ.

³⁵Adai lŏn či rơgao hĭ, samơ̆ boh hiăp Kâo pơhiăp ƀu či rơgao hĭ ôh.”

³⁶Yêsu pơtô dơ̆ng tui anai, “Kơ hrơi mông Ană Mơnuih trŭn rai pơ lŏn tơnah anai, sĭt ƀu hơmâo hlơi pô thâo ôh; ling jang hiam pơ adai adih wơ̆t hăng Ană Ơi Adai ăt ƀu thâo lơi, kơnơ̆ng hơjăn Ama Ñu đôč yơh thâo.

³⁷Tơlơi Ană Mơnuih trŭn rai či hrup hăng tơlơi truh amăng rơnŭk Noah đưm đă yơh.[269]

³⁸Kâo laĭ tui anŭn yuakơ amăng rơnŭk anŭn hlâo kơ ia li̱ng lip truh, mơnuih mơnam ƀu kơčăng ôh samơ̆ ƀơ̆ng mơñum hăng pơdŏ rơkơi bơnai. Ƀing gơñu ngă nanao hrup hăng anŭn hlŏng truh kơ hrơi Noah mŭt amăng kŏmpăn ñu hơmâo pơdơ̆ng đĭ laih.

³⁹Ƀing gơñu ƀu thâo krăn ôh ia li̱ng jĕ truh, tơl hrơi ia li̱ng truh laih anŭn lip đung pơđuaĭ hĭ abih bang yơh. Hrơi Ană Mơnuih rai ăt či truh hrup hăng anŭn mơ̆n.[270]

⁴⁰Amăng hrơi mông anŭn, năng ai či hơmâo dua čô mơnuih đah rơkơi dŏ mă bruă amăng đang hơma, sa čô Ơi Adai či mă pơđuaĭ hĭ, sa čô či dŏ glaĭ yơh.

⁴¹Ƀôdah či hơmâo dua čô đah kơmơi dŏ tơ̆p pơdai hrŏm hơbĭt, sa čô Ơi Adai či mă pơđuaĭ hĭ, sa čô či dŏ glaĭ yơh.

⁴²“Dŏ kơčăng bĕ, yuakơ ƀing gih ƀu thâo ôh hơbĭn hrơi Khua Yang gih či rai.

⁴³Samơ̆ brơi kơ ƀing gih thâo hluh bĕ kơ tơlơi pơhơmutu anai: Tơdah pô sang thâo hơbĭn mơnuih klĕ dŏp či mŭt amăng mlam, ñu či dŏ kơčăng yơh, hăng ƀu brơi ôh mơnuih klĕ dŏp anŭn mŭt klĕ hĭ amăng sang ñu.[271]

⁴⁴Tui anŭn, brơi kơ ƀing gih prap pre bĕ, yuakơ Ană Mơnuih či rai amăng mông ƀing gih ƀu pơmĭn Ñu či truh ôh.”

⁴⁵Yêsu pơtô hăng tơlơi pơhơmutu pơkŏn dơ̆ng tui anai, “Tui anŭn, hlơi pô jing khua ding kơna tŏng ten rơgơi lĕ? Ñu yơh jing pô khua ñu hơmâo jao brơi laih bruă kơ ñu wai lăng abih bang ƀing ding kơna pơkŏn amăng sang, kiăng kơ pơpha brơi gơnam ƀơ̆ng djơ̆ mông yơh.

⁴⁶Sĭt mơyŭn hiam yơh kơ ding kơna anŭn, yuakơ tơdah khua ñu glaĭ ƀuh ñu ngă tŏng ten kar hăng tơlơi khua ñu pơtă laih.

⁴⁷Kâo laĭ hăng ƀing gih sĭt biă mă, khua ñu či jao brơi kơ ñu wai lăng abih bang dram gơnam kŏng ngăn amăng sang khua ñu yơh.

⁴⁸Samơ̆ tơdah khua ding kơna anŭn jing pô sat ƀai, ñu či pơmĭn amăng jua pơmĭn ñu pô tui anai, ‘Khua kâo dŏ sui amơĭ kăh glaĭ.’

⁴⁹Laih anŭn ñu či čơdơ̆ng taih čŏm ƀing ding kơna pơkŏn mă bruă hrŏm hăng ñu laih anŭn ƀơ̆ng mơñum hăng mơnuih măt tơpai.

⁵⁰Tơdang khua ñu či wơ̆t glaĭ amăng hrơi ñu ƀu răng, amăng mông ñu ƀu pơmĭn,

⁵¹khua ñu či pơkơhma̱l hĭ ñu kơtang amăng anih hrŏm hăng ƀing pơƀlŏr tŭ mă tơlơi pơkơhma̱l yơh. Pơ anih anŭn, ñu či čŏk hia hăng kĕ tơgơi yơh.”