Read Jarai Markôs 12 Bible Online

Markôs 12 - Jarai bible

Markôs 12

¹Giŏng anŭn, Yêsu yua tơlơi pơhơmutu kiăng pơtô kơ ƀing gơñu tui anai, “Hơmâo sa čô mơnuih pla đang boh kơƀâo prŏng. Ñu pơdơ̆ng bơnư̆ pơga jum dar, klơi sa boh amăng luh jing anih pioh djet boh kơƀâo laih anŭn pơdơ̆ng đĭ sa boh nưh kiăng kơ gak wai. Giŏng anŭn, ñu jao đang anŭn kơ ƀing arăng kiăng kơ răk wai laih anŭn pơpha boh čroh hăng ñu, samơ̆ ñu pô nao pơ anih lŏn pơkŏn sui ƀiă.[83]

²Tơl truh bơyan pĕ boh, pô đang anŭn pơkiaŏ ding kơna ñu nao pơ ƀing răk wai đang anŭn kiăng kơ mă brơi boh čroh pơpha mơ̆ng đang anŭn.

³Samơ̆ ƀing gơñu mă pô ding kơna anŭn, taih hĭ gơ̆ laih anŭn brơi gơ̆ glaĭ tơngan đôč đač yơh.

⁴Giŏng anŭn, pô đang anŭn pơkiaŏ nao sa čô ding kơna pơkŏn dơ̆ng pơ ƀing gơñu. Ƀing gơñu taih hĭ gơ̆ ƀơi akŏ laih anŭn pơmlâo hĭ gơ̆.

⁵Pô đang anŭn pơkiaŏ nao sa čô ding kơna pơkŏn dơ̆ng laih anŭn ƀing gơñu pơdjai hĭ gơ̆. Pô đang anŭn pơkiaŏ nao ƀing ding kơna pơkŏn dơ̆ng. Đơđa amăng ƀing gơ̆, ƀing gơñu taih ama̱ng, đơđa ƀing pơkŏn, ƀing gơñu pơdjai hĭ.

⁶“Pô đang anŭn dŏ hơmâo sa čô dơ̆ng kiăng kơ pơkiaŏ nao, anŭn jing ană đah rơkơi ñu khăp biă mă. Hơnăl tuč, ñu pơkiaŏ nao gơ̆ yơh yuakơ ñu pơmĭn tui anai, ‘Ƀing gơñu či pơpŭ kơ ană kâo pô yơh.’

⁷“Samơ̆ ƀing răk wai đang anŭn pơlaĭ kơ tơdruă gơñu tui anai, ‘Anŭn yơh jing pô či tŭ mă kŏng ngăn ama ñu. Nă, brơi kơ ƀing ta pơdjai hĭ bĕ ñu laih anŭn kŏng ngăn anŭn či lŏm kơ ƀing ta yơh.’

⁸Tui anŭn, ƀing gơñu mă gơ̆, glŏm pơ gah rơngiao đang laih anŭn pơdjai hĭ gơ̆.

⁹“Tui anŭn, hơget tơlơi pô đang boh kơƀâo anŭn či ngă lĕ? Ñu či rai pơdjai hĭ ƀing răk wai đang anŭn laih anŭn jao brơi đang boh kơƀâo anŭn kơ ƀing răk wai pơkŏn yơh.

¹⁰Sĭt ƀing gih ăt đŏk laih mơ̆n tơlơi anai amăng Hơdrôm Hră Rơgoh Hiam, “Boh pơtâo ƀing pơdơ̆ng sang hơngah lui ƀu tŭ yua, hơmâo jing hĭ laih boh pơtâo phŭn kơ abih bang.[84]

¹¹Khua Yang yơh jing Pô hơmâo ngă laih tơlơi anŭn, laih anŭn jing hli̱ng hla̱ng biă mă kơ ƀing ta lăng.”

¹²Giŏng anŭn, ƀing gơñu kiăng mă Yêsu yơh yuakơ ƀing gơñu thâo krăn Ñu hơmâo pơruai laih tơlơi pơhơmutu anŭn kiăng kơčrâo kơ ƀing gơñu. Samơ̆ ƀing gơñu huĭ kơ ƀing ană plei. Tui anŭn, ƀing gơñu tơbiă đuaĭ hĭ yơh.

¹³Tơdơi kơ anŭn, ƀing gơñu pơkiaŏ rai đơđa ƀing Pharisai hăng ƀing Hêrôd pơ Yêsu kiăng mă soh Yêsu amăng tơlơi pơhiăp.

¹⁴Ƀing gơñu nao pơ Yêsu hăng laĭ tui anai, “Ơ Nai, ƀing gơmơi thâo Ih jing Pô pơhiăp hăng pơtô djơ̆ tơpă. Ih ƀu pơkăh pơpha hăng hlơi pô ôh yuakơ Ih ƀu pơđi̱ng lăng ôh kơ mơnuih yom pơphan hăng mơnuih ƀu yom pơphan, samơ̆ Ih pơtô laĭ sĭt kơ hơdră jơlan Ơi Adai yơh. Djơ̆ tui hăng tơlơi phiăn ta mơ̆, ƀing ta duh jia kơ pơtao prŏng Kaisar? Ta khŏm brơi ƀôdah lui?

¹⁵Hiư̆m ngă, ƀing ta khŏm duh ƀôdah ƀu duh ôh?” Samơ̆ Yêsu thâo tơlơi pơƀlŏr gơñu. Ñu laĭ tui anai, “Yua hơget ƀing gih ngă mơneč sat ƀai kơ Kâo lĕ? Ba rai pơ Kâo sa prăk denarius laih anŭn brơi kơ Kâo lăng prăk anŭn bĕ.”

¹⁶Ƀing gơñu ba rai kơ Ñu sa kăk prăk laih anŭn Yêsu tơña kơ ƀing gơñu tui anai, “Ƀơi prăk anai hơmâo rup hăng anăn hlơi lĕ?” Ƀing gơñu laĭ glaĭ tui anai, “Pơtao prŏng Kaisar.”

¹⁷Giŏng anŭn, Yêsu laĭ kơ ƀing gơñu tui anai, “Tui anŭn, pơglaĭ bĕ kơ pơtao Kaisar hơget gơnam lŏm kơ pơtao Kaisar, laih anŭn pơglaĭ bĕ kơ Ơi Adai hơget gơnam lŏm kơ Ơi Adai.” Laih anŭn ƀing gơñu hli̱ng hla̱ng biă mă kơ tơlơi Yêsu laĭ glaĭ anŭn.

¹⁸Giŏng anŭn, ƀing Saddukai, jing ƀing laĭ kơ tơlơi ƀu hơmâo tơlơi hơdip glaĭ ôh, rai pơ Yêsu laih anŭn tơña kơ Ñu tui anai,[85]

¹⁹“Ơ Nai ăh, Môseh čih laih kơ ƀing ta kơ tơlơi tơdah sa čô mơnuih ayŏng ñu dŏ bơnai samơ̆ gơ̆ djai hĭ hlâo kơ hơmâo ană bă, ñu anŭn jing pô adơi hlai khŏm dŏ bơnai anŭn. Hơnŭn yơh, tơdang dua gơñu hơmâo ană bă laih, ƀing gơñu khŏm yap ană anŭn jing ană lŏm kơ ayŏng ñu rơngiă anŭn yơh.[86]

²⁰Hlâo adih, hơmâo tơjuh čô ayŏng adơi sa amĭ ama. Pô tal sa dŏ bơnai samơ̆ ñu djai hĭ hlâo kơ hơmâo ană bă.

²¹Pô tal dua dŏ bơnai kơmai anŭn, samơ̆ ñu ăt djai hĭ mơ̆n ƀu hơmâo ană bă ôh. Pô tal klâo ăt kar kaĭ mơ̆n.

²²Sĭt yơh, ƀu hơmâo hlơi pô ôh amăng tơjuh čô anŭn hơmâo ană bă. Hơnăl tuč, pô đah kơmơi anŭn ăt djai hĭ mơ̆n.

²³Amăng tơlơi hơdip glaĭ, pô đah kơmơi anŭn či jing bơnai hlơi lĕ? Ƀing gơmơi tơña tui anŭn yuakơ tơjuh čô ayŏng adơi anŭn le̱ng kơ pơdŏ hăng gơ̆ soh sel.”

²⁴Yêsu laĭ glaĭ tui anai, “Tơlơi pơmĭn gih anŭn jing soh biă mă yơh, yuakơ ƀing gih ƀu thâo hluh ôh Hơdrôm Hră Rơgoh Hiam ăt kŏn thâo krăn lơi tơlơi dưi mơyang Ơi Adai.

²⁵Tơdang ƀing djai hơdip glaĭ, ƀing gơñu ƀu či pơdŏ rơkơi bơnai dơ̆ng tah. Ƀing gơñu či jing pơdơ̆ pơđơ̱r hăng ƀing ling jang hiam Ơi Adai amăng adai adih yơh, jing ƀing ƀu dŏ rơkơi bơnai ôh.

²⁶Bơ kơ ƀing mơnuih hơdip glaĭ anŭn, sĭt ƀing gih hơmâo đŏk laih amăng hră Môseh čih, tơdang ñu nao lăng kơ pum kơyâo, hiư̆m Ơi Adai laĭ laih kơ ñu tui anai, ‘Kâo jing Ơi Adai Abraham, Ơi Adai Isa̱k laih anŭn Ơi Adai Yakôb.’[87]

²⁷Ñu ƀu djơ̆ jing Ơi Adai kơ ƀing djai ôh samơ̆ kơ ƀing hơdip yơh. Ƀing gih soh biă mă yơh!”

²⁸Sa čô amăng ƀing nai pơtô tơlơi juăt rai hơmư̆ arăng pơrơklah hăng Yêsu. Tơdang ñu thâo krăn Yêsu laĭ glaĭ kơ ƀing gơñu thâo biă mă, ñu tơña kơ Yêsu tui anai, “Amăng abih bang tơlơi juăt, tơlơi juăt pă jing yom pơphan hloh lĕ?”

²⁹Yêsu laĭ glaĭ tui anai, “Anai jing tơlơi juăt yom pơphan hloh, ‘Hơmư̆ bĕ, Ơ ƀing Israel, Khua Yang jing Ơi Adai ta, hơjăn Khua Yang yơh jing Ơi Adai ta sĭt.[88]

³⁰Khăp bĕ kơ Khua Yang ih hăng abih pran jua ih, hăng abih jua bơngăt ih, hăng abih tơlơi pơmĭn ih laih anŭn hăng abih tơlơi kơtang ih.’

³¹Tơlơi Juăt mrô dua jing, ‘Ih khŏm khăp bĕ kơ mơnuih re̱ng gah ih hrup hăng ih khăp kơ ih pô.’ Ƀu hơmâo tơlơi juăt pă ôh jing yom pơphan hloh kơ dua tơlơi juăt anŭn.”[89]

³²Laih anŭn pô nai pơtô anŭn laĭ glaĭ tui anai, “Ơ Nai ăh, Ih pơhiăp hiam biă mă. Ih pơhiăp djơ̆ yơh tơdang Ih laĭ Ơi Adai jing sa laih anŭn rơngiao kơ Ñu ƀu hơmâo Ơi Adai pơkŏn ôh, samơ̆ kơnơ̆ng hơjăn Ñu đôč yơh.[90]

³³Tui anŭn, ƀing ta khăp kơ Ñu hăng abih pran jua ta, hăng abih tơlơi thâo hluh ta, hăng abih tơlơi kơtang ta laih anŭn ƀing ta khăp kơ mơnuih re̱ng gah ta kar hăng ta pô, anŭn jing yom pơphan hloh kơ abih bang khul gơnam pơyơr čuh hăng khul gơnam ngă yang pơkŏn yơh.”[91]

³⁴Tơdang Yêsu ƀuh nai pơtô anŭn laĭ glaĭ hăng tơlơi rơgơi, Ñu laĭ kơ gơ̆ tui anai dơ̆ng, “Ih ƀu dŏ ataih ôh mơ̆ng dêh čar Ơi Adai.” Laih anŭn čơdơ̆ng mơ̆ng anŭn ƀu hơmâo hlơi pô khĭn tơña kơ Ñu dơ̆ng tah.[92]

³⁵Tơdang Yêsu hlak pơtô amăng anih wăl tơdron sang yang, Ñu tơña tui anai, “Hiư̆m pă ƀing nai pơtô tơlơi juăt laĭ, ‘Pô Messiah jing ană tơčô pơtao Dawid’ lĕ?

³⁶Sĭt Dawid pô yua mơ̆ng Yang Bơngăt Hiam pơhaih tui anai: “ ‘Ơi Adai, jing Khua Yang, pơhiăp hăng Khua Yang[93] kâo tui anai: dŏ be̱r bĕ gah hơnuă kâo, jing anih pơpŭ pơyom, tơl Kâo blah juă hĭ ƀing rŏh ayăt Ih tui anŭn ƀing gơñu či bon kơkuh ƀơi tơkai Ih yơh.’[94]

³⁷“Pơtao Dawid pô iâu Pô Messiah anŭn jing Khua Yang ñu. Hiư̆m pă Messiah kơnơ̆ng dưi jing ană tơčô pơtao Dawid đôč hă?” Ƀing mơnuih lu dŏ hơmư̆ kơ Ñu hăng tơlơi mơak mơai yơh.

³⁸Tơdang Yêsu pơtô pơhrăm, Ñu laĭ tui anai, “Răng bĕ kơ ƀing nai pơtô tơlơi juăt. Ƀing gơñu khăp rơbat hyu buh ao phyung glông laih anŭn khăp kơ arăng pơhiăp kơkuh kơ ƀing gơñu tŏng krah anih sĭ mơnia.

³⁹Ƀing gơñu khăp dŏ ƀơi khul anih dŏ be̱r yom pơphan amăng sang jơnum laih anŭn khăp dŏ be̱r ƀơi khul anih dŏ pơpŭ pơyom amăng anih phet ƀơ̆ng huă.

⁴⁰Ƀing gơñu kơtư̆ juă ƀing đah kơmơi kơmai[95] kiăng mă hĭ sang kŏng ngăn ƀing gơ̆, samơ̆ kơđai glaĭ ƀing gơñu ăt jing ƀing ngă mă iâu laĭ sui sĭn mơ̆n kiăng kơ pơang. Ƀing mơnuih kar hăng anŭn či tŭ tơlơi pơkơhma̱l prŏng biă mă yơh.”

⁴¹Yêsu dŏ be̱r klă̱ anăp hăng hip prăk amăng Sang Yang, jing anih arăng pioh khul gơnam pơyơr, laih anŭn lăng ƀing mơnuih lu pioh mŭt prăk pơyơr gơñu amăng hip prăk anŭn. Hơmâo lu mơnuih pơdrŏng pioh mŭt prăk lu gơñu.

⁴²Samơ̆ hơmâo sa čô đah kơmơi kơmai rai hăng pơyơr dua prăk kăk ƀiă biă mă amăng hip anŭn, anŭn jing kơnơ̆ng yom truh kơ sa prăk đôč yơh.

⁴³Yêsu iâu rai ƀing ding kơna Ñu pơ Ñu laih anŭn laĭ tui anai, “Kâo laĭ kơ ƀing gih sĭt biă mă, pô đah kơmơi kơmai ƀun rin anai hơmâo pơyơr laih amăng hip prăk lu hloh kơ abih bang ƀing pơkŏn.

⁴⁴Kâo laĭ tui anŭn yuakơ abih bang ƀing gơñu pơyơr laih kơnơ̆ng mơ̆ng gơnam rơbeh gơñu đôč, samơ̆ pô đah kơmơi kơmai anai hơmâo pơyơr laih kơ Ơi Adai mơ̆ng abih bang gơnam gơ̆ hơmâo kiăng kơ hơdip yơh.”